Matiu 2 - Vato Vari Vakameka Voru Ia Batu Ne

Ria Vana Tarove Iri Tove Jesu

¹ Jesu i podo e Betelema loborona pua na Judia, torana ko i vae batu lavata Erode. Taramuzina i podo go Jesu, kaki ria vano tarove iri lamae Jerusalema, iri reqeme tepa i keba me saṉa ne.

² Iri lama tana, “Adepa to ikoego sale i podo go, tina batu lavata ria vano Jiu, remu qi mia domiri ia iza keba me tepa i keba me saṉa ne, qi lama go di vabatua ia qi go.”

³ Ṉalu batu lavata Erode igata seko dena, iki nanao velaka to kaega, mana gerena napu so osiqira ria iri koego Jerusalema.

⁴ Erode i teṉo qira osiqira patere ro mana vano tarove na tamana, i tana ne qira, “Adepa tane tina podo ego Kristo?”

⁵ Ria iri vataule, “Komala Betelema loborona pua na Judia, tanego iato dena pata i karo bana go propeta ne,

⁶ ‘Betelema kena na Judia, aro qoki lete muzi sivala ne qira kaega ria batu naro Judia, tanego de qo koego aro tina reqe me kakia batu tina kenaqa ne qira basoero era Izirel.’ ”

⁷ Gonae Erode i koru qira vano tarove iri reqe me tepa i keba me saṉa ne, tarina za mia vamikia tanuna. Mana i tana ne qira, ava torana tane i sadaka go domiri ne.

⁸ Mana taramuzina nae, i turine qira za Betelema, i vane qira de, “Za mana taqi velake sale dena, ṉalu muna za soba go ia, muna lama va rove zave, go tanuqu tuna za vabatu napua ia.”

⁹ Taramuzina iri gata lupo pataro i sine go batu lavata Erode, iri zaza napu. Mana iri mia napua so domiri iri mia bana go, i kenaqa ne qira, go iza noto eso totorana de ikoego sale ne.

¹⁰ Ṉalu iri mia go domiri ne, iri lete kula sivala.

¹¹ Mana ṉalu iri keba za pade ne, iri zamia qiru tamasina Maria, iri koloku tutuṉu iri vabatua Jesu, gonae iri papaqa pata vavagado ria, iri sosovolomo ne Jesu qolu, tala i nonoli velaka mana lodu i nonoli velaka ṉalu iri subia go.

¹² Do loborona kukureka ria, God i sine ne qira tariniki ule za de ikoego Erode. Gonae iri lulua kaki zuka kakavata mana iri gado ule za komala ro ria.

Josepo Mana Tamasina Jesu Iri Paqa Za Izipito

¹³ Taramuzina vano tarove iri zaza, aqelo ia Batu ne i lama sadake Josepo loborona kukureka, mana i sine ne ia, “Dogara! Pala sale nae, mana sinana paqa za Izipito go. Za koe nae go na doka so ṉalu tuna sine napu nigo era, tanego Erode i nanao tina taqia sale nae mana vae vale igo.”

¹⁴ Gonae Josepo i dogara me, i lulu qiru tamasina Jesu kuse nae mana iri paqa za Izipito,

¹⁵ i za koe Izipito go idoka e so ṉalu Erode i le. Go seko ia Batu ne, i va rove ze go propeta tina lama ogoto go, igo, “Qa koru vasiporo bana ze sale era Izipito.”

Erode I Vae Vale Qira Sale Valeke Ro

¹⁶ Taramuzina Erode i rove vano tarove ne iri poqe go ia, i lete muma sakata, gonae i turine qira vano soldia tarina za vae vale lupo qira sale valeke ro i karua ba iara kaebo karua ave qira iri koego Betelema mana komala ro iri ko garogaro go. Iva todo ze torana ṉalu itana bana ne qira go ria vano tarove ne.

¹⁷ Iago seko ia Batu ne iva rove zego propeta Jeremaia, qo i sine go, i lama voto, igo,

¹⁸ “Iri gata zaqe koru, kaki komala iri vitoṉo ze Rama, kaki basoe i dae korukoru mana i lete maqata go. Resol i dae qira salero ia, iri le lupo, mana ki soko kaega ka basoe ṉara va velake go nanao na go, tanego salero ia iri kaega lupo.”

Josepo Mana Tamasina Jesu Iri Ule Za Nazaret

¹⁹ Taramuzina Erode i le, aqelo ia Batu ne i sadaka ze Josepo loborona kukureka tepa Izipito.

²⁰ Mana aqelo ne i sine ne Josepo, “Dogara! Lulu qiru tamasina Jesu, mana ule za pua na Izirel, tanego ria iri soko go vae na sale ne iri le bana to.”

²¹ Gonae Josepo i dogara me, ilulu qiru tamasina Jesu mana iri ule za pua na Izirel.

²² Ṉalu Josepo i gata Akelus i kavale go tamana, i batu ego Judia, i sareki na zae na de go, tanego i rove bana ze ia loborona kukureka ne, iago Josepo i zae tepa kena Qalili.

²³ Gonae i za koe kaki komala iri vitoṉo ze Nazaret. Izazu ne iadena go seko ro iri sine bana go propeta ro ne tina lama voto go, “Tarina vitoṉo ze ia valeke na Nazaret.”