Iburu 8 - Vato Vari Vakameka Voru Ia Batu Ne

Jesu I Batu Patere Ita

¹ Iato dena kutamana pata qi pada nego pepeu na, igo de, ita i ko ne qita batu Patere ita i koloku e tepa matauna God i lete karaputa sivala go.

² Ia i zazu gere Batu ria patere loborona de i lete tabo go, loborona pade iri pala zaza ne go. Pade nae basoe iki zazu ne kaega, do tanuna God i zazu nego.

³ Osiqira batu Patere ro i vine qira tarina zazu komakoma mana teke sosovolomo ria de ikoego God. Iago batu Patere ita tina zazu napu ne so sosovolomo ia de ikoego God.

⁴ Ṉalu go tara koego pua dena, ia tara ki patere kaega, tanego topu patere iri ko mana iri teke komakoma ria de ikoego God, lulua so dego Tamana ia Mosese.

⁵ Zazu iri zazu nego patere ro i dudulena so pataro i zazu ego rani ne. I gere napua so de i koe Mosese, ṉalu God i sine ne Mosese dego zazu na pade iri pala zaza ne go, ia igo, “Ono mia velake zazu tono vae nego, ono valulu velaka ze so de qa va mia goe era popokona kubolo ne.”

⁶ Do ninidena, Jesu i pala zazu patere i lete sivala ne zazu ria kero ne patere ro, gere so vari toqe velaka i vanama ze vari lobori qiru God mana basoe, tanego i nadu eso pui na pata i velaka go.

⁷ Ṉalu go vari toqe kenaqa ne i zazu va voto lupo osina ro pata tina zazu nego, kitora kaega tinara lama napu go varuana varitoqe.

⁸ Do God i soba ze kebu de iri koego basoero ia, iato go i sine seko dena, “Tina doka ṉalu, igo Batu ne, era tuna zazu ne varitoqe voru de iri koego basoero na Izirel mana basoero na Jiuda.

⁹ Varitoqe de, tiniki gere kaega ke qa zazu ze de iri koego vano ṉalu bana ria, ṉalu qa bara vasiporo qirae Izipito. Tanego iriki lulu velake kaega varitoqe qa zazu ze de iri koego, mana iato go qaki gata lote qira go kaega.

¹⁰ Batu ne igo dena, tina lama doka ṉalu, era tuna zazu ne varitoqe de iri koego basoero na Izirel, tuna taru ze Tamana era loborona nanao qira, mana karo ze puṉuqira go. Era tuna God ria, mana ria tarina basoero era go.

¹¹ Kaega ka basoe tina mazala go vatatana na basoe na vudu ia, ba sine ne basoe na komala ia, ‘Ono rove Batu ne.’ Tanego reqe me, basoero iriki mazala go kaega mana za dokae basoero iri lete mazala sivala go, osiqira tarina rove ava era.

¹² Era tuna nanao ule ne vasakata pata ro ria, mana tuniki ara nanao tarua kaega go.”

¹³ Ṉalu God i seko ne varitoqe voru, talupasana ke kenaqa ne i bana to, mana pata i bana go mana i mode go, tina katikili za kaega so.