Kameka Jon 5 - Vato Vari Vakameka Voru Ia Batu Ne

Lulu Na Tamana Ro Ia God

¹ Osiqira ria iri vaogote Jesu to, i Mesia go, ria to iri salero iago God. Mana osiqira ria iri mamaligara ne go sale ia.

² Ṉalu ita qata mamaligara ne God, mana lulua tamana ro ia gogo ne, ita qata rove qata mamaligara ne salero ia.

³ Tanego vaogotona mamaligara ita de ikoego God ne ina za sadaka me luluna tamanaro ia. Mana tamanaro ia iriki lete makuru qita kaega luluna.

⁴ Tanego osiqita salero ia God qata mazala to vaqoqore na vatovato na vudu pua dena. Loborona to vaogoto ita qata mazala go vaqoqoro zena.

⁵ Iago, akena to i mazala go vasivala nena vatovato sakatana vudu pua dena? Tanuqira to ria iri vaogote go Jesu i Tuna ogoto go God iri mazala go.

Too Ogoto De Ikoego Tuna God

⁶ Jesu Kristo i lama sadaka velake go de qata koego ita, ṉalu ni bapitema ego besi ne, mana parasanani zazakae go ṉalu iri vaevale go ia. Iago iki sadaka velaka eso kaega miki besina bapitema ne, do iri kameka me to parasanani zazakae go ṉalu iri vaevale go. Mana Spirit tabo napu to go i lama vasadaka velaka ne qita go. Tanego Spirit tabo iki rove kaega poqe.

⁷ Iago kapisa pata dena to iri vasadaka velaka mego sauna Jesu de qata koego ita.

⁸ Spirit tabo, besi, mana parasa, iago osiqira tarapisa iri vasadaka me so kameka pata.

⁹ Ita qata vaogoto pata ni sine go basoe, do pata i sine go God ilete mazala sivala, mana God to i sine bana go sauna Sale ia.

¹⁰ Iago basoe i vaogote go Tuna God i nanao vamazale ia tane seko ro ia God ikoego loborona puṉuna. Do basoe iki vaogote go kaega God, iva poqe seko ia God ni sine go sauna sale ia ne. Iago basoe igogo nae ivagere ze so God basoe poqepoqe.

¹¹ Pata i sine bana go God igo dena, God iteke ne qita too gadokutona i kaega, mana too dena ireqeme de ikoe sale ia.

¹² Iago basoe ivakamekae go de ikoego sale ia God itoṉove go too dena. Do basoe iki vakameka ne go kaega de ikoego sale ia God, iki toṉove kaega too dena.

Too Gado Kutona I Kaega

¹³ Qa karo ne qamu ramu vano qamu vaogote go Sale ia God sauna pataro dena, go muna rove vavelake qamu pala go too gadokutona i kaega.

¹⁴ Iago ṉalu qata pene ze go God kaki pata itotoloṉe go nanao na God, ita qata rove to ia igata me qita qo. Iago ita mata kasi sareki ena tarakenaqana God.

¹⁶ Ṉalu qo mia kakia turamu i zazu ne go vasakata pata suka iki vazao ze qo kaega ia le ono pene God go mara tavisi ne, mana teke ne ia too. Sauna pata qa sine go dena, i sauna so basoe izazu ne vasakata pata suka. Do basoe i zazu ne go vasakata pata lavata tina mazala go vazao ze na ia le, ianae qaki sine ne qamu kaega muna pene ne ze go ia de i koe go God, sauna pata nae.

¹⁷ Osina ro pata sakata iri vasakata pata lupo so, do kakia vasakata pata iki vazao ze kaega basoe le.

¹⁸ Qata rove salero ia God iriki zazu taru ne kaega vasakata pata, tanego Sale ia God i miasoka taru qira so, go ia Satana tiniki vasakata qira kaega.

¹⁹ Ita qata rove qata basoero ia God, do basoero na vudu pua dena irikoe to polana karaputa ia Satana.

²⁰ Mana qata rove Tuna God i lamae go vudu pua dena i teke ne qita nanao rove velaka, go ita tatana rove go God ogoto. Ita qata kokamekae go de ikoego God loborona Jesu Kristo. God dena to i God ogoto, mana itoo, too ia iki rove go kaega lupo.

²¹ Salero era muna miasoka velake tanuqamu, mana muniki vazaka qira god poqepoqe ne go.