Kolosia 3 - Vato Vari Vakameka Voru Ia Batu Ne

¹ Ramu qamu too tavise Kristo tepa le, iago ramu tamuna zazu vokara go tamuna pala pata ikoego rani ne, de go Kristo i koloku e de kolokoloku ia tepa karisi matauna God.

² Soti vanadu ze nanao qamu pata ro ikoego rani ne, kasi taru ze nanao qamu pata naro vudu pua dena.

³ Tanego qamu le bana, mana too ogoto iko pipika tavise Kristo ikoe de ikoe go God.

⁴ Too ogoto ramu to Kristo, mana ṉalu tina lama sadaka, ramu napu tamuna sadaka tavise ia mana tamuna pala tavise tatavata mazala ia.

Too Bana Mana Too Voru

⁵ Muna vae vale too ba vatovato na pua dena ni zazu e loboro qamu, gere vari vagabu sakata de koe kene basoe, ba zazu ogoto ne pata sakata de koe kene basoe, nanao ba soko na zazu sakata, mana kasi qora ne patapata ia kene basoe, tanego i gere ṉalu qamu vazaka go beku.

⁶ Tanego sauna to pataro igogo ne, muma ia God tina lama e, de iri koego ria iriki vaogote go kaega ia.

⁷ De bana ne, ramu to tane qamu lulua go too, ba vatovato igogo ne ṉalu ria iri kenaqa ne vatovato na too ramu.

⁸ Do ninidena muna pala vakuziki ne osina pataro dena, muma, nanao vari va sasakatae. Kasi seko vasakate na kene basoe, ba kasi va siporo ze saqe mu seko ni damu go.

⁹ Kasi poqe ne kene basoe, tanego ramu qamu vana bana ne to, too bana ramu, mana vatovato bana ramu go,

¹⁰ mana qamu pala too voru. Ramu qamu basoe vorue de koe God mana i vatatana qamu, go tamuna rove velake tanuna i va voru taru qamu, go tamuna ko gere tanuna.

¹¹ Sauna to ianae, i kaega so kapata iri vari vakakavatae ne vano Jiu ba vano iriki Jiu go kaega, vano iri kosi ba vano iriki kosi go kaega, vano iri pala vari vatatana ba iri ko piru, vano iri seka ba vano iri ko talukasa go. Tanego Kristo i sapu lupo qira mana Kristo i koe loboro qira, iago osiqira iri kameka basoe lupo so.

¹² Ramu qamu basobasoero ia God, i mamaligara ne qamu mana i vine qamu tamuna ke ia tanuna. Iago vakeba ze too ramu, vari vatatavisi, dego va velaka ne na kene basoe, vaqoqoro na too ramu, vamanakamana basoe mana va totoloṉe basoe i zaza kakavata go, va losia nanao qamu, kasi muma katikili go.

¹³ Vari va nanao ule ne qiru ṉalu kaki karua basoe iru vari vasasakatae, mana ṉalu kake raburu qaburu vari va legu, buruna vari va nanao ule, gere Batu ne i nanao ule nigo.

¹⁴ Mana de go zazu na osina pataro dena muna vasadake mamaligara, iato i qolo vari palu ne qira, mana vakameka velaka ne qira osina pataro dena go.

¹⁵ Bule i teke qamu go Kristo, i bara ne qamu e vivine ro ramu, tanego sauna to bule dena God i koru teṉo qamue loborona kameka tokama. Iago osina ṉalu muna seko velaka ne God.

¹⁶ Topu vavagado velaka ikoego Tarama Velaka ia Kristo, muna soti ze puṉuqamu. Vari vatatana mana vari vagata ne osina to tarove ia. Vazaka ze God nanao qamu, vae ne kera na Buka tabo, kera lotu i reqeme de ikoego Spirit tabo mana seko velaka ne God loborona puṉuqamu.

¹⁷ Osina pata qamu zazu ne ba sine gogo ne, mara zazu ne ze loborona vitoṉo na Batu ita Jesu, ṉalu qata seko velake ia de koe God Tamaqita.

Too Ria Vano Busi

¹⁸ Qolero busi, ramu qamu vano lotu, iago muna ruqe qira valeke ro ramu.

¹⁹ Valeke ro busi, muna mamaligara ne qira qolero ramu mana kasi seko lavata qira.

²⁰ Ramu salero, i zazu ramu loborona too Lotu, muna lulua pata iri soko go vanovano ramu, tanego vatovato igogo ne iva kula go God.

²¹ Ramu vanovano ria salero, kasi va muma qira salero ramu tanego iara kaebo nadu ena kameka dia nanao qira.

Too Ria Vano Zazu Mana Batu Ro Ria Go

²² Vano zazu muna osaka ne qira batu ro ramu loborona zazu ramu osina ṉalu muniki osaka ne qira so ṉalu batu ramu iri lama reṉareṉa, go tarina kula ne qamu go. Do muna zazu valulu ze nanao velaka ramu, tanego qamu sareki ne Batu ne.

²³ Ava ka zazu na qamu zazu ne, zazu va velaka ne, tanego ramu qamuki zazu ne kaega basoe, do qamu zazu ne Batu ne.

²⁴ Nanao tarua, Batu ne tina teke ne qamu voli, i soti ne qira go basoero ia, tanego Kristo i Batu ramu, mana ramu qamu vano zazu ia.

²⁵ Mana vano iri zazu ne vatovato sakata, tarina pala napua so volina dego vatovato sakata ro ria, tanego God loborona vivine ia, i vari pada ne so osina pata.