Jemisi 4 - Vato Vari Vakameka Voru Ia Batu Ne

Vakitakena Vudu Pua

¹ Avigo qamu rove ramu tane pata iva pera taru qamu go mana qamu soko go varitara osina ṉalu gogo ne? Ireqeme so soko raramu qamu lene go soko na osina pata. Ia so nae tane ivaritarae go de qamu koe go ramu.

² Ramu qamu soko osina pataro, do imakuru qamu palana, iago qamu varivalegu, muma mana soko so vae vale na basoe. Ia qo avigo tanego qamu ki pala go kaega pataro qamu soko go? Tanego qamu ki pene kaega God.

³ Mana ṉalu qamu pene go do qamu ki pala go kaega, tanego pataro qamu pene go i sauna so pata mara vakula qamu so.

⁴ Qamu ki basoe totoloṉo kaega, qamu lulua so vatovatona too na vudu pua. Tanego vatovatona vudu pua dena i kana ne God. Iago basoe ilulua go vatovatona vudu pua dena ivakana ze God de ikoe go tanuna.

⁵ Seko i sine go Buka tabo ne i lama ogoto, tanego, “Seko ia Spirit iteke ne qita go too ilete karaputa sivala.”

⁶ Do mamaligara lavata ia God iva sadaka ze go de qata koe go ilete moqere sivala, gerena Buka tabo ne i sine go, “God iki soko qira kaega vano iri vazakanapu go, do mamaligara ia itaru ze de iri koego vano iri vaqoqore go tanuqira.”

⁷ Iago muna vaqoqore tanuqamu, mana toqe ne ze God too ramu. Muna varitarae de ikoe Satana go mara paqa kasi ne qamu.

⁸ Muna lama ko garogaro de ikoe God, go God tina ko garogaro qamu go. Muna vanane vasakatapata ramu vano qamu zazu ne qo vasakatapata, mana vadalo puṉu qamu ramu vano qamu tatakiu go.

⁹ Muna agava mana dae. Iki torakaega tamuna kari go, mana iki torakaega tamuna kula go. Do ramu itora tamuna maqata mana dae go.

¹⁰ Muna vaqoqore tanuqamu tarakenaqana Batu ne, go ia tina vazakazaka qamu go.

Kasi Toerena Too Ia Kene Basoe Lotu

¹¹ Turaquro, kasi sine vaqoqore na kene basoe. Ka basoe i sine vaqoqore go kene basoe, ba qo varitanae ne ia gogo ne, aro to qo sine vasakate go God mana qo varitanae ne go Tamana go. Ṉalu aro qo poro varitanae ne go Tamana, aro to qoki lulua go kaega Tamana, do qo basoe poro varitanae ne so tamana.

¹² Ake aro tane qo nanao tono toere go too ia kene basoe. Tanuna so God ivalame go tamana mana imazala napu go toere na too ia basoe go. Tanego iaso imazala go teke ne qita too mana i mazala pala vaule napuna too ita go.

Kasi Vazakanapu

¹³ Muna gatava era! Ramu to qamu poro sine go seko vanamanama, “Era ninidena ba bakubaku tuna zaza mana zakoe kaki komala torana kameka ave go tuna za zazu ne pata volivoli ro era go mapala topu na kesa.”

¹⁴ Tanego, qoki rove kenaqa bana zaqe kaega aro tane pata tina doka go aro musaqara pasi bakubaku, vatovato nae ramu qamu qere so kaukuna piala isadaka me so ia zaga vasivala napu igo.

¹⁵ Do pata itora go aro sine na igo de, “Ṉalu go God isoko ava era ma too vaumata aqe era ga mazala to zazu nena pata qa soko go zazu nena.”

¹⁶ Do ramu qamu vano vazakanapu. Gerena vatovato nae ramu qamu rove lupo bana so ramu tane osina pataro tina lama dokae go tarakenaqa qamu. Do vatovato nae ivatovatona so vazakanapu.

¹⁷ Iago basoe irove go pata velaka itora go zazu nena, do iki zazu ne kaega igogo ne, i vasakata pata.