Kameka Pita 2 - Vato Vari Vakameka Voru Ia Batu Ne

Kristo I Ipaka Too Na Eklesia

¹ Iago ramu kasi ara luluna vatovato sakataro nae mana kasi ara poqe, kasi tatakiu, kasi misi ba seko sakate na kene basoe go.

² Muna gere qira sale medara iri ara podo go, iri lete soko go susu. Ramu muna soko susu i lete dalo go, susu nae tina vakaraputa qamu mana God tinara va kavele qamu go.

³ Gerena Buka tabo ne igo, “Tanuqamu qamu pada bana ne, mana rove bana to de igogo vari nanao ia God.”

⁴ Muna lama e de ikoego Jesu Batu ne, ia to i ipaka too iriki soko go kaega basoero ne, i kaega so ka mazalana iri go, do God i vine bana me mana ia to i lete mazala sivala go.

⁵ Ramu do muna gere ipaka ikoego too ṉalu tamuna lama garogaro go Batu ne. God tina vagere qamue ramu Pade Lotu ikoego too. Loborona pade nae ramu tamuna gere qira patere tabo ro ia God. Loborona vitoṉo na Jesu Kristo qamu mazala soso ne tavatavara ramu de ikoego God mana God tina lete kula ne go.

⁶ Tanego Buka tabo ne igo, “Era qa vine bana kameka ipaka mazala sivala ninidena, qa va degere ia tina ipaka maqana komala Jerusalema, iago basoe i vaogote go tiniki maqata kaega.”

⁷ Ipaka to dena ilete mazala sivala ne qamu go ramu qamu vaogote go Kristo, do ria iriki vaogote kaega, Buka tabo ne igo, “Iato ipaka iriki ruqe go kaega vano zazu pade ne, iato itaitana mana i lete mazala sivala go ṉalu ninidena.”

⁸ Mana kaki dia napu Buka tabo ne igo, “Iato ipaka de to tina tabatupara ne qira basoero ne, mana vasoru qira.” Tanego iriki vaogote kaega seko ia God. Iago God irove bana, ria tariniki vaogote kaega ia.

⁹ Ramu ne, God ivine bana qamue sinaqe ia. Ramu to qamu patere ria batu lavata ro, mana qamu basoero tabo ia tanuna go. Ramu to qamu basoero ogoto ia tanuna God, i vine bana qamu tamuna sine vasadake zazu velaka ro ia, tanego God i koru vasiporo bana qamue rodoko mana i taru qamue loborona tatavata velaka ia.

¹⁰ Ṉalu bana ne ramu qamuki basoe ia kaega God, do ninidena ramu qamu basoero ia, ṉalu bana me ramu qamuki pala kaega manava ia God, do ninidena ramu qamu pala to manava ia.

Basoero Zazu Ia God

¹¹ Qa pene qamu turaquro, ko ramu vudu pua dena qamu ko gerena so vano tupaka, tanego iki komala ogoto kaega. Iago kasi luluna nanao sakata ni soko go nanao qamu iri kana taru ne go madau qamu.

¹² Vatovato na too ramu, de iri koego vano rodoko, muna va velake, go ṉalu ria iri soko va sakata qamu, do mara ria mia too na vatovato velaka ro ramu, go tarina mia rove go velaka ramu go tarina vazaka go God musaqara ia tina za sadaka mego.

¹³ Vamazala ramu de ikoego Jesu Kristo, ramu muna lulua vatovato i reqe go batu ro na vudu pua dena. Kenaqana de i koego batu lavata Siza, iato i pala go karaputa, i sivala ne qira go osiqira basoero ne.

¹⁴ Mana de iri koego vano qauna, riato i vine bana qira go mara ria va lepulepu qira vano iri vae go tamana. Mana va mazala napu qira vano iri lulua go vatovato velaka go.

¹⁵ Tanego God i soko qamue loborona zazu velaka ramu go mara va dudulia seko bulaṉoe ria vano iriki rove go kaega kapata.

¹⁶ Ramu muna ko gere qira vano iri ko talukasa, do ko talukasa ramu muniki nanao go tamuna zazu nego pata sakata, kaega! Muna ko gerena basoe zazu ro ia God.

¹⁷ Muna nanao va mazala qira basoero topu, mamaligara ne qira vano lotu mana batu lavata Siza go, mana padapadae de ikoego God.

Vapadapada Na Vokara Ia Kristo

¹⁸ Vano seka ro muna vaogoto qira batu ro ramu mana va sadaka ne qira padapada ro ramu de iri koego. Kasi va mazala miki qira so ria iri va velaka ne qamu, mana nanao qamu gogo, do ria napu to vano iri sakata qamu go muna nanao qira.

¹⁹ Sauna pataro dena, God tina va makaolo qamue ṉalu ramu qamu vanadue vokara ro qamu pala go, tanego qamuki zazu ne kaega kaki pata sakata, do qamu mia rove vatovato dena i reqe me nanao na God.

²⁰ Ṉalu ria iri sima qamu, tanego qamu zazu ne pata sakata, do ramu qamu degere vanadue so vokara nae gogo ne, i patavolomo so mana i kaega to kapata i luluse go. Do ṉalu ria iri sima qamue sauna pata velaka qamu zazu ne go, ianae God tina lete va makaolo qamu ramu sauna zazu velaka ramu, ṉalu ramu qamuki ṉiṉiri ne go kaega.

²¹ Sauna to iadena God i koru bana qamue go. Tanego tanuna Kristo i vokara ne qamu, iago muna lulua vapadapada i taru ze de qamu koego.

²² Ia iki zazu ne kaega kaki pata sakata mana kaega kaki seko poqe i va siporo ze saqe na go.

²³ Ṉalu basoero ne iri va vokare go, iki muma ne qira kaega go. Tanego osina ruqe ia i taru lupo zaqe de ikoego God, ia so i mazala go taru ze vivine totoloṉo de ikoego basoe ne.

²⁴ Tanuna Kristo i pala ze tokamana osina vasakata pata ro ita, za le i vae go koluse ne, go ita tatana le ne too na vasakata pata mana tatana too napu ne de igogo ko totoloṉe na tarakenaqa na God.

²⁵ Ramu qamu gere qira sipi ro iri rore, iri va rore go zuka ria, do ninidena ramu qamu ule napu me de ikoego valeke miasoka sipi, mana i miasoka madau qamu go.