Kameka Timoti 3 - Vato Vari Vakameka Voru Ia Batu Ne

Vano Kenakenaqana Eklesia

¹ Seko dena i ogoto, ka basoe i soko go batu lotu ne basoe nae i soko neto zazu velaka.

² Basoe i batu lotu go, tina basoe totoloṉo, tina busia so kameka qole, tiniki muma katikili kaega, mana tina miasoka velake too ia. Ia tina koru vekaba qirae pade ia basoero iki rove qira go kaega, mana tina mazala vari vatatana go.

³ Ia tiniki poro ge loka kaega, ba poro varitara kaega, do tina vakapo qira basoero mana tina basoe bulebule go, mana mara kasi poro soko kesa go.

⁴ Ia tina miasoka velake ko tatamana ia, mana va rove qira salero iago tarina vaogote mana padapadae de ikoego tanuna.

⁵ Ṉalu go basoe nae iki rove velake kaega miasoka na ko tatamana ia, ava tina go tina miasoka go eklesia ia God.

⁶ Basoe lara vaogote so Kristo, iki tora kaega tina batu lotu go, tanego niki vazakanapu ne tanuna, mana ṉalu nae God tina vakimate ia, gere de i vane bana go Satana.

⁷ Do ia tina kaki basoe iri mia vamazale basoero iriki vaogoto go kaega, basoe nae to i tora go batu lotu. Ṉalu basoero ne iriki nanao vamazale kaega basoe nae, iri mazala so seko vasakate na ia, go Satana tina lama pala ia.

Vano Vari Vatatavisi Na Lotu

⁸ Vano iri vari vatatavise loborona lotu ne, mara vasadake too mana vatovato totoloṉo ria, mara lulua pataro iri sine go, mara kasi poqepoqe, poro ge loka, ba soko na kesa go.

⁹ Mara vanadua vaogoto i ko bana me, mana kasi ara karua nanao go.

¹⁰ Basoe i soko go zazu tavise na lotu, muna pada ne tekere, ṉalu go qamu mia i tora to, muna ra vazazua go.

¹¹ Igere napua so qole ia, na vasadake vatovato velaka, niki pepeu valu qira basoero ne, do na rove miasoka na tanuna mana basoero ne, mara taru ze ruqe ria de ikoego iago.

¹² Basoe i zazu tavise go lotu ne, tina kameka so qole ia, mana tina rove miasoka na salero ia mana ko tatamana ia God.

¹³ Ka basoe i zazu velake zazu de, basoero ne tarina va mazale ia, mana basoe nae tina karaputa ne tarama ne na vaogoto ia de ikoego Jesu Kristo.

Ogoto Sivala Na Vaogoto Ria Vano Kristiano

¹⁴ Pasi qa karo zatu go leta dena ne, qa nanao tiniki umata kaega tuna garetu mia qamu.

¹⁵ Do ṉalu qaki garetu katikili kaega, qamu mazala toere na leta dena de go too velaka na ko tatamana ia God. Iato nae eklesia ia God i too osina ṉalu. Mana eklesia nae i pala taru vanadua seko ogoto, go kaega kakia tina vasakate go.

¹⁶ I pata ogoto bana, vari vatatana na vaogoto ita i kakia pata lavata sivala. Vari vatatana ne igo de, Kristo i lama sadaka gere so basoe na vudu pua. Spirit tabo i vasadake too ia Kristo i lete totoloṉo. Aqelo ro ne iri miasoka ia. Seko ia i zadave kolabana pua ne, mana basoero ne iri vaogote ia. Mana God i pala vapopoka zaqe ia rani ne.