Kameka Jon 3 - Vato Vari Vakameka Voru Ia Batu Ne

Salero Ia God

¹ Mia de igogo mamaligara ia God Tamaqita de qata koego ita. Mamaligara ia i lete lavata sivala, go i koru qitae ita qata salero ia God. Do vano na vudu pua dena iriki rove bana so kaega God, iato nae tanego iriki rove napu qita go kaega ita go.

² Ramu turaquro, ita qata salero ia to God nini dena, do iara kaebo sadaka vavelaka me de tina gogo tatali qita kene ṉalu. Do ita qata rove Kristo tina za lama napu, ita tatana reṉa ne ia mana ita tatana gere to iago.

³ Iago osiqira ria iri piri ne go lama napu na Kristo, ria mara miasoka velake tanuqira tepa ia vasakata pata gerena Kristo i dalo bana go.

⁴ Soso sinaqena vasakata pata iri vasakate tamana ia God. Iago basoe izazu ne go vasakata pata, ivae to tamana ia God.

⁵ Ramu qamu rove Kristo i lamae go vudu pua dena, go tina pala vakuziki ne vasakata pata ria basoero ne.

⁶ Iago, ria iri ko vakamekae de ikoego Kristo iriki zazu ne kaega vasakata pata. Do vano iri zazu tarune go vasakata pata osina ṉalu iriki mia kaega Kristo, mana iriki rove bana so kaega iago.

⁷ Ramu salero era, kasi vamao nena kakia basoe go mara poqe qamu go! Ka basoe i zazu ne pata totoloṉo, i totoloṉo to tarakenaqana God, gere go Kristo i totoloṉe go de ikoego God.

⁸ Do basoe i zazu taru ne go vasakata pata i sale ia Satana, tanego Satana, ne i vasakata pata bana meso kokosona me. Iago, sauna to ianae tanego Tuna God i lama ne go pero vanaqe na zazu sakataro ia Satana dena.

⁹ Ka basoe i lama sale ia God, tiniki ara lulua kaega zuka na vasakata pata, tanego God i ko tavise ia mana God i Tamana, iago tiniki ara vasakata pata napu kaega go.

¹⁰ Pata tina sadakae go vari vakakavatae riru sale ia God mana sale ia Satana, iaso vatovato dena. Basoe iki zazu ne go kaega pata iki totoloṉo go kaega, mana iki mamaligara ne qira kaega kero ne basoe lotu gogo ne, iki sale ia kaega God do sale ia to Satana.

Vari Mamaligarae Napu Tanuqamu

¹¹ Tarama qamu gata bana mego kokosona ne igo, Muna vari mamaligarae napu tanuqamu.

¹² Iago ita mata kasi gerena Keni i sale iago Satana, go ni vaevale napua go kaena ogoto Ebolo. Iago avigo tane Keni i vae vale go kaena? Tanego vatovato ia i zazu ne go i sakata iki totoloṉo kaega, do vatovato ia kaena i totoloṉo.

¹³ Iago turaquro, muniki poloso ne ramu ṉalu iri sakata qamu go vano basoe na vudu pua dena.

¹⁴ Ba ita qata kasi bana neto tepa ia le, mana qata kavae to tepa ia too ogoto, ṉalu ninidena, tanego qata mamaligara ne qira vano lotu. Do vano iriki mamaligara ne qira kaega kero ne vano lotu, iri ara koeso tepa ia le.

¹⁵ Ka basoe i sakate go kaena, basoe nae i gere to valeke ivae vale go basoe. Mana qamu rove valeke i vaevale basoe go nae iki toṉove kaega too ogoto iki rove go kaega lupo.

¹⁶ Go tatana rove go ita zazaona mamaligara, Kristo iteke ne qita too ia tanuna. Iago, ita itora mata teke napu ne qira turaqitaro too ita tanuqita.

¹⁷ Do ṉalu kaki kameka valeke vavagado i mia kakia turana iko makuru ne go pataro tina tavisi ne go, do valeke vavagado dena iki soko to kaega tavisi nena sauna pata i makuru ne go turana dena. Avigo tane i sine go tanuna imamaligara ne God igo na?

¹⁸ Salero era, mamaligara iki pata na so kaega seko, mana sine volome na go, do mamaligara ogoto tina sadake to ṉalu qata tavisi ne qira qo basoero ne loborona mamaligara ita de iri koego.

Mata Ko Karaputae Tarakenaqana God

¹⁹ Ṉalu qata zazu neto vatovato nae qatara mazala go ita rovena qata ke ogoto ia God.

²⁰ Patavolomo nanao i reqeme go puṉuqita imia vaqoqoro qita sauna qatiki totoloṉo go kaega, do God i karaputa sivala ne puṉuqita, mana i rove osinapata topu go.

²¹ Iago turaquro, ṉalu nanao na puṉuqita tariki mia vaqoqoro qita go kaega, ita iko ne qita so karaputa tarakenaqana God.

²³ Tamana ro ia i sine ne qita go igo dena, mata vaogote sale ia Jesu Kristo mana vari mamaligarae napu tanuqita, gere Kristo i sine bana ne qita go.

²⁴ Ka basoe ilulua go tamana ia God iko kamekae de ikoego God, mana God i ko kamekae de ikoego ia. Mana ita qata rove God itooe loboro qita, tanego ia iteke ne qita Spirit tabo ia.