Jemisi 1 - Vato Vari Vakameka Voru Ia Batu Ne

¹ Era Jemisi kameka basoe zazu ia God mana Batu ita Jesu Kristo qa seko kula atu de qamu koego ramu basoero topu ia God qamu repe go osina dia vudu pua.

Vaogoto Mana Tarove

² Ramu turaquro, muna nanao rove tanuqamu, ramu qamu maṉana ṉalu qamu soba go soso adoadona makuru,

³ tanego ramu qamu rove ṉalu vaogoto ramu i nadu go, patavolomo pata padaro ilama qiqilo de qamu koe. Ianae to i vakaraputa qamu ramu, go qamu palataru vanadu go osina ṉalu.

⁴ Iago sauna vanadu ramu muna miasoka velake, gogo tamuna totoloṉo mana valupo velake; mana go tiniki za kaega ne qamu go kaega kaki pata sauna vatovato ia God.

⁵ Do ṉalu kakia ramu ikaega ne go tarove, ia mara pene God, mana God ina teke ne ia, tanego soso ia ilete velaka sivala me de ikoego basoero topu.

⁶ Do ṉalu qamu pene go muna vaogote, mana kasiara ruama. Basoe i ruama do pene God igogo ne, igere so kameka tubitubi na masi i ubolo me, do sokoro ne ikiure ia za kaega so igo.

^7-8 Basoe igere go ianae iki vatotoloṉe kaega osina pataro izazu ne go. Iago basoe nae mara kasi nanao na tina pala ze go kakipata de ikoe go God.

Sarakutu Mana Vavagado

⁹ Basoe ia Kristo i sarakutu go mara kula ne ṉalu God tina vazakazaka go ia.

¹⁰ Mana vano iri vavagado go mara ria kula ṉalu God ipala vaqoqoro qira go, tanego vano vavagado tarina za kaega so, qerena bubulina pata podopodo piru,

¹¹ ṉalu saṉa ikeba me lama dokae to torana ni lete ila go ia iri soru tadau lupo so go. Gerena to basoe vavagado, tina le ia za patavolomo so tina go vavagado ia ni riqo taru ne go.

Pada Mana Qiqilo

¹² I makaolo tane basoe idegere vanadu ne go vaogoto ia, mana i vasivala ne go osina pata pada ro iri lamae go de ikoe go, tanego ṉalu i vasivala ne go osina pata pada ro nae, God tina teke ne ia volina too ogoto ni pui bana ne qira go basoero iri mamaligara ne go.

¹³ Ṉalu kameka basoe i soba go qiqilo ireqe mego pata padaro dena de ikoe go. Mara kasi sine na, “Qiqilo ro dena ireqe me so de ikoe go God.” Tanego pata sakata iki mazala kaega lama qiqilo nena God, mana God iki qiqilo ne kaega kaki basoe.

¹⁴ Do basoe tanuna so isoba go qiqilo sakata ro nae ṉalu iki vana ne go kaega soko na pata sakataro iri lamae go de ikoe go.

¹⁵ Gonae soko sakataro itoṉove go i vazari me vasakata pata, mana ṉalu i lama lavata go ia i vazaria to le.

¹⁶ Iago turaquro, muna nanao luluse sauna pataro dena.

¹⁷ Osina sosovolomo na pata ni velaka go iri reqeme so rani ne. God i valame go pata velakaro dena, mana tanuna God iki rove kaega kavalena vatovato ia. Iki gere kaega pataro ivazaria go iri koe go zakazaka varioka dona iri tatavata mego, do iri rove so kavala osina ṉalu.

¹⁸ Vatovato ia tanuna i valame ne qita ita seko ogotona too, mana go ita tatana ko kenaqa ne qira osina pataro i vazaria go.

Gata Mana Zazu Ne

¹⁹ Nanao tarua turaquro! Osina basoero mara katikili gatana, do valosia sine na, mana mara valosia muma go.

²⁰ Tanego muma ia basoe iki zazu ne kaega pata velaka ni soko go God.

²¹ Iago muna vanane too sakataro, mana too memelaka ro ramu. Do muna vaqoqore tanuqamu mana toqe ne seko ia God ileba ze qo puṉu qamu. Ia tonae tina vakavele qamu go.

²² Kasi gatavana ne so, seko ia God qamu gata go, do muna zazu ne pata ni sine go.

²³ Basoe igata go seko ia God, do iki vazazua kaega igogo ne, iqere so basoe i mia zaqe sirosiro ne dudulena tarakenaqana tanuna.

²⁴ Gonae i mia lupoto dudulena tarakenaqa tanuna izaza to ia nanao kasupe neto de igogo tatalina.

²⁵ Do basoe i vanoto zaqe nanao na tamana totoloṉo ni lukasa qira go basoero ne, mana iki gata vanane kaega, do ilulua. Basoe nae tina pala makaolo de ikoe go God osina pataro izazu ne go.

²⁶ Ṉalu basoe inanao i basoe lotu ogoto igo, do iki miasoka go kaega sekoro ia sauna vazaka ia de ikoe go God i pata volomo so, mana i vabulaṉoe so tanuna go.

²⁷ Ba de tina gogo vatovato ria vano lotu go tarina lete velaka sivale go tarakenaqana God Tamaqita ne, vano lotu mara ria miasoka qira salero samele, mana vano nanaro iri ko vari vananama. Mana mara ria miasoka napua too ria tanuqira go mara kasi vasakata qira vatovatona vudu pua dena.