Epesus 2 - Vato Vari Vakameka Voru Ia Batu Ne

Basoe Ivaogoto Go Kristo Ile Mana I Pala Too

¹ De i lupo bana mego, ramu i le madau qamu, tanego qamu legulegu mana qamu vasakata pata.

² Ṉalu nae ramu qamu lulua vatovato sakata na vudu pua, mana qamu lulua Satana, i batu lavata ria manuru na ro varioka ne. Mana iato i kenaqa ne qira go basoero iri legulegua go God.

³ Pata ogoto osiqita qata gere qira so basoero nae, qata lulua so pata qata soko go, mana qata zazu ne so pata ni soko go tokama qita mana nanaoqita go. Loborona too ita qata gere napu qira so basoero nae. Itora to ita tatana pala go vokara na muma ia God.

⁴ Do manava ia God i lete karaputa mana mamaligara ia i lete lavata sivalae de qata koego ita.

⁵ Iago, ṉalu madau qita ile ne go sauna legulegu ita, ia i pala va too tavisi qita ita de ikoego Kristo. Tanego Mana ia God qamu kavele ne go.

⁶ Loborona ko vari vakameka ita de ikoego Jesu Kristo, God i vatoo palu napu qita ita go tatana ko batu tavisi ze ia komala na rani ne.

⁷ God izazu ne pata dena go mara vasadaka ne qira sapoko iara ko mego, osina ṉalu i lete lavata sivala varinanao ia loborona mamaligara ia, go ni vasadaka zego de ikoego Jesu Kristo.

⁸ Tanego i sauna vaogoto ramu tane God i vakavele qamu go.

⁹ Iki reqeme kaega kaki pata qamu zazu ne go, do i sosovolomo ia God, iago kasi vazakanapu ne na tanuqamu.

¹⁰ God i vazari qita, go qatara ko go dena, mana loborona ko vari vakameka ita de ikoego Jesu Kristo, God i zazu bana ne qita, mana i teke ne qita too, go mata zazu ne zazu velaka ro ia, i vanama bana ne qita go tatana zazu ne go.

Ko Kamekae De Ikoego Kristo

¹¹ Ramu vano qamu podo mego sinaqe ria vano iriki Jiu go kaega, iri koru qamue vano kosi kaega. Mana tanuqira vano Jiu iri koru qirae vano kosi. Seko dena italukase pata iri zazu ne ze tokama qira tanuqira. Ramu vano qamuki Jiu go kaega muna nanao tarua deigo koko ramu ṉalu bana me.

¹² Ṉalu nae ramu qamu ko kakavatae de ikoego Kristo, mana qamuki basoero ia kaega God, tanego qamu ki basoero tavine ia kaega. Loborona seko na vari toqe ia God, de iri koego basoero tavine ia, ramu qamuki tavine tavise kaega, mana iato nae i lavate go pui ia God, de iri koego basoero ia. Iago loborona ko ramu vudu pua dena ramu qamu ko volomo so, mana i kaega ne qamu ruruqe de ikoego God.

¹³ Do ninidena loborona kameka i Jesu Kristo, ramu qamu ko valaqalaqa bana me so, God i pala vagarogaro qamue de ikoego tanuna sauna le ia Kristo.

¹⁴ Tanego Kristo tanuna, i pala bana me bule de iri koego vano Jiu mana vano iriki Jiu go kaega mana i vakameka basoe ne qira go. Tokamana tanuna i pero vakuziki ne go bari isoso taru qira mana i varikanae bana ne qira go.

¹⁵ Iva kuziki ne Tamana ro mana tabotabo ro ria vano Jiu, loborona to zuka nae i va kameka qira go karua sinaqe basoe dena, mana i vakameka ze de koe tanuna, gerena i taru qirae loborona bule ia.

¹⁶ Le ia koluse ne, Kristo i pero varikanae riru, mana i vakameka qirue de ikoego God.

¹⁷ Iago Kristo i lama tamana ne Tarama Velaka na bule, de qamu koego ramu qamuki Jiu go kaega qamu ko valaqalaqae de ikoego God, mana remu to vano Jiu qemu ko garogaroe de ikoego God.

¹⁸ Loborona Kristo, osiqita vano Jiu mana vano Jiu kaega, qata mazala lamae na de ikoego Tamaqita loborona karaputa ia Spirit tabo.

¹⁹ Iago, ramu vano qamuki Jiu go kaega qamuki basoe kakavata to kaega. Pasi dena ramu qamu basoero tavine tavise to sinaqe basoero ia God, mana ramu qamu lama kameka tatamanae de ikoego God go.

²⁰ Ramu napu to go, qamu gere go pade izazu ne go God, mana ria to apostoloro mana propetaro ne to iri kutamana go. Tanuna to Kristo i turu maqana go pade ne.

²¹ Mana tanuna to Kristo i vari palataru ne go osina ro vari somana pade nae mana i vazazao popoka go mara kameka pade lotu tabo ia God.

²² Loborona ko kameka ramu de ikoego Kristo, God i vakameka palu qamue ramu de iri koego kero ne vano lotu, go i varisoma ne qamue ramu kameka Pade Lotu ia God de ikoego Spirit tabo ia.