Maka 6 - Vato Vari Vakameka Voru Ia Batu Ne

Vano Nazaret Iriki Soko Kaega Jesu

¹ Jesu i kasi ne komala nae iule za komala ogoto la tanuna, mana na disipoloro ia iri lulu ne go.

² Musaqara Sabat i vatatana qirae Pade Lotu ria vano Jiu mana topu basoero iri teṉoe go nae. Ṉalu iri gata go vari vatatana ia iri lete nureke sasakata. Iri varitanae tanuqira iri go, “Adepa tane i pala ze go ia pata ro dena? Akena tane i teke ne go ia tarove go i pala go dena? Mana avigo tane i zazu ne go ia pata vari vapoloso ro dena go?

³ Pata qata rove go ita, valeke dena i sale ia so valeke zazu vari kamana na so pata. I sale ia so Maria, mana i toga qira so Jemisi, Josepo, Jiudas mana Saimon go, mana vavanina ro go, iri koego dena.” Iago iri seko sila go.

⁴ Do Jesu i sine ne qira igo, “Basoe i propeta go, osina dia basoero ne iri lete vamazale, do vano na komala ia, mana vano na sinaqe ia, mana vanovano ogoto ia iriki soko kaega mana iri mia sila go.”

⁵ Iago Jesu iki zazu ne kaega kaki pata vari vapoloso komala ia, do kavia ria vano mokoso i sapu qirae karisina mana iri velaka go.

⁶ Jesu i lete nureke sasakata ne qira basoero ne, tanego i kaega ne qira to vaogoto.

Jesu Ituri Ne Qira Manoga Karua Disipoloro Ia

⁷ Jesu i koru qira manoga karua disipoloro ia mana iva zazao tara tararua qirae nogotona komakomala ro, mana ivane qira dena, “Qa teke ne qamu karaputa go tamuna kakale qirae go manuru sakata ro ne.”

⁸ Iva banabana qira igo, “Kasi pala na kaki pata ṉalu qamu zaza go, gerena bureri ba kurama ba kesa go, do pata qamu mazala go pala na moki sisikolu ramu.

⁹ Mana makebotu ramu, do kameka so roku tamuna vazao go.”

¹⁰ I sine napu ne qira igo, “Ka pade qamu za kebae go muna za koe go tina doka so ṉalu tamuna kasi ne go komala nae.

¹¹ Ṉalu qamu zae go kaki komala iriki soko qamu go kaega ba iriki soko go kaega gata na seko ro ramu, muna kasi ne komala nae mana tavore gausu na pua ikoego pola na make qamu, ianae i lalana to vabanabana raramu de iri koego!”

¹² Iago disipoloro ne iri zaza mana tamana qirae basoero ne seko ia God mana iri sine ne qira, muna nanao ule mana vana ne vasakata pataro ramu.

¹³ Iri kakale vakuziki ne qira manuru ro isiqana qira go basoero ne mana iri pala tala tabo iri qula qirae basoero mokoso, iri velaka go.

Iri Vae Vale Jon Na Bapitema

¹⁴ Ṉalu nae batu lavata Erode i gata pepeu na Jesu ni zadavae go osina dia, iago kakia ro basoe iri go, “Kadi go Jon na bapitema i too napu me bago. Iato go i pala karaputa go i zazu ne pata vari vapoloso ro dena, iri go.”

¹⁵ Kakia ro iri go, “Kadigo Ilaiza ba go.” Do kakia ro iri go, “Ianae i kaki kameka ria propeta ro ṉalu bana ne.”

¹⁶ Ṉalu Erode i gata go tarama ro ria basoero ne, igo dena, “Jon na bapitema qa kodaka bana go era kuzuku nane i too napu meto!”

¹⁷ Tanego Erode to dena tane i sine bana ne qira go ria tarina pala Jon mana taru zego bara ne. Erode i zazu ne pata dena tanego i sauna to Erodiasi qole i busia go, i qole bana ia Pilipi i kaena go.

¹⁸ Tanego Jon to i sine taru ne go Erode igo, “Iki totoloṉo kaega aro qo busia qole ia kaemu!”

¹⁹ Iato pata nae tane Erode i lete muma sasakata ne ze go Jon mana isoko go vae vale na ia, do i makure.

²⁰ Tanego Erode i sareki ne Jon, sauna Jon i valeke totoloṉo mana i valeke tabo. Iago, i miasoka velake so ia. Patavolomo i sine vokara ne go ia pata kebu ro i zazu ne go.

²¹ Do kaki kameka ṉalu dena to Erode i pala ṉalu velaka ia. Tanego ṉalu dena Erode i zazu ne kameka ṉaṉa lavata sauna musaqara podo ia. Iago Erode irave qira batu batu naro qauna, mana vano batu kenakenaqa ria vano na Qalili.

²² Sale qole ia Erodiasi iza keba me ṉalu ṉaṉa dena mana i lama veqa. Erode mana ria batu batu ro ne iri kula ṉalu iri mia go veqa na ia. Iago batu lavata Erode i sine ne sale qole ne, “Ava patana qo soko go toṉovena era qa mazala to teke nigo aro!”

²³ Erode i odoodo igo, “Qa odoodo go to dena, ṉalu aro qo soko go kaki pata, patavolomo kaki takoboro na pataro ikoego to van miasoka era, era qa mazala to teke nigo aro” ivane.

²⁴ Iago sale qole ne i siporo za peka ne i sine ne smana, “Ava kapata na to ma pene go era?” ivane sinana. Ia igo, “Era qa soko kuzuku na Jon na bapitema i vane.”

²⁵ Sale qole ne i katikili ule za pade ne, iza sine ne batu lavata ne, igo, “Era qa soko ono taru meze kuzuku na Jon na bapitema kameka ebata nini so dena!”

²⁶ Batu lavata ne i lete maqata sasakata ne sauna pata dena, do tanego i odoodo banae tarakenaqa qira basoero topu m rave qira go, iago i makure to tinara vae napua pata ni pene go sale qole ne.

²⁷ Iago Erode i tun ne kaki kameka soldia ia, go mara za pala me kuzuku na Jon igo. Valeke soldia ne izae loborona pade bara ne mana iza kodake kuzuku na Jon,

²⁸ mana itaru ze kameka ebata lavata, ipala me mana iteke ne sale qole ne, go iara za teke ne go sinana.

²⁹ Ṉalu na disipoloro ia Jon iri gata go pata idoka go, iri za pala tokamana Jon mana iri vovua.

Jesu Ivaṉaṉa Qira Lima Mao Valeke Ro

³⁰ Ṉalu ria apostoloro ne iri ule me iri sine lupo ne Jesu osina pataro iri za zazu nego, mana pataro iri vatatana qirae go basoero ne go.

³¹ Topu sasakata basoero iri lamae de ikoego Jesu, iago Jesu mana disipoloro ia ne ikaega ne qira to ṉalu go tarina ṉaṉa go. Iago Jesu i sine ne qira disipoloro ia, “Mata zaza kasi ne dena mana zako vamiki kaki dia go mata za ziṉo aqe tekere.”

³² Iago iri aqe vamikia kaki kameka koluka mana zaza gozato kaki dia ikaega go basoe na.

³³ Do basoero topu ne iri mia bana tasibaka qira ria, mana iri mia rove napu qira ria, iago iri kasine komala ro ria mana iri zaza maeke iri teteṉe mana za doka kenaqa banae de iri vele za koego Jesu mana disipoloro ia ne.

³⁴ Ṉalu Jesu i siporo kasi neme go koluka ne, i mia qira basoero topu dena i lete nanao qira, tanego iri gere sipi ro i kaega go kaki m miasoka qira go. Iago i vatatana qirae topu pata.

³⁵ I lete raravi zato, lago disipoloro ia ne in lama sine ne Jesu, “Dena i kaega ka basoe na,

³⁶ iago, turi vagado qira to basoero nae go mara ria za volia pata gege ria komakomala ro tarina go zago mana go tarina ge go.”

³⁷ Do Jesu i vane qira dena, “Ramu to tamuna teke ne qira go pata gege basoero dena.” Ria iri go, “Ava tatana gogo tatana vaṉaṉa qira go basoero dena, patavolomo karua vasa kesa tatana voli ze go bureri do tiniki tora qira kaega ge lupo na.”

³⁸ Jesu i tana ne qira, “Avavia bureri qamu pala go nae, za mia meto ramu?” Iri vataule, “Kalima bureri mana karua so iṉana.”

³⁹ Jesu i sine ne qira disipoloro ia, “Muna vota suasua qira basoero ne mana vakoloku qirae seuseu ne go.”

⁴⁰ Basoero ne in koloku tavotae to nogotona suasua, kaki suasua i kameka vasa, mana kaki suasua i neqo.

⁴¹ Gonae Jesu i pala kalima bureri mana karua iṉana ne ireṉa popoka aqe rani ne. I seko velaka zaqe God, ipasia bureri ne mana iteke ne qira disipoloro ia, go tarina kena kena ne qira go basoero ne, mana i kena napu ne qira basoero ne karua iṉana ne.

⁴² Osiqira basoero nae iri ṉaṉa mana kuma lupo to.

⁴³ Disipoloro ne iri pala teṉo qira to de iko sivala go bureri mana iṉana ne, iri vapurake manoga karua ebata.

⁴⁴ Topu qira valeke ro iri ṉaṉa go nae kalima mao ria.

Jesu I Zazae Popokona Masi Ne

⁴⁵ Taramuzina nae Jesu iva age qira disipoloro ia koluka go mara ria za kenaqe kene kava ne masi pipika ne igo. Do tanuna mara vazazao qira tekere basoero igo.

⁴⁶ Ṉalu i vatarutaru lupo qira to basoero ne i popoka za kameka kubolo mana iza pene.

⁴⁷ I tupito rodoko, mana koluka ne idokae to vari loborina masi pipika. Pasi nae Jesu iara za komeso kubolo iza koe go.

⁴⁸ Kaki dia torana to kapisa ba kaonomo koloko sarusaruku lolotoro Jesu i mia qira disipoloro ne iri valua sota go sokoro ni sota go koluka ne. Jesu gonae i zazae popokona masi ne mana i vele lama zaza sivala qira.

⁴⁹ Do ṉalu iri mia i zazae go ia popokona masi ne, iri go, “Manuru!”

⁵⁰ Pasi nae iri lete sareki sasakata. Do Jesu i seko me igo, “Era so dena! Kasi sareki.”

⁵¹ Gonae Jesu i lama age tavisi qirae koluka ne, mana sokoro ne i mamanava to. Do ria disipoloro ne iri lete nureke sasakata.

⁵² Tanego iri ara kaebo so nanao rove na ria tane talukasana pata vari vapoloso ni vaṉaṉa qirae go lima mao valeke ro kalima minena bureri. Tanego nanao qira iara kokoqu so.

Jesu Iva Velaka Qira Vano Mokoso Na Genesaret

⁵³ Iri kava to kene kavana masi pipika ne mana za vosore to de iri vitoṉo ze Genesaret mana nae to iri doki taruze go koluka ria ne.

⁵⁴ Ṉalu iri kasi ne go ria koluka ne, basoero na nae iri mia rove Jesu.

⁵⁵ Iago iri teteṉe zato osina dia kena ro nae iri vazazao to taramana Jesu. Ṉalu iri gata de iza koego, iri pala vazao basoero ria iri mokoso kekele go vesu ro ria.

⁵⁶ Osina dia i zae go Jesu, komala sukasuka ro mana komala lavata ro ba ka rikirikisi go ni zae go to ia, basoero ne tarina pala bana meso vano mokoso ro iri kekele go vesu ro ria, mana iri lama pene ia go mara vamao ne qira sibana roku loda ia ne iri go. Ṉalu iri siba go osiqira iri velaka lupo so go.