Iburu 5 - Vato Vari Vakameka Voru Ia Batu Ne

¹ God i mazala vine na kaki valeke loboro qira basoero iago tina batu ria go patere ro. Zazu ia basoe nae tina osaka ne God, mana degere ne qira basoero go, zazu ia tina komakoma mana teke God sosovolomo, sauna vasakata pata ro ria basoero ne.

² Tanego batu ria patere ne i pela napu eso topuna pataro, ia mara pada ne nanao rove velaka na, ṉalu go kake ria iri zazu ne pata kebu ro, tanego iriki nanao rove kaega.

³ Tanuna do i pela napu so, iago ia tina zazu ne komakoma, iki sauna so kaega vasakata pata ria basoero, do vasakata pata napu ia tanuna go.

⁴ Kaega kaki basoe imazala vine na tanuna tina pala go mazala go tina batu ria patere. Tanuna so God i mazala vine na basoe tina batu ria go patere gere de igogo i vine bana go Aron.

⁵ Varipadana so de ikoego Jesu, ia iki vine ze kaega tanuna tina batu ria patere ro. Do God tane i sine ne ia, “Aro qo Sale era, ninidena to era qa Tamamu aro.”

⁶ I sine napu ze kaki dia Buka tabo ne, “Aro tono ko patere osina ṉalu, loborona sinaqe patere ia Melkizadek.”

⁷ Ara too i vaego Jesu vudu pua, ne, ia i dae valavata mana i sone matana ṉalu i pepene ne tanuna mana kero ne basoero de i koego God, go mara vakavele ze ia tepa ia le. God i gata ia tanego Jesu i vaqoqore tanuna de koe God mana i osaka ne God go.

⁸ Do patavolomo Jesu i tuna go God ia i pala vokara, mana loborona to vokara dena to i varove ze ia de go vaogote na God.

⁹ Ṉalu i valupo to osina zazu, God i vazakazaka ia, iato i vari va kevele ogoto, ria iri toqe ne ia tarina pala too i ko sivala go,

¹⁰ Mana God i vasadake Jesu i batu ria patere ro, loborona sinaqe patere ia Melkizadek.

Kasi Pela Ne Vaogote Na Kristo

¹¹ Iko topuna pata qi mazala sine ne qamu de go Jesu i batu ria patere ro gere na Melkizadek, do i makuru vatatana qamu tanego nanao qamu i losi tepa ia nanao rove na pataro dena.

¹² I lete umata to ṉalu ramu qamu gata bana go seko ia Kristo, i tora to ramu tamu vano varivatatana go, do ramu qamuki rove so kaega, qamu soko napua so kaki basoe tina vatatana qamue go, pataro qamu gata kenaqa bana go sauna Kristo. Iago qamu, gere qira salero iri susu go, i makuru qira go ge na pata gege i magoro go.

¹³ Basoe i susu go, iara sale medara so, mana iki mia rove kaega dego i ogoto ba poqe go varivatatana ro.

¹⁴ Do ka basoe i ge go patagege i magoro ne, i basoe lavata to, imazala to mia rove na pataro i sakata go, mana pataro i velaka go.