Iburu 1 - Vato Vari Vakameka Voru Ia Batu Ne

Seko Ia God I Vagoe Ze Sale Ia

¹ Ṉalu bana ne, God i seko tabe qira vano ṉalu bana ro ita topu na ṉalu, loborona topu na dia de iri koego propeta ro ne.

² Do ṉalu ro dena i garogaro go vele lupo go, God i seko tabe qita e ita loborona Sale ia. God i vazaria go kolabana pua ne mana pataro ikoego. God i vine bana ṉalu kolabana pua dena tina lupo, osina pataro ikoego tina ke ia Sale ia.

³ Osina ṉalu, God i koe loborona tatavata mazala ia, Sale ia to i gere go tatavata mazala go i damara qita go ita. I gere ogote to dudulena God, i vasadaka me de go totoloṉo na ko ia. Mana seko ia i ko karaputa na, i pala tarua go osina patana kolabana pua dena, go iri velaka go. Taramuzina i va dalo qira go vano iri vasakata pata go, i popoka za rani i za kolokue tepa matauna God, i kone go karaputa sivala ne osina ro karaputa.

Sale Ia God I Sivala Ne Qira Aqelo Ro

⁴ God i vine bana Sale ia, tina mazala sivala ne qira aqelo ro, mana vitoṉo i teke go God i sivala ne vitoṉo qira aqeloro go.

⁵ Iato go kaega kaki ṉalu God i sine ne kakia aqelo ro ia, “Aro qo Sale era; Ninidena to, era qa Tamamu aro.” Ba kaega kaki ṉalu, God i sine ne kakia aqelo ia, “Era tuna Tamana ia, mana ia, tina Sale era.”

⁶ Do, ṉalu God i vanama ne valame zena vudu pua dena Sale ia, ia i sine ne qira, “Osiqira aqelo ro ia tarina va batua ia.”

⁷ Ba sauqira aqeloro ne God igo, “Qa zazu ne qira aqeloro era, qa vagere qirae seva i kikiuru, mana ria iri zazu e de qa koego iri gere uqulu na nako ne.”

⁸ Sauna Sale ia, God igo, “Ke God, de ikoego vari miasoka aro tina ko sivala osina ṉalu topu ro! Aro qo kenaqa mana vatovato ne qira basoero aro loborona totoloṉo.

⁹ Aro qo mamaligara ne pataro i velaka, mana qo kasia pataro i sakata go. Iato go era, God aro qa vine go aro, mana qa vazakazaka go aro, go tono kula sivala ne qira vakitaka ro aro.”

¹⁰ I sine napua, “Batu, kokoso vatupiana me qo vazari me vudu pua, mana karisimu tanumu qo zazu ne rani ne.

¹¹ Pataro nae tina lupo, do aro tono ko taru so, osina pata tina mode mana lupo gere poga.

¹² Aro tono piqu qira, gere basoe i piqua go roku lavata ia, aro tono kakavala qira, gere basoe i va roku ne poga voru napu. Do aro tono gere so de qo go bana go, mana too aro tiniki rove kaega lupo.”

¹³ Kaega kaki ṉalu God i sine ne aqeloro ia, “Kolokue dena tepa matauqu, go na doka go ṉalu tuna taru qirae polana na makemu ria iri kana ne qamu go.”

¹⁴ Aqelo ro ne, iri spirit so, iri ko mana osaka ne God mana God tina turine qira me, go tina tavisi ne qira basoero iri soko go pala na vari vakavele.