Maka 1 - Vato Vari Vakameka Voru Ia Batu Ne

Tamana Ia Jon Na Bapitema

¹ Iato dena vatupiana na Tarama Velaka sauna Jesu Kristo Tuna God,

² I karo bana go propeta Isaia, “God igo, ‘Era tuna turi vazao basoe tina pala tarama era kenaqa nigo aro go tina za vanama nigo aro zuka.’

³ Kameka basoe ikoru valavata me sasaniqa ikaega go pata podopodo lavatana igo dena, ‘Muna vanama ne zuka ia Batu ne, mana vatotoloṉe zuka ia go tina goe go!’ ”

⁴ Iago Jon isadaka me sasaniga ikaega go pata podopodo lavatana ne, mana ilama vari va bapitema mana i tamana qira basoe ro ne igo dena, “Ramu muna nanao ule mana vana ne vasakata pata ro ramu mana lama bapitema go.”

⁵ Topu ria basoero iri za reqeme kena Judia mana komala Jerusalema iri lama mana gata tarama ia Jon. Basoero ne iri sine vasadake to vasakata pataro ria mana Jon i bapitema qirae besi uguru Jodan.

⁶ Roku i vakeba nego Jon iri zazu ne ze so uguruna kamolo, beloto ia iri zazu ne ze kapoto na buluka, mana pata gege ia ige go ne nopi mana biuma piru go.

⁷ Jon i sine vasadaka ne qira basoero ne igo, “Kameka basoe tina lama muziqu era, i basoe mazala sivala nava era. Patavolomo, era iki torava kaega tuna tudu mana lukase go qolona makebotu ia ne.

⁸ Era qa bapitema qamue so ramu miki besi, do ia tina bapitema qamue ramu Spirit tabo.”

Jon I Bapitema Jesu

⁹ Iki umata kaega taramuzina nae, Jesu i reqeme Nazaret loborona kena Qalili mana Jon i bapitema ze ia besi uguru na Jodan.

¹⁰ Ṉalu Jesu ikasi ne, me so lokana besi ne, i mia rani ne ipapaqa mana Spirit tabo iqoqoro me de ikoego ia igere kurukuru ne.

¹¹ Kameka ovaṉa iseko me rani ne igo dena, “Aro to qo Sale ogoto era mana era qa lete kula nigo aro.”

Satana Ipada Ne Jesu

¹² Taramuzina so nae, Spirit tabo i kenaqa ne Jesu iva zao ze ia sasaniqa ikaega go pata podopodo lavata na ne.

¹³ De iza koego ne, iri koe pata piru ro. Jesu iza koe de igogo ne torana vasiṉaulu musaqara mana Satana ilama padane ia, do aqeloro ne iri lama tavisi ne ia.

Jesu Ikoru Qira Kavasi Basoero Iri Vaevae Iṉana

¹⁴ Taramuzina iri taruze go Jon bara ne. Jesu izae Qalili mana i tamana ne Tarama Velaka ia God.

¹⁵ Igo dena, “I lama doka to ṉalu Too ikoego vari miasoka ia God ilama ko garogaro to! Muna nanao ule mana vana ne vasakata pata ro ramu mana vaogote Tarama Velaka!”

¹⁶ Ṉalu izazae go rikisina masi pipika na Qalili, i mia qiru tamakena Saimon mana Aduru, zazu riru to gabegabe na iṉana.

¹⁷ Gonae Jesu i sine ne qiru, “Lama lulua va era mana era tuna vatatana qaburue de igogo palana basoe.”

¹⁸ Iru vana ne to gabe riru mana iru lulua to Jesu go.

¹⁹ Gonae Jesu izaza napu mana i mia qiru tamakena Jemisi mana Jon karua sale ia Zebedi, iru kolokue loborona koluka ne mana iru va velake gabe riru.

²⁰ Ṉalu Jesu i lamae de iru koego, ia ikoru napu qiru. Pasi so nae riru ne iru kasi ne zeto tamaqiru koluka ne mana ria napu to vano zazu ro ria go, mana iru lulua to Jesu.

Valeke I Siqane Manuru Sakata

²¹ Jesu mana disipoloro ia iri lamae komala lavata Kapanaum. Musaqara bakubaku na ne i ṉalu Sabat, iago Jesu izae Pade Lotu ria vana Jiu mana iza vari vatatana.

²² Basoero iri teṉoe gonae iri gata seko ro ia iri lete nureke ne to de igogo vari vatatana ia, ni lulua mazala mana iki gere kaega vari vatatana ria vano vari vatatana na Tamana ne.

²³ Kaki kameka valeke i siqane manuru sakata iko tavise loborona Pade Lotu nae i seko valavata me igo.

²⁴ “Ava patana tane qo soko qemue go remu Jesu na Nazaret? Era qa rove go aro qo kameka valeke Tabo ia God!”

²⁵ Jesu i seko lavate manuru ne, igo, “Kasi seko, do aro mo kasi ne valeke nae!”

²⁶ Manuru sakata ne ilete va nenedere tokamana valeke mana iva koru valavate ia mana iara siporo kasi nego valeke ne!”

²⁷ Basoero ne iri lete nureke sasakata mana iri vari sine ne tanuqira, “Kaki vari vatatana voru ba go ta dena? Tanego seko ia do, imazala mana igerena pata ilulua karaputa, patavolomo manuru sakata ro ne do, i karalapasa qira so ia siporo so iri go.”

²⁸ Gonae tarama na Jesu i katikili zadava lupoe so kena na Qalili.

Jesu Ivatavoesi Qira Basoero Iri Mokoso Go

²⁹ Ṉalu Jesu i siporo kasi ne Pade Lotu ne, izae pade ia Saimon mana Aduru. Jemisi mana Jon iru lulu napua so ia.

³⁰ Ṉalu Jesu iza dokae pade ne iri sine ne ia, ravana qole Saimon imokoso poloqotoro ikekele vesu ne iri vane.

³¹ Iago iza toqo vadegere mana mokoso ne kasi ne ia. Pasi iza degere me, izazu vanama ne qira ria pata gege.

³² Raravina tarakenaqana go iara zunu go sana, basoero ne iri pala me qira vano iri mokoso mana vano i siqana qira go manuru sakata ro ne de ikoego Jesu.

³³ Osiqira basoero na komala lavata nae iri lama teṉoe tarakenaqana pade nae, mana

³⁴ Jesu iva velaka lupo qira vano ipala qira go soso mokoso rone mana ikakale vakuziki ne qira manuru sakata ro i siqana qira go basoero ne. Do iki vamao qira kaega manuru sakata rone tarina seko go.

Jesu I Tamanae Qalili

³⁵ Iara tavuara me ia Jesu i kasi ne pade ne mana i zae kaki dia ikoe kaega basoe mana i za pene.

³⁶ Gonae Saimon mana ria vakitaka ro ia ne iri za taqia ia.

³⁷ Ṉalu iri za soba ia iri sine ne, “Basoero ne iri taqi go aro iri vane.”

³⁸ Do Jesu ivataule ne qira igo, “Ita mata za napue kero ne komala ro iri koego rikisi ro dena. Era tuna za tamana napu qirae so ria seko ia God. Tanego iato nae pata qa lama nego era.”

³⁹ Iago, i zaza gozato osina dia komala ro iri koe go liqutu na Qalili. Jesu itamanae to loborona Pade Lotu ro ria mana ikakale vakuziki ne qira manuru sakata ro i siqana qira go basoero ne go.

Jesu Iva Velake Valeke Ipala Voremake

⁴⁰ Kaki kameka ṉalu kameka valeke ipala mokoso voremake iza lama koloku tutuṉue de ikoe Jesu mana ipene ze ia tavisi, igo. “Ke ṉalu aro qo soko go, qo mazala to va velaka va.”

⁴¹ Jesu ilete nanao valeke ne, gonae i kazara ne karisina mana i siba zaqe valeke ne igo, “Qa toqe ne ono velaka to aro.”

⁴² Pasi so nae voremake ne i kasi ne to valeke ne.

⁴³ Gonae Jesu i sine vakaraputa ne valeke ne, ituri vazao,

⁴⁴ mana ivane dena, “Oniki pepeu ne kaki basoe de go qo velaka go. Do ono za totoloṉe so de ikoe patere, mana iato tina toeri go aro. Taramuzina to nae ono ara zazu ne go sosovolomo i sine bana go Mosese, go basoero ne tarina vaogote aro qo velaka.”

⁴⁵ Do valeke ne iza tarama ze osina dia igoe go, iago sauna to ianae i makure Jesu za sadaka na komala ro iri koego basoero topu ne. Iago Jesu ikoe so de iriki koego kaega basoero ne. Do basoero ne ara lama mia so iri go.