Iburu 11 - Vato Vari Vakameka Voru Ia Batu Ne

Vaogoto De Koe God

¹ Ṉalu qata vaogote go God, qata taru ze ruruqe ita de ikoe pataro i pui nego God, patavolomo qataki mia kaega, do qata rove i ko.

² Tanego basoero kakazigarata ṉalu bana iri vaogote God, iago God i va mia qirae kula ia.

³ I sauna vaogoto ita qata vaogote go seko ia God i vazaria go kolabana pua ne. God i vazazua pataro qatiki mazala go kaega mia na, go tina zazu ne zego pataro qata mia go.

⁴ I sauna vaogoto ia, Ebolo i teke zaqe komakoma velaka ia de ikoego God, i sivala ne komakoma ia Ken. Loborona vaogoto ia Ebolo, God i toqe ne komakoma i soso ne go Ebolo go. Ebolo i le bana, do de igogo vaogoto ia, iara seko eso de qata koego ita ninidena.

⁵ I sauna to vaogoto ia, God iki vamao ne kaega Enoke tina lego, iato go God i pala vapopoka zaqe ia rani ne mana kaega ka basoe i soba ia tanego God i pala vapopoka bana ia. Karo ikoego Buka tabo ne igo, tarakenaqana go God i ara pala vapopoka zaqe ia rani ne, Enoke, i zazu ne pataro i vakula go God.

⁶ Kaega ka basoe i mazala vakula na God ṉalu ia iki vaogote kaega ia, tanego basoe i soko go lama garogaro na God, ia tina vaogote God i ko, mana tina vaogote God tina tekene qira voli ria iri taqia go tanuna go.

⁷ Loborona vaogoto ia, Noa i vaogote seko vabanabana ia God sauna pataro iara komego, mana pataro iara kaebo mia na go. Noa i zazu ne kameka koluka mana iva kavele ze ko tatamana iago. Tanego Noa i tatadaṉa e de ikoego God, iago i vasadake basoero na vudu pua ne iri vano sakata, iago God i va sadake Noa i valeke totoloṉo tanego Noa i vaogote God.

⁸ I sauna to vaogoto ia, Abra-am i lulua koru ia God go tina zae go vudu i pui ne go God. Abra-am i kasi ne vudu ia, mana iki rove kaega adepa tina za koego.

⁹ Loborona vaogoto ia, i za ko gere qira vano na vudu kakavata loborona vudu i pui ne go God. I koe so loborona pade iri pala zazao ne, gere qiru so Aisak mana Jekop iru pala napua so pui i gogo ne de ikoego God. Osiqira tarapisa ne iri vapade neso pade iri pala zazao ne go.

¹⁰ Tanego Abra-am i piri neso za koena komala lavata tina pada mana vadegere go God, komala lavata dena tina ko osina ṉalu, tanego tanuna so God i zazu nego vatovato na mana i vadegere go.

¹¹ Tanego Sera i vaogote God, patavolomo i maqota, do ia iko ne sale. I toṉove kameka sale tanego i vaogote God i zari go pui ia, igo, God tina teke bana nava so pata i pui nego.

¹² Abra-am i valaka to mana i garogaro ne to le go, do popodo ia iri lete topu sasakata mana kaega ka basoe i mazala go qana qira. Iri gere topu qira domiri na ro zakazaka ne mana karakoni na rikisi masi go.

¹³ Basoero dena iri vaogote God, gogo i doka ṉalu iri le go, loborona ara too iri vaego iri ara kaebo so pala na pata i pui ne go God, do iri ko valaqalaqa mana iri kula ne zaqe so, mana iri sine vasadake iri go, remu qi basoero na vudu kakavata mana qi basoe zazu so go, iri go.

¹⁴ Basoero iri sine go seko dena iri sadake iri soko dokae na vudu ria tanuqira.

¹⁵ Nanaoqira ne iki ara ule za kaega vudu ogoto ria iri kasi bana mego. Ṉalu go tara ria nanao ule zaqe go vudu ogoto ria iri kasi bana ne go, i lete malumu ne qira so ule.

¹⁶ Do kaega, ria iri le ne vudu voru iato rani ne. Mana God iki agava ne kaega tarina koru ze ia God ria, tanego i vanama ne qira kameka komala lavata ria.

¹⁷ Abra-am i vaogote God, iato go i toqe ne komakoma ne na kameka sale ia Aisak, ṉalu God i pada ne ia. De koe Abra-am God i zazu ne ze pui ia, do Abra-am i vanama neso komakoma ne sale ia.

¹⁸ God i sine ne ia, “De ikoego to Aisak tina podo ego popodo aro naqa pui bana ne go.”

¹⁹ Abra-am i nanao rove God i mazala vatoo ule me Aisak tepa le, mana qata mazala so sine na, Abra-am i pala vaule ze Aisak tepa le.

²⁰ Aisak i vaogote God iato go iva tabo qiru go Jekop mana Isua, loborona vatabo na too velaka riru ṉalu muzi.

²¹ Jekop i vaogote God, iato go i vatabo qiru karua sale ia Josepo ṉalu i garo garo go le, ia i soso vatabo qiru. Ia i Tatadane moki sisikulu ia mana i vazaka God.

²² Josepo i vaogote God, iato go ṉalu i garogaro go le, i sine vasadake de go vano Izirel tarina kasi ne Izipito, mana i sine ne qira tarina pala urina ṉalu tarina zaza go.

²³ Tamana mana sinana Mosese iru vaogote God, iato go iru pika go Mosese torana kapisa inaqa pasi podo i vae go. Iru mia sale ne i menomeno iago iruki sareki ne kaega legu na tamana ia batu Pero.

²⁴ Mosese i vaogote God, iato go ṉalu i lavata go ia iki soko kaega tarina koru ze ia tuna sale qole ia batu Pero.

²⁵ Ia i nanao tina kimata tavisi qira basoero ia God, tanego iki soko kaega ko kula ena vasakata pata, ko kula nae iki umata so kaega.

²⁶ Ia i nanao zaqe ṉalu God tina teke nego sasarapana, iato go, patavolomo basoero ne tarina vasasakata nava, gerena so de i vane go Mesia ne, vari vasasakata nae, i lete sivala ne osina pata velaka ro ikoego Izipito.

²⁷ Mosese i vaogote God, iato go iki sareki ne kaega batu Pero i lete muma go ṉalu i kasi ne Izipito i gere kapata i miasoba go God, i makure go basoe tina mia ze mata qira, iago i kasina ara ule go.

²⁸ Loborona vaogoto ia de koe God, ia i vatupia go musaqara lavata na Pasova, i sine ne qira basoero ne tarina sapi ze parasana pata qaraqara iri puare go siporaṉa na pade ro ria, go ṉalu aqelo tina turine me God tiniki lama vae vale qira kaega sale valekero kenaqa ria vano Izirel.

²⁹ Vano Izirel iri vaogote God, go tane i kadala go masi mesara ne go iri kava ego, do ṉalu vano Izipito iri soko kava gere qira vano Izirel, masi ne sapu lupo qira so.

³⁰ Basoero na Izirel iri vaogote God, iato go iri papale go bara lavata na komala Jeriko, iri liqute komala Jeriko torana kavitu musaqara.

³¹ Qole vari vagabu, vitoṉona Reab i vaogote God, iato go iki le palu qira kaega basoero iri legulegua go God. Ia i vagado velaka qiru karua valeke kakavaro ria vano Izirel.

³² Qa mazala so pepeu valoda napu na, do i pusi ṉalu iago i makuru tuna pepeu napua, Qidioni, Baraki, Samsoni, Jepita, Davita, Samuela mana propetano go.

³³ Basoero nae iri vaogote God iato go iri vaqoqoro lupo qira kero ne vudu ro ṉalu iri varitara go. Iri zazu ne pata velaka ro mana iri pala pata i pui ne go God. Iri kokoqua saqena laioni,

³⁴ iri vae vale nako i lete uqulu go, iri vasivala ne ṉalu iri vele tolu koboro qira e peqi loda ne. Iri pela, do iri karaputa napu, iri lete karaputa napu iri varivavae mana iri taru vaqoqoro qira degara na vudu kakavata ro go.

³⁵ Qolero iri vaogote go God, iri pala vaule napua sale ro ria ba vano vano ria iri le bana go. Do kero ne basoero napu iri vaogote go God, iriki toqe ne kaega ko talupasa, mana iri le loborona vari vae vale i sakata sivala, go tarina pala too velaka ṉalu muzi.

³⁶ Kakiaro ria iri vakari ne qira mana sima qira go. Kakiaro ria iri qolo qirae seni mana taru qirae bara ne.

³⁷ Kakiaro na iri vana vale qira e ipaka, mana vela vari lobon ne qira, kakiaro na in vae vale qirae pegi loda ro. Kakiaro ria i kaega ne qira poga lago iri va baribari neso kapoto na sipi ba nanikoti, tanego iri situ, in vasasakata ne qira mana in vasasakata ne tokama qira go.

³⁸ Ria dena iri basoero velaka, basoe volomo na vudu pua dena iriki vakitaka velaka qira kaega, iago iri vano zaza so, i kaega komala na, iri koeso de i kadalesaṉa mana kubolo ro, in koeso leṉa ro mana bolu na pua go.

³⁹ Osiqira ria ne, iri vaogoto lupo so God lago God i seko velaka ne qira. Do iri ara kaebo pala na pata i pui ne go God.

⁴⁰ Tanego God i nanao bana pata tina velaka sivala ne qita osiqita, God i soko tarina piri ne qita mana ita tatana totoloṉo e tarakenaqana ia.