Iburu 12 - Vato Vari Vakameka Voru Ia Batu Ne

God I Tamaqita

¹ De qata koego ita ne, iri ko liqutu qita topu ria basoero iri vasadaka bana go vaogoto ria de ikoego God. Iato go ita mata vana ne osina pata i va makuru qitae go vaogote na God, mana mata vana napu ne zukazuka na vasakata pata go, mana mata teteṉe va moqere van vose i kome go kenaqa qita go.

² Mata reṉa taru vanadu ne Jesu, tanego de koe ia i tupi e mana i valupolupo ego vaogoto ita. Ṉalu ia i le go koluse ne, iki pela ne kaega, “Kaega to,” tanego la i nanao va mazala zaqe kulakula iara ko mego, iki nanao vamazale so kaega vokara mana le i pala ze go koluse ne, la to go ninidena i kolokue tepa matauna God mana i vatovato tavisi ne rago.

³ Muna nanao zaqe dego Jesu i vanadu go, ṉalu vano vasakata pata iri vasasakata ne go, iago ramu muniki vaqoqore tanuqamu mana kasi pela go.

⁴ Degere vanadu mana bara ne tanuqamu tepa ia vasakata pata, tanego i kaega ka basoe i le ne go varitara nae.

⁵ Avigo qamu nanao kasupe ne seko vari vakaraputa i sine go God, igo qamu salero ia? Igo, “Tuqu, ṉalu Batu ne i Vatotoloṉe vatovato ba too qo va kebua go, kasi nanao na i patavolomo so ṉalu i seko vamoqere ne kebu ro aro, kasi va sakate na nanaomu go.

⁶ Tanego Batu ne i vatotoloṉo qira basoero i mamaligara ne qira go, mana i valepulepu qira ria i toqe ne go tarina salero iago.”

⁷ Degere vanadu mana vamao ne God mara vatotoloṉo qamu, ianae i vasadake God i miataru qamu gere na Tamaqamu. Avigo i ko kaki sale, iki rove to kaega zazu ne kaki vatovato kebu, mana tamana iki sine vatotoloṉo ne kaega ia ba?

⁸ Ṉalu God iki valepulepu qamu kaega, gere qira sale ro ia, ianae talupasa na qamuki salero ogoto ia kaega God, do qamu salero na so zukazuka ro.

⁹ Loborona too ita vano basoe, Tamaqita ro iri valepulepu qita, do ita qata vamazala qira. Do avigo Tamaqita ikoego rani ne? Ita tatana vamazale ia, sivala ne vamazala qata vae ne qira go Tamaqita ro iri koego pua dena, go tatana pala go too ogoto.

¹⁰ Ria Tamaqita ro iri koego vudu pua ne iri vatotoloṉo qita so ṉalu pusi, tanego iri lulua so nanao qira, do God ni vatotoloṉo qita go, i tavisi qita go tatana ko tabo gere na tanuna.

¹¹ Ṉalu qata lepulepu, i gere kaki pata i lete va maqata qita, qatiki kula kaega, do taramuzina ria iri vatotoloṉo qira ego lepulepu nae tarina za pala voli na too totoloṉo.

Seko Vari Vatarove Mana Vabanabana Go

¹² Kazara vazakazaka ne karisi qamu i tamadoko go, mana va totoloṉe tutuṉuqamu ni nenedere go!

¹³ Zaza e zuka totoloṉo, go make i le go tiniki ara le kaega do tina velaka ule napu.

¹⁴ Padane koena loborona bule osiqamu, mana pada ne koena too i tabo go. Tanego kaega kaki basoe i mazala go mia na God ṉalu iki lulua go kaega too velaka.

¹⁵ Muna mia soka tanuqamu, go muniki tabali kakamu ne Mana ia God. Muniki gere moki i pani go, mana i mazala go vasakata qira kero ne basoero go.

¹⁶ Kaega ka basoe mara zazu ne zazu sakata ro ba ki nanao vamazale kaega God, gere na Isua ṉalu ia i lete saqo go, i volivoli vakava ze Jekop sosovolomo ia, gere sale valeke kenaqa.

¹⁷ Taramuzina qamu rove, ia i soko pala na vatabo ia tamana, do tamana iki teke ne kaega ia. I kaega napu to kazuka Isua i mazala go kavala zena kebu i zazu bana nego, ia i dae mana i taqia zuka go mara kavala ze igo do, i makuru to.

¹⁸ Ramu qamu ki gere qira kaega vano Izirel iri zadoka banae go Kubolo Sinae, iri mia nako lavata i uqulu go, mana rodoko lavata i sapua osina pataro mana seva lavata i kikiuru go,

¹⁹ vari vaiqi na kuvili, mana naki na kaki ovaṉa go. Ṉalu basoero ne iri gata ovaṉa ne, iri pene, iriki ara soko napua to kaega gata na.

²⁰ Tanego iriki soko kaega gata na seko tamana lavata i gogo, “Ṉalu kakia pata qaraqara i siba go kubolo ne, muna vana vale ze ipaka.”

²¹ Ṉalu Mosese i mia pataro i sadaka go, i lete sareki, igo, “Era qa lete sareki mana qa nenedere go.”

²² Do ramu, qamu doka banae to kubolo Zaion, mana komala lavata ia God i too go, Jerusalema ikoego rani ne, de iri koego mao ria aqeloro.

²³ Qamu lama kula tavisi qira basoero iri kameka qoqoṉo go gere qira salero podo kenaqa ia God, vitoṉo qira i ko banae buka na rani ne. Qamu lama dokae de koe God, ia tina zazu ze vivine ia de iri koego osiqira basoero. Qamu lama vakameka ne madau qira basoero iri totoloṉo bana, tanego God i va basoe totoloṉo bana qira.

²⁴ Qamu lama dokae de koe Jesu, ia i vanama go vari toqe voru, mana parasana ia i va voru bana qita go, i vasadaka me topu na pata velaka, sivala ne parasana Ebolo.

²⁵ Iago muna miasoka, muniki kasia gata na seko ia God, ria iri kasia go gata na seko ireqe me de ikoego God, i makuru tarinara paqa go. Iago, avigo tatana paqa ne go lepulepu, ṉalu qata tabali kakamu ne ia, ṉalu i seko me tepa rani na?

²⁶ Kokoso na me, seko ia God i vizua vudu pua ne, do nini dena i vanadua seko ia igo, “Kaki ṉalu iara ko mego, era tuna vizu napua vudu pua dena, do ṉalu nae, miki vudu pua dena so kaega tina vizu go, vudu rani do tina vizu napua go.”

²⁷ Seko i sine go God igo, “Kaki ṉalu napu” i vasadake pataro i vazaria go tina vizua mana pala vazikia go, ba pataro i makuru go va vizuna tina ko so.

²⁸ Ita mata seko velake God, tanego ita qata koe de ikoego vari miasoka ia God i makuru go vizu na. Sauna to ianae, ita mata seko velake God mana vazaka ze ia loborona zuka tina vakula go ia, loborona va tabo tabo mana vamazala go,

²⁹ tanego God ita, i gere nako lavata i mazala subi lupo na osina pata.