Iburu 10 - Vato Vari Vakameka Voru Ia Batu Ne

Komakoma Ṉalu Bana Iki Vakuziki Ne Kaega Vasakata Pata

¹ Tamana ro ia Mosese, iki dudule ogoto na kaega pata ogoto ro i ko go, i gere so dudule na pata velaka ro tinara sadaka me. Kameka ado na so komakoma iri zazu nego osina ave, iago ava tina go tane Tamana na de go komakoma ro dena tina vatotoloṉo lupo qira go basoero iri lamae de i koe God na?

² Ṉalu basoero iri vazaka go God, iri vadalo ze too ria tepa ia vasakata pata, ria tariniki ara agava ne kaega vasakata pata ro ria, mana osina komakoma ro iri za zazu ne go tina mamanava lupo go.

³ Do iki go kaega nae, osina ave iri zazu ne go komakoma ne, iva nanao taru qirae vasakata pata ro ria.

⁴ Tanego parasana buluka mana nanikoti i makuru tina vatalupase go vasakata pata.

⁵ Iata go sauna to pataro dena, tarakenaqana Kristo iara lamae go vudu pua, ia i sine ne God, “Aro qoki soko kaega komakoma mana soso ria basoero go, do aro go vanama nava era kameka tokama.

⁶ Aro qoki kula ne kaega ṉalu tutukununa pata qaraqara ne iri koma ze popokona sara ne, ba komakoma sauna vatalupase na vasakata pata go.

⁷ Mana ninidena qa go, ‘God, era to dena, qa lama go tuna zazu ne pataro qo soko go aro. Gereso de iri karo ze go sauqu era loborona buka na Tamana ne.’ ”

⁸ Kenaqana, Kristo i sine komakoma ro i lulua go vatovato na Tamana ia Mosese. Ia igo, “Iki soko kaega pata qaraqara iri vae mana komakoma ze popoko na sara ipaka ne, mana komakoma sauna vatalupasena vasakata pata.” Ia i sine pata dena, do pata ogoto Tamana i sine osina komakoma tarina soso ne.

⁹ Taramuzina ia igo dena, “Ke God, era to dena, qa vanama neto zazu ne pata qo soko go aro.” Sauna to pata dena, God i pala vakuziki ne vatovato bana na komakoma dena mana i kavala ze komakoma ia Kristo.

¹⁰ Tanego Jesu Kristo i zazu valupo banato pata i soko go God, tina zazu nego ṉalu ia i vamao go tokamana go ile go koluse ne, ia i komakoma ne tanuna kameka so ṉalu, sauna to zazu dena God i va dalo qitae ita loborona vasakata pata ro ita go.

¹¹ Osina musaqara patere ro ria vano Jiu iri zazu ne zazu patere ro ria, iri soso ne kameka ado na so komakoma, do komakoma ro dena iki vatalupase kaega vasakata pata.

¹² Do Kristo i zazu neso kameka komakoma, mana komakoma ia dena i koe karaputa go tina vatalupase go vasakata pata mana taramuzina nae ia i za kolokue tepa karisi matauna God.

¹³ De go, ia i ko mana piri, go tina doka ṉalu God tina taru qirae kana ro ia polana makena.

¹⁴ Minena so kameka ṉalui komakoma ne tanuna, Kristo iva totoloṉo qira osina ṉalu basoero iri dalo bana ego vasakata pata ro ria.

¹⁵ Spirit tabo i sine napu ne qita so, kenaqana igo,

¹⁶ “Iato dena varitoqe tina zazu ze de iri koego musaqara ro tinara lama go, igo Batu ne. Tuna taru ze Tamana ro era loborona puṉuqira mana karo ze nanao qira go.”

¹⁷ Mana i sine napua, “Tuniki ara nanaotarua kaega vasakata pata ro ria mana zazu sakata ro ria go.”

¹⁸ Iago ṉalu God i nanaoule ne vasakata pata ria basoero ne, iki ara tora kaega ka basoe tinara zazu ne komakoma go na vatalupase go vasakata pata.

Mata Za Garogaro God

¹⁹ Iago turaquro, tanego parasana Jesu i va voru bana qita, qata mazala so keba zana kova i lete tabo sivala go.

²⁰ Jesu i papaqa bana ne qita zuka voru, zuka i koe too, zuka dena igo za loborona poga lavata i kokoqua go kova lete tabo ne. Do Jesu i papaqa bana ṉalu ia ile go koluse ne.

²¹ Ita i kone qita kameka Batu lavata ria patere ro i miatarua go basoero ia God.

²² Iago ita mata za garogaro God, tanego nanao qita i dalo mana vaogoto ita i karaputa. Nanaoqita i poṉo ego vasakata pata, tina vavoru ze parasana Kristo, mana tokama qita tina dalo tanego qata seqe ne besi voru.

²³ Mata pala taru vanadua vaogoto qata seko bana nego, tanego ita qata rove God i vavoto pataro i pui ne tina zazu ne go.

²⁴ Mata vari mia lote osiqita, mata vari vatatavisi, mata vasadake mamaligara, mana zazu ne zazu velaka ro go.

²⁵ Iki velaka kaega tatana vana nego kameka teṉomana pepene go, gere qira kakiaro basoero iri kogo, osina ṉalu mata ko vari gatagata go nanaoqita tina karaputa go, tanego qamu mia musaqara ia Batu ne, i lama garogaro to.

²⁶ Tanego i kaega napu kaki komakoma tina vatalupase go vasakata pata ṉalu ita qata zazu taru ne go vasakata pata, tanego qata rove bana to seko ogoto na Kristo.

²⁷ Ṉalu qata gogo nae, kameka so pata i ko go tatana piri mana sareki ne, iato ṉalu God tina lama valepulepu qita mana nako lavata tina lama vaevale qira ria iri kana nego ia.

²⁸ Ṉalu kaki basoe i legua go Tamana ia Mosese, gonae karua ba kapisa basoe iri degere ne ia i pata ogoto go, kaega ka basoe napu tinara nanao ule ne basoe nae, mana tarina vae vale iago.

²⁹ Ṉalu igogo nae, ava na tina doka go ṉalu kaki basoe i mia vaqoqore go tuna God? Mana i va patavolome go parasa na varitoqe ia God i vadalo go vasakata pata ia na? Mana i seko vasakate Spirit i soso ne go makaolo? Nanao zaqe, ava tina lete goto ka vokara na kimata tina pala go basoe nae.

³⁰ Osiqita qata rove bana God igo, “Era tuna toli vaule napua, tuna kavala napua so pata sakata ro iri zazu nego”, mana i sine napua, “Era Batu ramu, tunara zazu ze vivine de iri koego basobasoero era.”

³¹ I kaki pata i lete vari vasareki sakata basoe tina soru za go karisina God i too sivala go.

³² Muna nanao ule zaqe pataro i sadaka bana mego. Ṉalu tatavata ia God i lama sadaka qamu go, ṉalu nae ramu qamu kimata ne topuna pata, do pataro nae iki va noto qamu kaega ramu.

³³ Kakiaro ṉalu iri pepeu vasakata qemu mana va velaka ne qemue kaega tarakenaqa qira basoero ne. Mana kakiaro ṉalu napu qemu degere tavisi napu qira so basoero iri vasasakata ne qira go.

³⁴ Ramu qamu kena tavise vokara iri pala go vano iri koego bara ne, ṉalu iri pala lupo qamue go pataro qamu toṉove go, do ramu qamu kula so, tanego qamu rove bana i ko ne qamu kaki pata i lete velaka sivala mana tina ko osina ṉalu go.

³⁵ Iago, kasi memelaka, tanego ṉalu qamu pala tarua karaputa nae, God tina teke ne qamu voli lavata.

³⁶ Ramu muna degere vanadu taru so, go tamuna zazu nego pataro i soko go God, go tamuna toṉove go pata i pui bana nego God.

³⁷ Tanego karo ikoe Buka tabo ne igo, “Valeke i vanama ne go tina lama go, tiniki umata kaega, valeke nae tina lama, mana lama na ia tiniki ara losi kaega.

³⁸ Basoero iri lulua go pataro qa soko go era mana iri vaogoto ava gogo ne, tarina pala too ogoto, do ṉalu kaki basoe i tabali kakamu ne vaogoto ava era, era i kaega nava ka riqo de ikoego basoe nae.”

³⁹ Do ita qatiki basoero na kaega tabali ule mana rore go, do ita qata vaogote God ia tina vakavele qita go.