Kameka Jon 1 - Vato Vari Vakameka Voru Ia Batu Ne

Seko Na Vaogo

¹ Remu qimu karo ne qamu ramu sauna ia iri vitoṉo ze go Seko na too. Ia iko bana me so tarakenaqana iara zari go vudu pua. Remu qimu gata bana seko na, mana mia bana ze mata qemu. Ove, qimu mia mana siba zeto karisi qemu go.

² Ṉalu too dena i sadaka me vudu pua, remu qimu mia ogote to, mana qimu tarama neto go. Iago qimu sine zatue de qamu koego ramu sauna too i kaega valupolopona. Iko banae so de ikoego God Tamaqita, mana ninidena i lama sadake to de qimu koego remu.

³ Pata qimu mia mana gata gogo ne qimu sine napu ne qamu so ramu, iago ramu muna ko kamekae de qimu koe remu loborona varikitaki qimu pala ze go God Tamaqita, mana de ikoego sale ia Jesu Kristo.

⁴ Qimu karo zatu pata dena, gogo kula ita mara voto lupo.

God I Tatavata

⁵ Ia dena to tarama qimu gata bana ze go de ikoego Tuna God go qimu sine vasadaka ne qamu go ramu. God i tatavata mana i kaega napu to ka rodoko iara koego de ikoego.

⁶ Iago ṉalu ita qata go, qata varikitakie de ikoego ia qata gogo, do ara koeso rodoko qata gogo ne, ita qata poqe ne so sekoro ita, mana vatovatona too ita go.

⁷ Do ṉalu ita qata koe tatavata gerena God ikoe tatavata, nae ita qata varikitaki napu to tanuqita, mana parasana Jesu Tuna God iva dalo lupo osina vasakata pataro ita.

⁸ Mana ṉalu ita qata sine go i kaega ne qita vasakata pata, ianae ita qata poqe napua so tanuqita, mana ikaega so ka pata ogoto i koe de qata koego.

⁹ Do ṉalu qata vasadaka ze de ikoego God vasakata pata ita, ia tina vaogote pui ia, mana tina zazu ne pata totoloṉo. Ia tina nanao ule ne vasakata pataro ita mana vadalo osina keburo qata zazu nego.

¹⁰ Do ṉalu ita qata go, qatiki vasakata pata bana so kaega, ita qata vapoqe God mana ita qatiki vaogoto bana so kaega seko ro ia God.