Luka 12 - Vato Vari Vakameka Voru Ia Batu Ne

Seko Va Bana Bana De Koe Vano Poqe Poqe

¹ Kaki kameka ṉalu, mau na basoero iri lama teṉo, mana basoero ne iri vari kubekube dakiri go. Jesu i sine kenaqa ne qira disipoloro ia, “Muna miasoka seko poqepoqe ro ria vano Parisio, iri gere go isti, iri zazu ne go tatakiu.

² Osina pataro iri sapua go, tariniki pipika kaega mana pataro iri sine pika go, tinara sadaka va velaka me.

³ Iago, pata qamu sine pika go kuse, tina gata ṉalu musaqara, mana pataro qamu vari gozogozo ne ze go qeqele qamu loborona kova ne, tinara lama sine valavata ze zakazaka na pade ne.”

Akena Muna Sareki Ne Go

⁴ Jesu igo, “Ramu vakitaka ro era, masine ne qamu, muniki sareki ne qira basoero iri mazala go vae vale na tokama qamu, do taramuzina iriki mazala kaega lete vasakata qamu.

⁵ Era mava mia qamu ramu ia tamuna sareki nego. Muna sareki ne God tina vae vale qamue nako ne! Qa sine ne qamu muna sareki ne ia!

⁶ Karua peni iri mazala voli ze kalima tunana pale. Do i kaega so kaki kameka ria pale ro dena God i nanao kasupe ne go.

⁷ Qamu rove, pata volomo osina uquru ikoego kuzuku qamu, God i qana lupo bana, iago muniki sareki tanego ramu qamu lete sivala ne qira pale ro nae.”

Toqe Ne Mana Kasia Kristo

⁸ Jesu i sine napu ne qira, “Ma sine ne qamu, ka basoe i sine vasadaka ze de iri koego basoero topu, igo i ke rera, era Tuna basoe na vagere napu ze so ia, de iri koego aqelo ro ia God.

⁹ Ba ṉalu kaki basoe igo, iki basoe rera kaega, mana i sine ze tarakenaqa qira basoero gogo ne, era Tuna basoe do, tuna sine napu ze tarakenaqa qira aqelo ro ia God, ia iki basoe rera kaega.

¹⁰ Mana ṉalu ka basoe i seko sakata va go era Tuna basoe, God tina nanao ule ne ia. Do ṉalu ka basoe i seko sakate go Spirit tabo, God tiniki nanao ule ne kaega.

¹¹ Ṉalu iri pala vazao qamue loborona Pade Lotu, tarakenaqa qira batu na Pade Lotu, ne mana de iri koego vano qavuna ba vano kena kenaqa ro gogo ne, muniki maqata mana sareki ne sauna kapata tamuna sine go, go tina bara ne qamu go.

¹² Tanego Spirit tabo tina va rove qamue go pata tamuna sine go ṉalu nae.”

Vapadapada Na Valeke Vavagado

¹³ Loborona teṉo iri vae go, kaki kameka valeke i vane dena Jesu, “Valeke vari vatatana, mo sine ne aro togaqu go mara kena tavisi nava pata vavagado i taru ne qaru go tamaqaru i le go.”

¹⁴ Jesu i vataule igo, “Valeke, akena tane i teke nava era mazala go tuna vine go, ba kena ne qaburu go pata vavagado raraburu na?”

¹⁵ Gonae i sine ne qira, “Muna miasoka ze de qamu koe sauna palana topuna pata. Tanego too ogoto ia basoe iki lulua kaega pataro i toṉove go. Pata volomo i toṉove go topuna pata.”

¹⁶ Gonae Jesu i sine ne qira va padapada dena, “Kaki kameka valeke vavagado iko ne pua velaka, mana i podo velake pata lebaleba ro ia, mana iri ure velaka.

¹⁷ Gonae iko i nanao zaqe, ‘Avana to tuna zazu nego era. Pade era iki tora to kaega taru lupo zena pata gege na barue era, igo.

¹⁸ Iato dena pata ma zazu nego era, i vane tanuna. Era ma pabale pade bana ro era, mana zazu ne pade lavata, go tuna taru lupo ze go pata gege na barue, mana kero ne na patapata ro era go.

¹⁹ Mana ṉara sine nava tanuqu. Kula valeke qo tonovo lupo pata velaka ro tina tavisi nigo topuna ave. Iago tunara ko velaka ṉaṉa, qe loka mana ko kulakula.’

²⁰ Do God i sine ne ia, ‘Aro qo valeke bulaṉoi, kuse ninidena to era tuna pala go too aro. Iago akena tina pala go pataro qo toṉove go nae?’ ”

²¹ Mana valupo lupona Jesu igo, “Iato nae de tina gogo basoe i teṉo ne go vavagado ia tanuna. Do tepa ia God, i kaega neso kaki vavagado ia.”

Ruqe God

²² Gonae Jesu i vane qira dena disipoloro ia, “Igo nae ia tanego qa sine ne qamu. Muniki lete nanao vokara ne pata gege go tamuna too nego, ba sauna poga tamuna vabaribari ze go tokama qamu.

²³ Tanego too i lete sivala ne pata gege, mana tokama i lete sivala ne poga.

²⁴ Mia qira pale ro iriki zazu barue kaega, ba za pala me ze na pata gege barue. Mana i kaega ne qira pade go tarina taru ze go pata gege. Do God i puara qira, ba ramu go qamu lete sivala ne qira pale ro ne.

²⁵ Avigo kakia ramu qamu mazala vaziki va loda too ramu go qamu lete nanao vokara nego ba?

²⁶ Ṉalu i makuru go zazu ne na pata suka ro igogo nae, avigo tane qamu lete nanao vokara nego kero ne pataro na?

²⁷ Mia qira bubuli piru ro iri podo go. Iriki zazu kaega ba zazu ne na kaega baribari ria tanuqira, do masine qamu. Bubuliro nae iri lete menomeno sivala ne Solomon i lete vavagado ivakeba nego roku menomeno ro ia.

²⁸ God iva baribari qira go seuseu piru iri ko ninidena mana za kaega so bakubaku, iri subi qira aqe puluma na nako ne. Iago qamu nanao God tiniki va baribari qamu kaega? I lete suka so vaogoto ramu.

²⁹ Iago kasi nanao vokara ne na pata tamuna ge mana besia go.

³⁰ Tanego vano rodoko na vudu pua tane iri lete nanao vokara nego pataro dena. Do Tamaqamu i rove bana, ramu qamu soko go pataro dena.

³¹ Do ramu muna nanao kenaqa zaqe Too ikoego vari miasoka ia God. Mana ia tina teke ne qamu osina pataro qamu soko go.”

Vavagado Na Rani Ne

³² Jesu igo, “Muniki sareki sinaqe suka. Tamaqamu i lete soko qamue de ikoego vari miasoka ia.

³³ Volivoli ne osina patapata ro ramu, mana teke ne qira kesa na vano iri situ go. Pala tanuqamu pata tarutaru kesa iki rove go kaega taridaka, mana babana ze vavagado ramu rani ne, de iki mazala go kaega za qoqoro. Tanego i kaega ka basoe sikosiko tina pala go mana kokorosi tina va sakate go.

³⁴ Tanego puṉumu tina ko tarue de ikoego vavagado aro.”

Vano Zazu Iri Vanama Taru

³⁵ Jesu i sine napu ne qira, “Muna vanama taru ne sauna pataro tina lama go. Vanadua baribari ramu, mana vakamua pazi ro ramu.

³⁶ Gerena vano zazu iri piri ne go batu ria ni ule mego ṉaṉa vari vabusi ne. Ṉalu i ule mego i lama kekeqere ria iri katikili papaqa siporaṉa ne.

³⁷ Vano zazu ne iri lete kula ṉalu batu ria i lama mia qira go, iri dogara mana vanama taru ne ule na ia. Ma sine ne qamu pata ogoto, ia tina ozuke roku ia mana va koloku qira ria mana tina zazu ne qira.

³⁸ Avana to ka kula qira ṉalu i soba qira iri vanama go. Pata volomo loboro kuse ba ava ka torana tina lama go.

³⁹ Mana ramu qamu mazala nanao rove na. Ṉalu valeke i toṉove go pade ia i rove bana torana valeke sikosiko tina lama kebae go pade ia. Ia tiniki mazala kaega va malumu nego pade ia tina lama keba ego.

⁴⁰ Mana ramu napu muna vanama osina ṉalu. Tanego qamuki rove kaega, ṉalu era Tuna basoe tuna lama go.”

Valeke Zazu Velaka Mana Valeke Zazu Sakata

⁴¹ Pita igo, “Batu, avigo va padapada dena remu so tane qo sine ne qemu go ba i sauna to osina basoero?”

⁴² Batu ne igo, “Akena to i valeke zazu vavaogoto mana i tarove go? Iato valeke iva kenaqe go batu ia tina miasoka go pade ia, mana tina kena ne qira go vano zazu ia pata gege ṉalu igado ule mego komala ia.

⁴³ Avana to ka kula ia valeke zazu ne, ṉalu batu ia i lama mia ia, i zazu ne osina patapataro ia.

⁴⁴ Masine ne qamu pata ogoto valeke batu ne tina vamiasoka ze valeke nae osina patapata ro ia.

⁴⁵ Do ṉalu valeke zazu nae igo, Batu ne tina lete umata ia tinara ule mego igo, gonae i tupia sima qira kero ne vano zazu, osiqira valeke ro mana qolero mana ia ige loka bulaṉoi go.

⁴⁶ Iara go so nae ia, batu ia tina ule me kaki kameka ṉalu, basoe zazu ia iki vanama ne kaega mana iki rove kaega ṉalu na go, batu ia tina va lepulepua ia mana vagere ze ia de ivane qira go vano legulegu.

⁴⁷ Valeke zazu i rove go pata i soko go batu ia tina zazu nego, do iki zazu ne kaega gogo ne, ia tarina lete sima va vokare. Ka basoe iri teke vatopu nego, iri lete pene va topu ze ia.

⁴⁸ Do valeke zazu iki rove go kaega pata i soko go batu ia tina zazu nego, do i zazu ne pata i tora go, go tina sima ze gogo ne, ia tina va kimate mana sima va suka so go. Ka basoe iri teke vatopu nego, iri lete pene va topu napu ze ia.”

Jesu I Vota Qira Basoero Ne

⁴⁹ Jesu i sine napua, “Era qa lamae pua dena go mava qoqoro me nako go mara subi to ninidena.

⁵⁰ Do kameka bapitema iara ko nava tuna toṉove go. Makuru tina sapuava go i gere loka i sapua go basoe ṉalu i suala zunu nego bapitema. Mana makuru nae iara kaebo sivale na deqa koego mana puṉuqu i lete maqata sasakata.

⁵¹ Avigo qamu nanao era qa lama go nava ko bule qira basoero na kolabana pua dena? Kaega, bule kaega, do tuna vota qira basoero.

⁵² Tupi ninidena, pera tina koe tatamana, tarapisa ria tarina pera qiru karua ne, mana tararua ne tiruna pera qira ria tarapisa ne.

⁵³ Tamana sale tina pera sale ia, mana sale ne tina pera tamana. Sinana sale qole tina pera sale qole ia, mana sale qole ne tina pera sinana go. Sinana sale valeke ne, tina pera qole ia sale valeke ia, mana qole ia sale valeke ne, tina pera maqota ravana go.”

Basoero Mara Mia Rove Lala Ro Tina Sadaka Me

⁵⁴ Jesu i sine napu ne qira basoero ne, “Ṉalu qamu mia tuqi i reqe me tepa zunu na sana, ramu tamuna katikili so sine na o, tina nare to.

⁵⁵ Mana ṉalu seva i kikiuru go me tepa saot, ramu qamu go tina lete uraka, mana i uraka to musaqara nae.

⁵⁶ Qamu vano bulaṉoi! Qamu mia rove ramu tane pata na ro vudu pua dena mana tepa zakazaka go, mana qamu mazala sine na de tina go. Do avigo tane qamuki mia rove go kaega pata i ko go ninidena?”

Zazu Ne Bule De Koe Kana Ramu

⁵⁷ Jesu igo, “Avigo tane qamuki vine go kaega tanuqamu zazu totoloṉo tamu zazu ne go?

⁵⁸ Ṉalu kaki basoe i pala goe varitanae, ono lete pada ne miana basoe nae go maburu vatotoloṉe torana qaburu ara kaebo zae na varitanae. Ṉalu qoki pada ne kaega vatotoloṉo katikili na, basoe nae tina vazao goe aro varitanae, mana tarina vazao ge aro de iri koego vano pulisi, mana tarina taru goe bara ne.

⁵⁹ Masine, nigo, tono za koego bara ne, tina makuri go siporo, go tina doka so ṉalu tono vazao lupo kesa i ko nigo, voli na lepulepu qo vaego.”