Iburu 6 - Vato Vari Vakameka Voru Ia Batu Ne

¹ Ita mata ziki napu za, mata pala varivatatana i tora qira go vano i lavata bana go vaogoto ria, mana mata taru ze muzi qita varivatatana qata gata kenaga bana go. Mata kasi varivatatana napu ne pata qata rove bana go, gere dego qata mazala go vana ne vatovato sakata ro i mazala go vae vale qita, mana dego qata mazala go vaogote na God.

² Varivatatana na zazao na bapitema, vakapata zena karisi de iri koego kero ne basoero, de go vano le tarina too napu me, mana varivatatana na de go God tina zazu ne go vivine ia musaqara muzimuzi go.

³ Ṉalu God tara vamao, ita mata ziki, mana iato nae pataro tatana varivatatana ne go.

⁴ Do ava tarina go ria iri tabali kakamu ne Kristo, tarina tabali ule mana manava sakata go? Tanego basoero nae iri ko bana eto tatavata ia God, mana iri pala bana soso i teke qira go God i reqe me rani ne, mana Spirit tabo i lama ko tavisi bana qira go,

⁵ iri lete rove bana seko ia God i lete velaka, mana iri gatarove bana karaputa ia tina lama miasoka go osina ro pata ne.

⁶ Mana iri tabali kakamu ne vaogoto ria de ikoego Kristo. I makuru kaki basoe tina tavisi ne qira, go tarina nanao ule napu go, tanego igere iri paqi paqi napu ze koluse ne Tuna God mana iri va agava ze ia tarakenaqa qira basoero topu.

⁷ Ṉalu kaki pua i soru velake go nare ne, pua nae tina mazala va ure velaka me pata leba leba, mana tina vakula basoe i leleba ego, mana God tina vamakaole pua nae.

⁸ Do ṉalu pua nae i vapodo me lozo mana vosuvosu go, pua nae kapata iki torato kaega, God tina tulaṉa ne pua nae, mana nako tina subi vasakate go.

⁹ Vakitaka ro era, patavolomo tane qa sine ne qamu go seko ro dena. Qi rove velake ramu tamuna pala makaolo ia, iato i vari vakavele ramu go.

¹⁰ Ṉalu God i zazu ne vivine ia, iki tavisi kale kaega. Iki nanao kasupe ne kaega zazu qamu zazu ne go ba mamaligara qamu vasadaka ze go de ikoego, ṉalu qamu teke go sosovolomo ramu de iri koego kero ne vano lotu.

¹¹ Remu qi lete soko osiqamu muna palataru vanadua vaogoto ramu, go na doka go, ṉalu pata qamu ala nego tina lama doka ogoto go.

¹² Remu qiki soko kaega ramu tamuna muaka, do muna gere qira vano iri vaogoto go mana iriki pela ne go kaega piri, mana loborona to zuka dena iri pala ze go pata i pui bana nego God tina teke ne qira go.

Pata i Pui Nego God Tina Sadaka Me

¹³ Ṉalu God i zazu nego pui ia de koe Abra-am, ia i odo odo tina zazu bana neso pata i pui nego. Tanego i kaega napu kaki basoe i sivala ne ia, God iva zazua so vitoṉona tanuna ṉalu i odo odo go.

¹⁴ Igo de, “Pata ogoto era tuna vatabo go mana tuna va topua popodo aro go, iato de pata qa pui ne go na teke ni go.”

¹⁵ Abra-am iki va nula kaega piri, iago Abra-am i pala to pata i pui ne go God.

¹⁶ Ṉalu kaki basoe i odo odo go, ia tina vitone basoe i mazala sivala ne tanuna, mana odo odo nae tina vabule go osina vari valegu go.

¹⁷ God i soko vatatavata ne qira basoero tarina pala go pata i pui ne go, ia tiniki ara kavale kaega nanao na, iato go i odo odo ne go pata i pui ne go.

¹⁸ Karua seko dena i makuru kavala na, mana loborona karua seko dena God iki mazala kaega tina poqe go. Iago ita qata lama soba bana go de velaka de koe God, mata va karaputa nanao qita mana vanadua pata i pui ne qita go God.

¹⁹ Tanego qata vanadu ze nanao qita sauna pata i pui ne go God, i gere kaki likoto i vanadua go too ita. Likoto dena i nadu mana i makuru vaziki na. Pata i pui nego God i za dokae kene tepa na poga iri vaidoko midiki ze kovo tabo tabo ne, iato i koego rani ne.

²⁰ Go tina tavisi ne qita, Jesu i kenaqa bana za de igogo, mana i za batu lavata ria patere loborona sinaqe patere ia Melkizadek mana zazu patere ia tiniki rove kaega lupo go.