Matiu 19 - Vato Vari Vakameka Voru Ia Batu Ne

Jesu I Vari Vatatana Ne Dego Busi Vari Vaule

¹ Tararmmna Jesu i valupo sine na seko ro dena, i kasi ne Qalili i lulua kene tepa na uguru Jodan mana i kava ule me kena Judia.

² Topu sakata basoero iri lulu muzi ne ia, mana i vatavoisi qira go.

³ Kakiaro ria vano Parisio iri lama tana ne Jesu, tanego iri soko tana vasoru na ia, iri go, “Avigo Tamana i totoloṉo so, i varnao go, valeke i mazala so vaule na qole, ia ṉalu i soko go?”

⁴ Jesu i vataule, igo, “Avigo qamu toere Buka tabo ne i sine go, ‘Kokoso vatupiana na me God i va zaria valeke mana qole’?

⁵ Mana God igo, ‘Sauna to ia igogo ne, valeke tina kasi ne tamana mana sinana mana ko kameka e de ikoego qole ia mana riru ne iru kameka basoe to.’

⁶ Iago iruki ara karua basoe to kaega, do iru kameka. Pata i vakameka nego God, basoe tiniki ara vota napua kaega.”

⁷ Do vano Parisio iri tana napu ne ia, “Avigo bana tane Mosese i teke ne qemu remu tamana, dena igo, valeke i mazala so vaule na qole ia, ṉalu i soso ne pepa vari vaule ia?”

⁸ Jesu i vataule ne qira, “Mosese i teke ne qamu va toqe tepa ia vaule na qole, tanego i lete makuru vatatana qamu. Do kokoso vatupiana na me ṉalu God i vazaria go kolabana pua ne, iki go kaega nae.

⁹ Ma sine ne qamu, ṉalu kaki valeke i vaule qole ia, patavolomo qole ia iki zazu ne kaega kaki pata sakata mana valeke nae i za busi napua qole kakavata, valeke nae i vae tamana na busi.”

¹⁰ Gonae disipoloro ia iri sine ne ia, “Ṉalu igogo nae tamana na busi ne, i tora valeke mara kasi busi bana so.”

¹¹ Do Jesu ivataule ne qira, “Vari vatatana dena iki ke ria kaega osiqira basoero tarina lulua go, do i ke ria so basoero i vine bana qirae go God.

¹² Tanego go i topu zazao na de igo basoe iki mazala go kaega busi, tanego ṉalu iri podo me tokama qira i goto de igogo nae. Kakiaro basoero iriki busi kaega tanego basoero nae iri vasakate tokama qira. Mana kakiaro ria iriki busi kaega tanego iri zazu ne zazu ia God mana iri teke ne ia too ria go. Basoe i toqe ne pala na vari vatatana dena, mara lulua to.”

Jesu I Vatabo Qira Salero

¹³ Gonae kakiaro basoero iri lulu me qira salero suka ria de ikoego Jesu go tina taruze karisina kuzuku qira mana tina vatabo qira, do disipoloro ia iri sine vakaega ne qira basoero ne.

¹⁴ Do Jesu igo, “Kasi vakaega ne qira salero nae, lama na deqa koego era, tanego ka basoe i gere qira to salero suka dena, i tora go koe na Too ikoego vari miasoka ia God”.

¹⁵ Goto nae, isapu ze karisina kuzuku qira, salero ne mana taramuzina i zaza napu go.

Vari Vatatana Na Ko Vavagado

¹⁶ Kaki kameka valeke vavagado i lamae de ikoego Jesu mana ivane dena, “Valeke vari vatatana, ava pata velaka na tuna zazu nego go tuna toṉove go too iki rove go kaega lupo na?”

¹⁷ Gonae Jesu i vataule ne ia, igo, “Avigo tane qo tana zave go era sauna pata i velaka go? Tanuna so God i velaka go. Ṉalu qo soko go toṉove na too iki rove go kaega lupo, ono lulua Tamana.”

¹⁸ Valeke ne gonae i tana napu, “Ava Tamana na tane qo sine go?” Jesu ivataule, “Oniki vae vale basoe, oniki taunata, oniki siko, oniki poqe loborona varitanae,

¹⁹ vamazala qiru tamamu mana sinamu, mana ono mamaligara ne qira kero ne basoero, gere na qo mamaligara ne tanumu.”

²⁰ Valeke ne i vataule, “Osina seko Tamana nae era qa lulua, avana napu iara ko go, qara kaebo go lulu na?”

²¹ Gonae Jesu i sine ne ia, “Ṉalu qo soko go lete velaka, za mana volivoli ne osina pata qo toṉove go, mana teke ne qira vano situ volina patapata ro aro, goto nae aro tono pala too vavagadona tepa rani ne, mana aro ono lama mana lulua va era go.”

²² Ṉalu valeke gavere dena i gata seko nae, i lete maqata sakata, gonae i kasi ne Jesu, tanego i lete vavagado.

²³ Iago Jesu i sine ne qira disipoloro ia, “Ma sine ne qamu pata ogoto, tina lete makuru sivala ne qira vano iri vavagado go tarina keba za go Too ikoego vari miasoka ia God.

²⁴ Ma sine patu, napua kameka kamolo i makure tina surae go talopana nila sisira, do i lete makuru sivala to vano vavagado tarina keba za go Too ikoego vari miasoka ia God.”

²⁵ Ṉalu disipoloro ne iri gata seko ro de, iri lete poloso, iri go, “Ṉalu igogo nae, akena to tina za kavele go?”

²⁶ Do Jesu i reṉa totoloṉo ne qira, mana igo, “Basoero i makuru qira zazu ne na, do God i mazala zazu ne osina pata.”

²⁷ Gonae Pita i seko me, “Avigo remu, remu qi taru lupo osina patapata ro remu, mana qi lulu go aro. Avana to tina teke ne qemu go remu God?”

²⁸ Jesu i vataule ne qira, “Ma sine ne qamu pata ogoto, ṉalu God tina va voru lupo osina pata, era Tuna basoe tuna koloku e de koko batubatu ne mana vatovato e loborona karaputa ia God. Ṉalu nae ramu manoga karua qamu lulu ava go era, tamuna koloku napue de kolokoloku batubatu mana kenaqa ne qira manoga karua sinaqe na Izirel go.

²⁹ Mana osiqira ria iri kasi ne pade ria, togaqira ba vavaniqira, tamaqira, sinaqira, ba salero ria ba barue ro ria sauqu era, tarina pala vatopu napua kameka vasa sivala ne de iri kasi bana nego, mana tarina toṉove too iki rove go kaega lupo go.

³⁰ Do topu basoero iri kenaqa go ninidena tarina ra muzi, mana topu basoero iri muzi go ninidena, tarina ra za kenaqa go.”