Karua Timoti 3 - Vato Vari Vakameka Voru Ia Batu Ne

Musaqara Muzimuzi

¹ Ono rove bana, topuna pata makuru ro tina lama sadaka ṉalu musaqara muzimuzi.

² Basoero ne tarina nanao so tanuqira mana tarina soko topuna kesa go. Tarina vazakanapu mana kuzuku lavata go. Tarina seko sakata qira basoero mana tarina legulegue de iri koego vanovano ria go. Tariniki sine kaega seko velaka mana tariniki nanao soba kaega God go.

³ Tina kaega ne qira vari mamaligarae, mana tina makuru qira vari nanao ule go. Tarina pepeu poqe ne qira basoero ne, tarina soko varitara mana tarina poro vae vato go. Pataro i velaka go, tariniki ara soko to kaega.

⁴ Tarina vasasakata ne vakitaka ro ria, mana tariniki vakapata so kaega basoe ne, mana tarina tabo qoqoro go. Iri soko so zazu ne na topuna pata go tarina kula ne tanuqira, do iriki mamaligara ne kaega God.

⁵ Tarina gere qira vano lotu, do iriki soko kaega karaputa ia God tina kenaqa ne too ria. Aro ne, oniki tavisi too igogo nae.

⁶ Kakiaro valeke ro iri kebae pade ro mana iri poqe qira qolero, iki nadu go kaega vaogoto ria, mana iri ara agava ne so vasakata pataro iri zazu bana nego. Qolero iri lulua go seko sakataro ne,

⁷ iri pada ne mara ria rove topuna pata iri go, do i makuru qira tarina lama rove seko ogoto ne.

⁸ Valekero iri zazu nego ia igogo ne de iri koego qolero ne, iriki soko kaega luluna seko ogoto ne, gere qiru Janis mana Jabresi, iruki soko go kaega Mosese. Basoero nae ne, i kaega ne qira nanao velaka, mana vaogoto ria i zaza sakata go.

⁹ Do vatovato ria nae tiniki loda kaega, tanego basoero ne tarina ra miarove zazu bulaṉoe iru zazu bana ne go Janis mana Jabresi ṉalu bana ne.

Timoti Na Lulua Vatovato Ia Pol

¹⁰ Do aro qo lulua vari vatatana ro era, mana qo miarove bana too era mana pataro qa soko go zazu nena go. Qo miarove bana vaogoto era, de go qa vakapo qira basoe, qa mamaligara ne qira basoero ne mana patavolomo makuru i dokava era qara karaputa so.

¹¹ Aro qo rove bana so, vasasakata iri vae nava mana kimata ro qa pala go, ko qa vae go Antiok, Ikonium mana Listra go. Aro qo rove vasasakata lavata iri vae nava go, do Batu ne i vakavele lupo ve era pataro dena.

¹² Basoero iri soko go luluna vatovato ia God, loborona too ria de ikoego varivakameka ia Jesu Kristo, basoero nae tarina vasasakata ne qira,

¹³ basoero sakata iri zazu tatakiu go, iri poqe taru qira basoero ne, mana tanuqira do tarina vaogoto napua seko poqe ro iri zazu ne go.

¹⁴ Do aro ne, ono pala vanadua pataro qi vatatana bana zigoe, iato vaogoto qo vanadua nae, tanego aro qo rove velake pataro qi vatatana zigoe.

¹⁵ Pasi ara sale qo vaego, aro qo rove velake Buka tabo ne. Mana vari vatatana ikoego i mazala tavisi nigoe pala na nanao velaka, mana de go rove velake na Jesu Kristo, go God tina vakaveli go.

¹⁶ Osina seko ikoego Buka tabo ne basoero iri karo go, iri valulu zeso nanao na God, iago i lete mazala sivala. Tina tavisi ne qita rove na seko ogoto, i vasadake vasakata pata ro ita, i vamia qitae de go tatana vatotoloṉe too ita, mana i vatatana qitae de go too i totoloṉe tarakenaqa God go.

¹⁷ Sauna to seko ro nae, ita basoero ia God qata mazala luluna too mana vatovato velaka, go tina tora vavelaka qita zazu ne na zazu velaka ro go.