Epesus 6 - Vato Vari Vakameka Voru Ia Batu Ne

Sale Ro Mana Vanovano Ria Sale Ro

¹ Ramu salero, tanego qamu basoe lotu, i velaka sivala tamuna vaogoto qira tamaqamu ro mana sinaqamu go. Tanego too nae to i velaka go.

² Seko ikoego manoga seko ia God igo, muna vamazala qira tamaqamu mana sinaqamu,

³ go osina pata tina zazu velake de qamu koego, mana ramu tamuna too valodae vudu pua dena go.

⁴ Ramu tamaqira mana sinaqira salero, kasi vasasakata ne qira salero ramu, go tariniki muma go kaega. Do muna miasoka va velaka qira, mana vatatana qirae vatovato ia Batu ne go.

Vano Seka Mana Batu Ro Ria

⁵ Vano seka, muna osaka ne qira batu ro ramu. Muna momokolo ne qira mana padapadae de iri koego. Muna zazu ne pata ro dena loborona puṉu totoloṉo gerena qo zazu ne zazua ia Kristo.

⁶ Muniki zazu ne ze so pataro dena, ṉalu basoero ne iri reṉareṉa ne qamu go. Tanego qamu soko so basoero go mara vamazala qamu go. Do kaega, osina ṉalu qamu zazu ne go pata, pada ne valulu ze na pataro i soko go God, gerena qamu seka ne go to Kristo.

⁷ Iago zazu gere vano seka ne, do muna kula ne so, tanego ramu qamuki zazu ne kaega basoe, do qamu zazu ne Batu ne.

⁸ Muna nanao tarua, Batu ne tinara teke ne qira voli basoero iri zazu velaka go, patavolomo i basoe seka ba basoe talukasa.

⁹ De qamu koego ramu vano batu ro mara go napu so nae tane vatovato ramu de iri koego seka ro ramu. Kasi vasasakata ne qira. Muna nanao tarua, ramu mana vano seka ro ramu gogo ne, qamu kameka ke ia lupo so Batu lavata iko mego rani ne. I varipada ne so varitanae ia de ikoego osina basoero ne.

Pala Pata Vegoro Ia God

¹⁰ Kameka pata napu, ramu muna degere vakaraputae loborona ko kameka ramu de ikoego Batu ne, sauna karaputa varavarana ia.

¹¹ Muna vakeba ne osina pata varitara ro ia God i teke ne qamu go, go tamuna degere vanadu mana varitara ule go zazu tatakiu ro ia Satana.

¹² Iago vakeba osina pata varitara ia God ninidena! Go musaqara sakataro iri lama go, ramu tanuna degere vanadu, go tina tavisi ne qamu varitara ule na de iri koego kana ro ramu, go na dokae to valupolupona, ramu tamuna degere vanadu so.

¹³ Tanego qatiki varitarae so kaega de iri koego basoero ne. Do qata varitarae de iri koego manuru sakata na rani ne, mana de iri koego vano kenakenaqaro, mana vano iri pala mazale go karaputa tepa ia Satana, mana karaputa na rodoko na pua dena.

¹⁴ Iago ramu muna ko vanama taru. Vanadu a vaogoto ramu, gere beloto qamu buko zego barabara qamu, mana ko totoloṉo mara gere ne bako ramu,

¹⁵ mana vakeba ne makebotu ramu, gere na qamu vanama ne sine vasadake na Tarama Velaka na bule.

¹⁶ Osina ṉalu muna pala zaza ne vaogoto ramu gerena bako, tanego ianae to tina vanoto go lepo uqulu i vana nego Satana.

¹⁷ Mana muna pala vari vakavele ia God gerena topatopa qamu bara ze go kuzuku qamu. Muna pala seko ia God gerena peqi varitara i teke ne qamu Spirit tabo.

¹⁸ Ṉalu qamu zazu ne go osina pataro dena, muna lotu mana pene God go tina tavisi ne qamu go. Pene osina ṉalu go karaputa ia Spirit tabo tina kenaqa ne qamu go. Go tamuna vanama taru mana tamuniki pela kaega go. Mana muna pene napu ne qira basoero ia God go.

¹⁹ Mana muna pene napu nava era go God mara teke nava pata tuna sine go ṉalu na vanama ne go seko, go era tuna seko vakaraputa mana vasadaka vavelaka seko pipika ogotona Tarama Velaka ne.

²⁰ Sauna to Tarama Velaka dena God ituri nava era, go tuna seko ne ia, mana ninidena era qa koe to bara ne. Iago muna pene God go mara vakaraputava, go ma kasi sareki ne seko ne na Tarama Velaka de, de qa mazala go sine na.

Valupolupona Seko Kula

²¹ Tikikasi to tina sine ne qamu go ramu osina taramaqu era. Ia i valeke vakitaka velaka ita, mana i basoe zazu velaka ia Batu ne go.

²² Iago, era qaturi ne zatu ia de qamu koego ramu, go mara tarama ne qamu ramu osina pataro, qimu zazu ne ze go remu dena, mana go mara va karaputa napu qamu ramu go.

²³ Go God Tamaqita mana Batu ita Jesu Kristo mara riru teke ne qamu ramu turaquro qamu lulu go vatovato ia Kristo, bule, mana mamaligara i palua go vaogoto.

²⁴ Go Mana ia God mara kotavisi qira vano iri vanadu zego mamaligara ria de ikoego Batu ita Jesu Kristo.