Kolosia 2 - Vato Vari Vakameka Voru Ia Batu Ne

¹ Era qa soko sine ne qamu de go zazu vokara ro era sauqamu ramu, mana basoero na Laodisia, mana osiqira ria kero ne iriki rove velake kaega too era.

² Qa zazu ne iadena go tina ko ne qamu karaputa mana vari kameka loborona vari mamaligarae, sauna pataro dena ramu tina ko ne qamu nanao nadu, mana tamuna rove va velake, loborona to zuka dena ramu tamuna rove pata i pika go God, iato Kristo tanuna.

³ Kristo i mazala go papaqana vavagado ogoto ia God ni ko pipika go, iato vavagado na tarove mana rove na God go.

⁴ Ma sine ne qamu, kasi vamalumu ne na kaki basoe go mara va bulaṉoi qamue e seko poqepoqe ro.

⁵ Tanego patavolomo era qalu ko tavisi qamu go kaega, do loborona nanaoqu i ko tavisi qamu, mana era qa kula ṉalu qa gata ramu qamu ko vanadue, mana degere vanadu loborona vaogoto ramu de ikoego Kristo.

Tutukunu Na Too Loborona Kristo

⁶ Pasi qamu toqe bana ne go Jesu Kristo gerena Batu ramu, koe loborona vari vakameka ia.

⁷ Vanadu ze too ramu de ikoego ia, zazu vanaduze pade ramu de i koego ia, mana vamoqere vaogoto ramu, gerena iri vatatana bana qamue go, mana osina ṉalu muna seko velake ia.

⁸ Iago muna miasoka tanuqamu, go tariniki va seka qamue kaega tarove volomo na vudu pua dena, i reqe me vari vatatana ria basoero iri pepeu vari soma me, i lulua go tarove na pua dena, iki reqe me kaega Kristo.

⁹ Tanego Kristo i lama basoe gere qita so ita, mana too ia God i koe de ikoego ia, ko i vae go vudu pua dena,

¹⁰ mana ramu qamu pala bana tutukunu na too loborona vari vakameka de koe ia. Iato i ko mazala sivala ne qira aqeloro mana osiqira ke ro ne vano karaputa ro mana iato i Batu sivala ne qira osiqira.

¹¹ Loborona vari vakameka ramu de koe Kristo ramu qamu kosi bana to, vari kosi ia kaega basoe, do vari kosi i zazu ne Kristo, i vakavele ze basoe loborona karaputa ia pata ikoego tokamaqita i mazala go vazao qita vasakata pata.

¹² Tanego ṉalu qamu bapitema, ramu qamu vou palua Kristo, mana loborona bapitema qamu too palu napua Kristo, loborona vaogoto ramu de koe zazu mana karaputa ia God, i vatoo ze go Kristo tepa ia le ne.

¹³ De bana ne gerena pata qamu qamu le, tanego sauna vasakata pata ro ramu, tanego ramu qamuki vano Jiu kaega mana i kaega ne qamu tamana go. Do God i pala valame qamue too loborono Kristo. God i nanao ule ne osina vasakata pata ro ita.

¹⁴ I qusa vakuziki lupo ne osina zukazukana tamana i va qoqoro qita go, i va lupo ze osina tamana ro dena, ṉalu Jesu ile go koluse ne.

¹⁵ Mana koluse nae ne, Kristo i lukasa ze tanuna de koe karaputa ro ria vano lavata ro mana vano kena kenaqa ro ia Satana. Ia i va agava qira e ria tarakenaqa qira basoero ne ṉalu i vaqoqoro qira go.

¹⁶ Iago kaega ka basoe mara vadegere go tamana na gena pata gege, loka, musaqara tabo. Kelo na lama na inaqa voru ba sauna Sabat go.

¹⁷ Osina pataro igogo, i dudulena so pataro tinara za lama ṉalu muzi, ba Kristo i pata ogoto.

¹⁸ Kakiaro basoero iri vazakanapu ne pataro iri mia ze go loborona pata vavagazama, i sadaka qira iri vatatana qirae basoero tarina vaqoqore tanuqira mana vazaka qira aqeloro ne, iri go. Kasi toqe ne na basoe go tina vatovato nigo. Nanao na basoe igogo nae, i vazakanapu neso pata na vudu pua dena.

¹⁹ Basoe nae iki pala taru vanadu e kaega de koe Kristo, ia to i kuzukuna go tokama qita, Mana kuzuku nae to i va karaputa go tokama ne go tina podo vamoqere go vari soma na de i koe uri ro mana rota ro go, go tokama ne tina podo, gere so de i soko go God.

Le Mana Too Tavisi E Kristo

²⁰ Ramu qamu le tavise Kristo, mana qamu talupasae karaputa ia Spirit na vudu pua dena. “Avigo tane qamu ko gere go basoe na vudu pua de? Avigo tane qamu vaogote go tamana i sine go.

²¹ ‘Kasi vazazu na pata de, Kasi ge pada na pata gege nae,” ba, “Kasi siba na kero ne pata gege go.’ ”

²² Osina pata ro dena, ṉalu basoe i vazazu lupo, i patavolomo so, i kaega so ka mazala na. Tamana ro mana vari vatatana ro dena ne, basoe so i zazu ne go.

²³ Iogoto, tamana ro dena iri va tutubele qita e ita tatana vazaka qira aqelo ro, mana vaqoqore tanuqita, mana iri va vokare tokamaqita. Iago ita qata nanao tamana ro dena i ko nanao velaka na, do kaega kaki tamana gerena iadena i mazala tavisi ne va noto na nanao sakata ro ita.