Iburu 7 - Vato Vari Vakameka Voru Ia Batu Ne

Patere Melkizadek

¹ Melkizadek dena to i batu lavata ego Salem, mana i patere ia God i zakazaka sivala go. Ṉalu Abra-am i gado ule mego varitara ena, de iri koego kavasi batu lavata ro ne, Melkizadek i za soba mana iva tabo iago,

² gonae Abra-am i teke ne ia vamanoga na osina pata ro i za pala ze go varitara ne. Talupasa na vitoṉo Melkizadek, igo de, “Batu lavata na zazu totoloṉo,” tanego i batu lavata na Salem, vitoṉona i talupasa napua so, “Batu lavata na bule.”

³ I kaega kaki karo loborona Buka tabo ne i vasadaka ne qita tamana ba sinana Melkizadek, sinaqe ia, ṉalu i podo ba ṉalu i le go. Ia i gere so Sale ia God, zazu patere ia iki rove kaega lupo go.

⁴ Iago qata mazala nanao rove na, Melkizadek i kaki basoe mazala, patavolomo Abra-am, i tamana go popodo ita do i teke na ia vamanoga ne pata i za pala ze go varitara ne.

⁵ Qata rove ria iri patere ro iri podo go me sinaqe ia Livae. Mana Tamana i teke qira go Mosese, vano Izirel tarina soso ne qira vano patere vamanogana pataro iri toṉove go. Patere ro dena iri pala ze pataro igogo ne de iri koego basobasoero ria tanuqira, mana basoero nae do iri reqe napu meso sinaqe ia Abra-am.

⁶ Melkizadek iki podo go me kaega sinaqe ia Livae, do ia i pala ze vamanoga na pata pata ia Abra-am i za pala ze go varitara ne, mana i vatabo Abra-am go, patavolomo God i pui bana nego Abra-am.

⁷ Ita qata rove, basoe i vatabo go kene basoe, basoe nae i sivala ne basoe i pala go vatabo ne.

⁸ Ria patere ro iri pala ze vamanoga na pata pataro ria basoero, do patere ro nae iri basoe so, mana tarinara le so go. Do Melkizadek i pala ze go vamanoga pataro de ikoego Abra-am Buka tabo ne igo, “Ia i too sivala.”

⁹ Ṉalu Abra-am i teke go Melkizadek va manoga na patapata ia i gere napua so Livae i soso ne go, ria sinaqe ia Livae iri pala napua so va manoga na patapata iri teke ne qira go.

¹⁰ Aria Livae iara kaebo podo ṉalu Melkizadek i za soba go Abra-am, do ia ne, mata go i ko bana eso loborona tokama qira popodo ia Abra-am torana ṉalu nae.

¹¹ God i valame ze Tamana ia de iri koego vano Izirel, de iri koego vano patere iri podo mego sinaqe ia Livae. Ṉalu go zazu ria patere ro dena tara va veleka ne qira basoero ne, iki tora kaega kaki sinaqe patere tara lama napu? Do tanego zazu ria patere ro de iki velaka kaega, iago kaki sinaqe patere i lama napu, iki gere kaega Aron, do i gere Melkizadek.

¹² Ṉalu God i kavala qira go patere ro dena ne, Tamana ro tina kavala napu go.

¹³ Aria Batu ita ne, iato Buka tabo ne i pepeua go, ia i reqe me sinaqe kakavata, mana kaega kaki basoe na sinaqe ia i zazu patere go.

¹⁴ Osiqita qata rove Jesu i podo gome sinaqe ia Jiuda. Ṉalu Mosese i pepeu qira patere ro, iki pepeua so kaega kaki pata sauna sinaqe ia Jiuda.

Kaki Patere Napu I Gere Melkizadek

¹⁵ Zazao na pataro dena i tatavata meto, kaki patere i lama sadaka, napu, i gere Melkizadek.

¹⁶ Go iara Patere go, iriki vine ze kaega ia loborona tamana ria vana basoe ba vivine tusi, na sinaqe na patere go, do ia i patere e loborona karaputa na too iki rove go kaega lupo.

¹⁷ Tanego Buka tabo ne igo, “Aro tono ko patere osina ṉalu, loborona sinaqe patere ia Melkizadek.”

¹⁸ Iago tamana bana ro ne iri vakuziki ne, tanego i pela mana i patavolomo go.

¹⁹ Tanego Tamana ia Mosese i makuru tina vavelake kaki pata. Do ninidena God i papaqa kameka zuka qata mazala vanadu ze na nanao qita mana i vagarogaro qitae de ikoego God.

²⁰ Mana kakia pata napu, God i sine vakaraputa bana odo odo ia. Tanego ṉalu basoero na sinaqe ia Livae iri vine va patere qira go ṉalu bana ne, God iki zazu ne kaega kaki odo odo.

²¹ Do Jesu i lama patere ṉalu God i odo odo ne, igo, “Batu ne i vanadua seko i pui ne go, mana tiniki pala vaule kaega go, igo de, Aro tono ko patere osina ṉalu.’ ”

²² Pui i pala go Jesu i lama ogoto e de qata koego, i lete velaka, mana i sivala ne pui bana ne.

²³ Iko kaki pata i ko ninidena, iki gere kaega de bana ne, de bana ne topu kero ne patere ro iri ko, iri basoe so, iri le, mana i makuru qira pala vanadu na zazu ro ria.

²⁴ Do Jesu i ko osina ṉalu, mana zazu patere ia ki ara vakava ze kaega kaki basoe go.

²⁵ Ninidena, mana osina ṉalu i mazala vakavele qira basoero iri zae de ikoego God tanego Jesu i ko osina ṉalu mana i mazala pene ne qira de ikoego God.

²⁶ Jesu to i batu Patere ita tina tavisi ne qita go. Ia i tabo, i kaega ne kebu ba vasakata pata, God i taru vakakavata ze ia de iri koego vano vasakata pata go, mana God i taru vakakavata ze ia rani ne.

²⁷ Ia iki gere qira kaega kero ne batu Patere ro iri zazu komakoma go osina ṉalu, kenaqana iri zazu komakoma ne tanuqira go tarina dalo mana taramuzina iri zazu komakoma ne va dalo na vasakata pata ria kerone basoero go. Do ia ne i zazu neso kameka komakoma, iato ṉalu i teke go tanuna de ikoego Tamana, mana komakoma dena i pata ko sivala go.

²⁸ Tamana ia Mosese i vine qira basoero so iri mazala go batu patere, vano i kaega ne qira karaputa mana iri mazala so vasakata pata go, do pui ia God i lulua go odo odo ia tanuna i lama doka go taramuzina Tamana ia Mosese, i vine Sale ia, iato i dalo bana mana ko totoloṉo osina ṉalu.