Epesus 3 - Vato Vari Vakameka Voru Ia Batu Ne

Zazu Ia Pol Itavisi Ne Qira Vano Iriki Jiu Go Kaega

¹ Sauna to pata dena iri taruve go era bara ne, tanego qa keia Jesu Kristo, mana sauqamu ramu vano qamuki Jiu go kaega, qa pene ne qamue God.

² Era qa rove velake, ramu qamu gata bana, loborona Mana ia God, iteke nava era zazu dena sauna velaka qamu ramu.

³ God i vasadake namanama pipika ia, mana i varove zave era. Era qa karo zatu seko pusi sauna pata dena.

⁴ Mana ṉalu ramu tamuna toere go pata qa karo zatu go era, ramu qamu mazala to rove na era qa rove bana nanao pipika ia Kristo.

⁵ Ṉalu bana ne God iki varove qirae kaega basoe ro ne pata ogoto i ko pipika go dena, do ninidena loborona Spirit tabo ia, i vasadaka ze de iri koego apostoloro tabo ia God mana propetaro ne go.

⁶ Pata ogoto iko pipika bana mego dena ne, loborona tarama velaka ne igo, vano iriki Jiu go kaega iri pala tavise ria tane makaolo ia God iri pala bana go vano Jiu. Osiqira iri kamekae so kameka tokama, mana iri pala tavise pui ia God, ni vazuka me ze go de ikoego Jesu Kristo.

⁷ God i teke nava era sosovolomo mazala sivala ia, go era tuna zazu ne Tarama Velaka dena loborona karaputa ia tanuna.

⁸ Era to qa lete qoqoro sivala ne qira go basoero ia God. Do God i teke nava mazala, go tuna pala za Tarama Velaka de iri koego vano iriki Jiu go kaega, sauna vavagado na velaka ro ia Kristo, i kaega go ka lupolupona.

⁹ Mana God i teke nava era zazu go tuna sine vasadaka ne qira basoero ne, nanao pipika ia God. Nanao pipika igogo ne iko pika bana meso tarakenaqana osina ro pata. Mana God so iva zaria go osina ro pata.

¹⁰ Do ninidena God i va zazua eklesia go tina vasadake go nanao velaka ro ia God, de iri koego aqeloro ne mana kero ne karaputa ro zakazaka ne.

¹¹ God i valulu ze nanao ia iko bana mego ikaega go ka valupolupona. Mana i vasadaka ze loborona zazu ia Jesu Kristo Batu ita ne.

¹² Iago loborona vari va kameka ita de ikoego Kristo, mana loborona vaogoto ita i nadue go ia, ita mata kasi sareki ne na lamae na de ikoego God.

¹³ Iago qa pene vakaraputa qamu, kasi ko memelaka ṉalu era qa vokara ne qamu, tanego i sauna to velaka qamu ramu.

Mamaligara Ia Kristo

¹⁴ Iago sauna pata dena era qa koloku tutuṉu ne tutunuqu tarakenaqana God Tamaqita.

¹⁵ Mana de ikoego ia osina tatamana na rani mana pua dena iri pala ze vitoṉo ogoto qira.

¹⁶ Qa pene God iko ne go karaputa, go Spirit ia mara valame ne qita karaputa go mara vamoqere too ita.

¹⁷ Mana qa pene Kristo mara vakomale puṉu qamu loborona vaogoto ramu de ikoego, mana mara vasadaka me mamaligara ramu de iri koego osina basoero ne.

¹⁸ Go ramu mana basoero ia God muna pala karaputana nanao de igogo betarana, mana lodana, de igogo zakazaka na, mana zununa mamaligara ia Kristo.

¹⁹ Ove, ramu muna nanao rove lavatana mamaligara ia, i makuru qita go nanao rove lupo na. Iago muna vapuraka totoloṉo ze de qamu koego too totoloṉo ia God.

²⁰ Tanuna so God i mazala go zazu lupo ne na osina pata topu, sivala ne osina pataro qata pene go, ba qata nanao go.

²¹ Loborona eklesia mata vazaka ze God mana Jesu Kristo iko osina ṉalu, go tina doka go ṉalu gado kotona i kaega! Amen.