Zakariya 6 - Emakhuwa Bible

Moonelo wanaathannamiraru: ikaaro ixexe sa ikavalu*

¹ Kaawehatho ni kaahoona ohoolowaka ikaaro ixexe sa ikavalu* sirweelaka wiirimu eriyari ya nyaako miili sa ebronze*!

² Ekaaro yoopacera yaakhalano ikavalu* sooxeera, yanaaveeli ikavalu* sooriipa,

³ yanaararu sootteela ni yanaaxexe sa malepa – sootheene iyo saari sooweraxa.

⁴ Kaamukoha ndyelo uuluma ni miyo: “Pwiiyaka iya sinthoonyera eheeni?”

⁵ Ndyelo aakaakhula: “Iya ti minepa mixexe sa wiirimu sivennye vaanaano okhuma onkhalaawewo Yave sirowaka wa elapo ya vathi yootheene.

⁶ Ekaaro yeettihiwa ni ikavalu* sooriipa enrowa wa elapo ya ottuttuwani, ekaaro yeettihiwa ni ikavalu* sootteela wa elapo ninkela nsuwa, ni ekaaro yeettihiwa ni ikavalu* sa malepa wa elapo ya ohitto.”

⁷ Ikavalu* sooweraxa saarowaaya ni wiilipiha weera siviravire mweelaponi ya vathi yootheene. Vano owo aaheera: “Mviravire elapo ya vathi!” Ni iye saaviravira mweelaponi ya vathi yootheene.

⁸ Vano owo aakiitthana, anakeerela: “Moone, iyo sirongwe wa elapo ya ottuttuwani soovaha Munepaaka wiitthuuwa mweelaponi eyo.”

Ecireemba ya Yoxuwa

⁹ Yave aakilamulela:

¹⁰ “Mukuxe eparatha* ni eyuuma yoorikaxa ya anamakuxiwa ootthukiweene Heldai, Tobiya ni Yedaya mwa yaawo arweenle oBabiloniya. Murowe nihuku nenenenno wa empa ya Yosiya, mwaana mulopwana a Zefaniya.

¹¹ Mukuxe eparatha* ni eyuuma yoorikaxa eyo ni mpake ecireemba ni muntthuke mutokweene a asaserdoti*, Yoxuwa, mwaana mulopwana a Yehozadaki.

¹² Mwamuleele weera Yave a ikuru sootheene oneera ha: ‘Ori va mulopwana oniitthaniwa Ephuwela ni owo onoophuwa vanipuroniwawe ni onooteka Empa ya Yave.

¹³ Ti yoowo aneera ateke Empa ya Yave ni owo onoowarihiwa ni ovuwa, alamulaka akilaathiyeene vahiceniwawe ya emwene. Ni owo onookhala musaserdoti* vahiceniwawe. Vano onookhala murettele variyari wa esaserdotaawe ni emwenaawe.’

¹⁴ Ecireemba enoovahiwa wa Heldai, Tobiya, Yedaya ni Heni, mwaana mulopwana a Zefaniya, ntoko eyuupuxero Mpaani mwa Yave.

¹⁵ Yaawo ari ottaiwene animoowa weera ekhavihere otekiwa wa Empa ya Yave ni munoosuwela weera Yave a ikuru sootheene ti okiruminghe wa nyuwo. Eyo eniiyereye nyuwo mwamwiiwelela oororomeleyeene Yave Mulukwaanyu.”