Iburu 2 - Vato Vari Vakameka Voru Ia Batu Ne

Vari Vakavele Lavata

¹ Iato dena to kutamana, iago ita mata pala taru vanadua ogotona pata qata gata go, go tataniki zaza kakavata go kaega.

² Seko iri soso bana ne go aqelo ro ne de iri koe vano ṉalu bana ro ita, i lama ogoto, ka basoe iki lulua kaega ba ki vaogote kaega tina pala lepulepu ia vatora ze legulegu ia.

³ Iago avigo? Mata paqa ne, tanego qatiki mia rove kaega vari vakavele lavata ne? Tanuna Batu ne i sine vasadaka kenaqe go vari vakavele dena, mana ria iri gata bana go, iri vasadake go i pataogoto bana.

⁴ Tanuna God i vakaraputa napua seko dena loborona ro zazu mazala ro mana zazu vari vapoloso go, mana kenakena na sosovolomo i reqe me Spirit tabo de koe basoero i soko go tanuna.

Jesu Tina Kenaqa Qitae Go Vari Vakavele

⁵ God iki taru qirae kaega aqelo ro tarina kenaqa ne kolabana pua voru tinara lama go, iato kolabana pua qata seko nego dena.

⁶ Do kaki dia loborona Buka tabo ne igo, “Avana tane basoe, go aro God qo nanao vokara ne qira ba mia soka qira go na? Kaega so kaki pata velaka ikoego de iri koego basoero ne.

⁷ Desuka so ṉalu qo taru ze ia pola qira aqelo ro, do ninidena qo vazakazaka vitoṉona mana qo teke ia karaputa mazala aro,

⁸ mana qo va mia soka ze ia osina ro pata.” Iago God, i vamiasoka ze ia osina pata loborona karaputa ia, ianae talupasana osina to pataro. Do ninidena ita qatiki mia kaega basoe i kenaqa lupo ne osina ro pata.

⁹ Do ita qata mia Jesu, iato Jesu dena God i taru ze ia pola qira aqelo ro desuka so ṉalu, go ia loborona manava ia God, ia tina le sauqira osiqira basoero. Ninidena qata mia ia God i vazakazaka vitoṉona mana i teke ia karaputa mazala ia, tanego i sauna to le i vokara ne go.

¹⁰ God i vazaria go osina pata mana i bara ne tanuna go, i soko pala qira salero ia tarina lama teṉo tavise ia tepa rani ne. Iago i totoloṉo so i vazakazaka ze Jesu zuka igogo ne i vokara go tina vakavele qira go basoero iri lulua go ia.

¹¹ Basoero iri vasakata pata go iva dalo qira, iago Jesu mana ria i vadalo qirae go vasakata pata ne i kameka so Tamaqira. Iato go Jesu iki agava ne kaega koru qira e togaquro ba kaequro.

¹² I sine ne God, “Tuna sine ne qira ria qi tamakena ro pataro qo zazu ne go aro. Era tuna vazaka go aro, ṉalu timuna teṉo ne vazaka.”

¹³ I sine napua, “Tuna taru ze ruruqe era dekoe God,” mana i sine napua, “Era to dena qa ko tavisi qira salero i teke nava go God.”

¹⁴ Salero iri vane qira go ne, basoero i ko go manu mana parasa qira, Jesu tanuna i basoe napu so mana i podo napue so vudu pua go. I lama basoe, go le i vae go koluse ne, i vasakate Satana i kone go karaputa tepa ia le, karaputa i mazala go vae vale na basoe.

¹⁵ Iva ko talupasa qira basoero, iriki ko talupasa bana go kaega loborona too ria, tanego iri sareki ne le.

¹⁶ I tatavata so, iki lama ne kaega go tina tavisi ne qira aqelo ro, gere na so ikoego Buka tabo ne, “I tavisi ne qira ria popodo ia Abra-am.”

¹⁷ Iato go i tora ia tina vanadua mana osaka ne zazu ia de koe God gerena batu ria patere, go vasakata pata ria basoero ne na nanao ule ne qira.

¹⁸ Mana ninidena Jesu i mazala to bara ne qira basoero i lama pada ne qira go Satana, tanego Satana do i pada bana ne ia, go i vokara bana go.