Iburu 9 - Vato Vari Vakameka Voru Ia Batu Ne

Vazaka Tepa Rani Mana Pua

¹ Ṉalu God i teke ne Mosese varitoqe kenaqa ia, i ko palua kakia ro tamana de go vazaka na God. Mana i sine ne qira tarina zazu ne kameka Pade Lotu, i pade na so pua dena.

² Iri zazu ne kameka pade iri pala zazao ne, kova kenaqa ne iri vitoṉo ze, “Kova tabo.” Loboro igogo i koe pazi, tevolo mana bureri iri sosovolomo ne zaqe God go.

³ Mana taramuzina kameka poga lavata ne, i koe varuana kova, iri vitoṉo ze, “Kova i lete tabo sivala.”

⁴ Loborona i koe sara iri subi ze pata i nonoli velaka go, mana bokese na varitoqe ia God. Sara ne mana bokese igogo ne iri va kapata lupo ze qolu, Aria loborona bokese ne i koe botolo iri zazu ze qolu, mana i roku e desuka pata gege iri vitoṉo ze Maana. Loborona bokese ne i ko napu e moki sisikolu ia Aron, moki sisikolu igogo ne i podo ule napu ne uguruna, mana karua takoro ipaka i karo e go manoga seko Tamana ia God.

⁵ Popoka na bokese igogo ne i koe de i mazala vatalupasa ze na vasakata pata ia basoe. Mana popoko na kokoqu na bokese ne ikoe karua beku i zari babalakuru qiru, karua pata dena iru vasadake lalana, God i koe de go. Do ninidena i kaega ṉalu go tuna pepeu lupase go ia igogo ne.

⁶ Ṉalu iri vanama lupo go osina pataro dena, osina musaqara ro patere ro iri keba za kova kenaqa ne mana iri zazu ne zazu ro ria,

⁷ do loborona varuana kova ne, Batu ria so patere i mazala go zae na, do kameka ṉalu so loborona kameka ave. Ṉalu i keba za, ia i pala za parasa na pata qaraqara go tina teke ne God, go tina valupo ze vasakata pata ia tanuna mana vasakata pata ria basoero iri zazu ne do iri ki rove kaega i vasakata pata go.

⁸ Loborona to zuka dena, Spirit tabo ne i lete vatatavata velake, zuka i keba za go, kova i lete tabo sivala go iara kaebo papaqa, tanego pade bana iri pala zazao ne go iara degere so.

⁹ Iadena i lala na ṉalu ro dena, i talupase pataro iri teke zaqe God patere ro, mana pata qaraqara iri komakoma nego, i makuru tina lete vatotoloṉe too ia basoe nae de koe tarakenaqana God.

¹⁰ Tamana ro dena i patana so pekapeka na basoe, zazaona pata gege, besi, mana de go va vadalo, tamana ro dena tina ko go na doka ṉalu God tina kavale osina pataro mana tina va voru lupo go.

Parasana Kristo

¹¹ Do Kristo ilama bana gere na batu Patere, ia i pala me pata velaka ro ikoego de. Ia i keba bana za kova i lete tabo sivala go, i sivala ne ke bana ne, iato go i meno meno go, basoe iki zazu ne kaega pade dena, tanego vazari i vae nego God kolabana pua ne, pade dena iki va zari palu me kaega.

¹² Ṉalu Kristo i keba za go pade iri pala zazao nego, kameka ṉalu so de ilete tabo sivala go. Jesu iki pala za kaega parasana nani koti ba buluka go tina koma koma nego, do ia i pala za parasana tanuna mana zuka dena to i pala vakuziki ne vasakata pata ro ita mana qata pala ze vari vakavele ita go.

¹³ Parasana nanikoti, buluka mana lodu na tunana buluka iri koma koma nego, iri rupe qirae basoero iriki dalo go kaega, mana zazu dena i vadalo qira, i pala vakuziki ne pataro iva poṉo qira go.

¹⁴ Tanego iadena i pata ogoto, zazu ia parasana Kristo i lete lavata, loborona Spirit i too sivala go ia i teke zaqe tanuna gerena kaki koma koma i lete totoloṉe go de ikoego God, parasana ia tina vadalo puṉuqita mana nanaoqita mana tina qusa vakuziki ne zazu volovolomo ro i kaega go tatalina, go ita tatana osaka ne God.

¹⁵ Sauna to pataro dena, Kristo so tina vanama go varitoqe voru ne, go ria i koru bana qira go God tarina pala vatabo i too sivala, i pui bana nego God. Pataro dena tina mazala zazu, tanego Jesu i le banae koluse ne mana i vakavele bana qirae basoero tepa ia kebu ro iri zazu bana nego ara zazu i vae go varitoqe kenaqa ne.

¹⁶ Ṉalu kaki basoe i vanadua seko ia igo, “Ṉalu tuna le era, patapataro era tina toṉove basoe kakavata.” Seko dena i tatavata, ṉalu tina le to valeke dena tinara degere mego seko i vanadu bana go.

¹⁷ Tanego seko dena i kaega ne karaputa ṉalu basoe i sine go iara too go. Do ṉalu tina le to basoe nae tina ra ko ne karaputa seko nae.

¹⁸ Iato go varitoqe kenaqa ia God i lama ogoto go, ṉalu iri rupe poka ze parasana pata qaraqara iri koma koma nego.

¹⁹ Pata kenaqa Mosese i zazu ne, i sine vasadaka ne osiqira basoero osina manoga seko ia God i karo vanadue go Tamana ne, taramuzina i pala parasana nanikoti mana buluka mana i lomiri ze besi, gonae i qolo varipalu ne uguruna pula manamana mana uguruna sipi i mesara go, mana i rupe poka ze buka na Tamana ne mana osiqira basoero go,

²⁰ Mana i sine, “Iadena to parasa i lete vanadua go varitoqe ia God, igo, tamuna vaogote mana lulua go.”

²¹ Gere na napu so Mosese i rupe poka ze pade iri pala zazao ne, mana osina ro pata ikoego loboro iri vazazu ze go vazaka ria go.

²² Pata ogoto, lulua go de igogo Tamana ne, osina pata i va dalo ze parasa, vasakata pata i mazala nanao ule ṉalu parasa i zuga poka go basoe nae.

Le Ia Kristo I Pala Vakuziki Ne Vasakata Pata Ita

²³ Pataro qatara pepeu lupo zaqe go, i varipadana so patana ro rani ne, tina rupe poka bana ze so parasa go tina dalo go. Do pataro ikoego rani ne, kaki komakoma i lete mazala sivala tane i mazala go vadalo na.

²⁴ Kristo iki keba za kaega kova tabo, i zazu ne go basoe i vapadapada zego ke ogoto ne. Do Jesu i keba za rani tanuna, de go ninidena i sadake tarakenaqa na God sauqita ita.

²⁵ Ṉalu batu Patere ria vano Jiu i keba za kova i lete tabo sivala osina ave, ia i pala za parasana pata qaraqara. Do Kristo iki za kaega topu na ṉalu, teke ivae ne too ia de ikoego God.

²⁶ Ṉalu ia tara zazu ne topu na ṉalu, ia tara pala vokara topuna ṉalu tupi me ṉalu God i vazaria go kolabana pua ne, doka ninidena go, do kaega, ia i lamae de qata koe ita kameka so ṉalu, torana de vudu pua i vele lupo go. I teke ne too ia de i koego God gerena kaki komakoma sauna vatalupase na vasakata pata ria basoero ne.

²⁷ Osina basoe tarina le kameka ṉalu mana taramuzina God tina zazu ne vivine ia.

²⁸ I gere napua so Kristo i komakoma ne tanuna kameka so ṉalu, go i vatalupase go vasakata pata ria basoero topu ne. Ia tina lama sadaka napu varuana ṉalu, do tiniki lama ne kaega vakuziki na vasakata pata, do tina lama vakavele qira vano iri piri bana nego ia.