Jemisi 2 - Vato Vari Vakameka Voru Ia Batu Ne

Kasi Vine Vakakavata Qira Basoero Ne

¹ Ramu turaquro qamu vaogoto bana mego Batu ita Jesu Kristo i batu ne go osina menomeno. Kasi vine vakakavata qira basoero ne, tanego iki vari pada kaega vatovato ria ni sadaka go.

² Ṉalu tono vari mia ne qiru karua basoe iru lamae go teṉo na lotu ramu, kameka valeke i vavagado, mana kameka i valeke situ. Valeke vavagado ne i vakeba rini qolu mana roku menomeno, do valeke situ ne i vakeba ne so roku taridaka.

³ Ramu tamuna vamazale so valeke i vakeba ne go roku menomeno ne, mana sine ne ia, “Lama kolokue de koko velaka ne,” do valeke situ ne tamuna sine ne ia, “Degere so nae ba lama kolukue so rikisina makequ era dena tamuna vane so.”

⁴ Ia to nae kebu raramu, tanego tanuqamu so qamu vine vakakavata qira go basoero iri lamae go de qamu koe go, mana vivine ramu nae ireqeme so nanao sakata.

⁵ Gata turaquro, God i vine qira vano situ na vudu pua dena go mara vavagado vaogoto ria, mana ria mara toṉove komala ikoe go vari miasoka ia ni pui bana ne qira go basoero iri mamaligara ne go.

⁶ Do ramu qamu vasasakata ne qira vano iri situ go. Iago akeria tane iri pala vazao qamue go de iri koe go vano varitanae ne? Ria so basoero vavagado ro nae iri vasakata qamu go ramu.

⁷ Mana ria so nae iri vasakata napua go vitoṉo velaka na Jesu iri teke ne qamue go bapitema ramu.

⁸ Iago pata totoloṉo tamuna zazu ne go ramu, muna lulua tamana ni sine go Buka tabo ne, “Muna mamaligara ne qira basoero ne gerena qo mamaligara nigo tanumu.”

⁹ Do ṉalu ramu qamu vine vakakavata qira basoero ne, ramu qamu kebu, mana qamu vae tamana.

¹⁰ Tanego ṉalu basoe ivae go to kaki kameka mine na tamana, ia igerena to ivae lupo to osina tamana.

¹¹ Tanego God igo, “Muniki taunata,” mana igo napu dena, “Muniki vaevale basoe.” Iago patavolomo qamuki taunata go kaega, do vaevale basoe qamu gogo ne, aro qo vae to osina Tamana.

¹² Iago muna seko, mana zazu gere qira basoero iri koego varitanae ia tamana i lukasa bana qitae go God.

¹³ Tanego varitanae ia God iki sadaka me kaega varinanao de ikoego basoe iki manava ne qira go kaega basoero ne, do ṉalu aro qo manava ne qira go basoero ne, aro tina kaega nigo so sareki dekoe varitanae ia God.

Vaogoto Mana Zazu

¹⁴ Ramu turaquro, ava pata velakana tane i zazu ne go basoe igo, “Era iko nava vaogoto igo,” do ogotona seko ia iki sadaka e kaega kaki pata izazu ne go. Avigo miki vaogoto tina vakavele go ia ba?

¹⁵ Ṉalu kaki togamu ba kaemu valeke ba qole i kaega ne baribari mana iki tora qira kaega pata gege gogo ne.

¹⁶ Avapata velakana qo zazu ne go aro go qo sine ne qira seko dena, “God ina vamakaolo qamu ramu muna ko velaka mana ṉaṉa velaka go,” do qamuki teke ne qira kaega pata iri soko, go tina tavisi ne go too ria.

¹⁷ Vaogoto igo napu so dena, ṉalu basoe i vaogoto so, do iki zazu ne kaega kaki pata velaka gogo ne, vaogoto nae i patavolomo so mana i le bana go.

¹⁸ Do kadigo kaki basoe tina go, “Kakiaro basoe iri vaogote so God, mana kakiaro iri zazu ne pata velaka.” Ṉalu igogo nae aro ono vamia zava era de igogo ia ni vaogote God igogo, do iki zazu ne kaega kaki pata velaka. Era ṉara vamia zigo aro pata velaka ro qa zazu ne go ni sadake go vaogoto era de ikoe go God.

¹⁹ Era qa rove ramu qamu vaogote i kameka minena so God ogoto iko go. Ivelaka sivala to nae! Manuru sakataro, do iri vaogoto napua so God iato go iri nenedere mana sareki napu so go.

²⁰ Qamu bulaṉoe, qamuki mia rove kaega ramu tane vaogoto iki zazu ne go kaega kaki pata ipatavolomo so.

²¹ Avigo tane kazigarata ita Abra-am i lama ko totoloṉoe go de ikoe go God? Tanego sauna pata i zazu ne go, ia i pala sale ia Aisak mara komakoma ne ze popokona sara ne igo.

²² Qamu mia rove to ramu, sauna so vaogoto ia mana zazu ia gogo ne, iru kameka vari lulu velaka so.

²³ Iago seko na Buka tabo ne ilama ogoto, “Abra-am i vaogote God mana sauna vaogoto ia, God itoqe ne ia itotoloṉo.” Iago Abra-am i vakitaka ia God.

²⁴ Iago qamu mia to, zazu ia so basoe i vatotoloṉe go ia de ikoe go God.

²⁵ Igerena napu so qole poro varivagabu Reab. Ia i vakeba velaka qiru, mana ipika qirue pade ia karua basoe ria vano Izirel iru lama mimia sikoe go komala lavata nae. Mana Reab i vapaqa pipika qirue riru zuka kakavata na komala nae. Sauna so zazu velaka ianae tane God igo, i qole totoloṉo i vane go Reab.

²⁶ Iago igerena napu so tokama, ṉalu madau ikasi ne go ia, tokama i le to. Mana qerena napu so vaogoto iki vasadake go kaega zazu velaka, vaogoto nae ile napu so go.