Kameka Timoti 2 - Vato Vari Vakameka Voru Ia Batu Ne

Vazaka Loborona Lotu

¹ Pata kenaqa sivala, era qa pene qamue, soko ro ramu, pepene ro ramu mana seko velaka ramu, muna teke zaqe God, sauqira osiqira basoero ne.

² Ria batu lavataro mana kero ne vano kenakenaqa go, go ita tatana ko velaka mana ko bulebule loborona too ita, go tatana lulua vato i vatabo go God loborona zuka velaka.

³ Ado pepene dena i velaka, mana i va kula God vari vakavele ita.

⁴ Tanego i soko osiqira basoero tarina kavele mana tarina lama rove, ia i ogoto.

⁵ Tanego ita qata rove, kameka so God, mana iko napu kameka basoe i vakameka ne God mana basoero na pua dena, basoe nae to Jesu Kristo,

⁶ ia i soso ne too ia, go tina voli vaule qira osiqira basoero na pua dena. Loborona vokara vamiki i vae go Jesu, i va sadaka ogoto me ṉalu velaka God i soko ne go va kavele qira osiqira basoero ne,

⁷ iato go God i vine ava era tuna apostolo ia, mana tuna sine vasadaka Tarama Velaka ia de iri koego vano iriki Jiu go kaega, mana vatatana qira e vaogoto ni ogoto go. Era qa sine pata ogoto, qaki poqe kaega.

⁸ Osina ṉalu qamu kameka teṉo sauna vazaka, qa pene osiqamu valeke ro muna pepene, ria valeke ro iri teke ne too ria de ikoego God, iri mazala vazakazaka na karisi qira loborona lotu, mara kaega qira muma ba varivalegu go.

⁹ Era qa soko ne qolero mara kasi agava, mara pada ne nanao rove na roku ro ria, mara varoku velaka go, mara kasi vivolo va malemale na uguru qira, ba vakeba ne malemale qolu, ba pata damadamara ro, ba roku i lete voli makuru go.

¹⁰ Ba iane, qolero kristiano mara vasadake too, ba vatovato velaka ria gere qira qolero iri pada ne go ko basoe lotu.

¹¹ Ṉalu qolero iri pala go varivatatana ria, mara ko duduli mana ko vakapo go.

¹² Era qaki vamao ne qira kaega tarina varivatatana, ba tarina pala karaputa sivala ne qira basoero ria, do mara ria ko mana duduli so.

¹³ Tanego God i va zari kenaqe Adamo, taramuzina iara va zaria go Eva.

¹⁴ Mana dole ne iki poqe kaega Adamo, do i poqe Eva, mana Eva to i vaego tamana ia God.

¹⁵ Do qolero tarina pala vari vakavele loborona vapodo sale tarina vaego, ṉalu go i ko vanadu go vaogoto ria, iri mamaligara ne qira kero ne basoero, iri dalo mana iri nanao rove go.