Zakariya 3 - Emakhuwa Bible

Moonelo wanaaxexe: Yoxuwa ni Satana

¹ Vano ookoonihera Yoxuwa, mutokweene a asaserdoti* eemenleene ohoolo wa ndyelo a Yave ni Satana areene moonowaawe woolopwana weera amoothere.

² Yave aamweerela Satana: “Yave onimoohiihani Satana! Yave othanlale oYerusaleemu onimoohiihani! Mulopwana ola ori ntoko nthatu noovenxiwa vayikho.”

³ Vano Yoxuwa aawara ikuwo soonanara eemenleene ohoolo wa ndyelo.

⁴ Ndyelo aaweerela yaale yeemenle ohoolowawe: “Murule ikuwosawe soonanara.” Vano aamweerela Yoxuwa: “Moone, koovenxa sootthekasanyu ni kinoowarihani sa eneethi.”

⁵ Vano kaaweerela: “Muntthuke ecireemba yootteela.” Ni awosa yaamutthuka ecireemba yootteela, enangwariha, ndyelo a Yave oonaka.

⁶ Ndyelo a Yave aamulipihera Yoxuwa amweerelaka:

⁷ “Yave a ikuru sootheene oneera ha: ‘Nyuwo mweetta mphironimwaka ni mwiiwelela ikanosaka, vano munoolamula Empaaka ni munookhala muhooleli a vaatewaka ni Miyo kinimoovahani nipuro eriyari ya yaala ari va.

⁸ Mwiiwe Yoxuwa, mutokweene a asaserdoti*, ni anamakhaviheraanyu akilaathiye ohoolowanyu – nyuwosa ti asilopwana anthoonyera itthu sineera seereiye: Kinoomuruuha murumeiyaaka, Ephuwelo.

⁹ Moone nluku kiiyaathiyaaka ohoolo wa Yoxuwa. Nno nookhalano maitho mathannameeli ni Miyo kinoolepamo yoolepa,’ oneera Yave a ikuru sootheene, ‘ni kinoovenxa soottheka sa elapo ela munihukuni nimoha.

¹⁰ Vanihukuni nenenenno khula mutthu a nyuwosa onoomulattula mukhwaawe weera akilaathi vathi wa evideiraawe* ni wa mwiraawe wa efiigu*,’ onghima Yave a ikuru sootheene.”