Tarama Velaka Ia Jesu Kristo I Karo Go Jon 17 - Vato Vari Vakameka Voru Ia Batu Ne

Jesu I Pepene Ne Qira Basoero Iri Vaogote Go

¹ Ṉalu Jesu i sine lupo pataro dena, i kadeka qe rani ne mana i pepene, igo de, “Mamae, ṉalu ne i lama doka to, vasadaka ze karaputa mazala aro de ikoego Tumu, go Tumu tina vasadake karaputa mazala aro.

² Aro qo teke bana nava karaputa sauna miasoka qira osiqira basoero ne, go osiqira ria go teke nava go, era tuna teke qira too iki rove go kaega lupo.

³ Mana too iki rove go kaega lupo dena ne, italupase basoero ne tarina rove velake, aro to qo God ogoto, mana tarina rove napu ava era Jesu Kristo noqo turi nava mego.

⁴ Era qa vasadaka bana ze karaputa mazala aro, kolabana pua dena, mana zazu qo teke nava go, era qa valupo to.

⁵ Mamae, ninidena qa soko mo vasadake karaputa mazala era, i ko nava go torana qa kotavisi go, ara kaebo zari i vaego kolabana pua dena.

⁶ Qo teke nava kakiaro basoero na vudu pua dena, qava rove qirae avana to qo gere go aro. Basoero nae iri ke aro, do qo teke nava era, mana iri vaogote vari vatatana aro go.

⁷ Mana ninidena iri rove to, osina pata qo teke nava go era ne, i reqe meso deqo koego aro.

⁸ Pataro qo sine nava go, qa sine lupo ne qira to, mana iri vaogote to go, iri rove era qa koe mana qa reqe de qo koego aro, mana iri vaogote aro qo turi nava go era.

⁹ Qa pepene ne qira. Qaki pepene ne qira kaega basoero na kolabana pua ne, do qa pepene ne qira ria qo teke bana nava go, tanego iri ke aro.

¹⁰ Osina pata qa toṉove go era, i ke aro, mana osina pata qo toṉove go aro, i ke era, mana karaputa mazala era i damare de iri koego.

¹¹ Era tuna gado atu to, tuniki koe kaega vudu pua dena, do ria de tarina koe vudu pua de. Mamae, aro qo Tabo go! Bara ne qirae karaputa na vitoṉomu, iato vitoṉo qo teke nava go era, go ria tarina kameka so, gere qituru ituru qaturu kameka go.

¹² Torana qa kotavisi qira go, qa bara ne qirae karaputa na vitoṉomu, iato vitoṉo qo teke nava go, qa miasoka velaka qira iato go kakia iki rore kaega. Do kameka i rore go ne, tina rore bana so, go tina va voto go seko i sine bana go Buka tabo ne.

¹³ Era tuna gado atu to. Qa sine sekoro dena, pasi qara koe vudu pua dena, go ria tarina kula gerena so de igogo kula qu era.

¹⁴ Qa teke ne qira seko ro aro, do basoero na vudu pua dena iriki soko qira kaega. Tanego iriki keana kaega vudu pua dena. Gerena era qaki keana kaega vudu pua dena.

¹⁵ Qaki pene ge kaega tono vakuziki ne qirae go vudu pua dena, do qa pene go, ono bara ne qirae loborona karaputa ia Satana.

¹⁶ Gerena era qaki keana kaega vudu pua dena, ria do iri go napu so.

¹⁷ Vari vatatana aro iogoto, iago vanama ne qira go tarina osaka ne ogoto aro.

¹⁸ Era qa turi vazao qirae kolabana pua ne, gerena so aro, qo turi navae go era kolabana pua ne.

¹⁹ Era qa vanama tanuqu, go tuna osaka niqo, qa zazu ne ia dena sauqira ria ne, go ria tarina vanama ogoto ne osaka nigo aro.

²⁰ Qa pepene ne qira ria de, mana qa pepene napu ne qira osiqira basoero tarina vaogoto ava go era, tanego tarina gata seko ro ria.

²¹ Mamae, qa peni go, go osiqira basoero iri vaogoto ava go era, tarina kameka, gere na ituru qaturu kameka go. Qa peni go, go basoero dena tarina kamekae de qaturu koego, go basoero na kolabana pua dena tarina vaogote, aro qo turi nava era.

²² Karaputa mazala qo teke nava go, era qa teke napu qira to ria de, qa teke ne qira, go tarina kameka gere na ituru qaturu kameka go.

²³ Era qa ko tavisi qira, mana aro qo ko tavisi ava era, go ria tarina kameka go. Iato zuka dena to, go basoero na kolabana pua de tarina rove aro to qo turi nava era, mana qo mamaligara ne qira, gerena aro qo mamaligara nava go era.

²⁴ Mamae! Era qa soko basoero qo teke nava go tarina ko tavisi ve de qa koego, go tarina mia karaputa mazala era, karaputa mazala qo teke bana nava go, tanego qo mamaligara nava tarakenaqana qo ara vazaria go kolabana pua de.

²⁵ Mamae qo lete totoloṉo! Basoero na vudu pua dena iriki rove go kaega, do era qa rove go aro qo turi nava qo era.

²⁶ Qa vatatana bana qira go tarina rove go aro, mana tuniki noto ne kaega vatatana qira go, iato zuka dena to, ria tarina mamaligara ne qira kerone basoero gerena aro qo mamaligara nava era mana era tuna koe de iri koego.”