Yuda 1 - Emakhuwa Bible

¹ Ya Yuda, murumeiyi a Yeesu Kristu, ni munneiye Yakobe, wa yaawo yiitthaniwe, yaasiveliwe ni Muluku Atiithi ni yaakosoopiwe ni Yeesu Kristu:

² Ikharari, murettele ni osivela owaatteleni.

Yoottheka ni ommaleloni wa atakhali

³ Oosiveleya, naamwi kaatthuna vancipale woolepelani mwaha wa ovuluxiwawahu, kohoona weera waatthuneya woolepelani ni woonyesererihani weera muwane niwoko na nroromelo nivahiwe emaara emoharu wa ootteela.

⁴ Vano, atthu akina, mwa yaawo nthorihelonaya naalempwale khalayi, ahiivoleiha muxiirini variyariwanyu. Awo ari atakhali, etatuxaka olavilavi mahala a Mulukwaahu ni animkhootta Yeesu Kristu, Namalamula mmoharu, Apwiyaahu.

⁵ Naamwi nyuwo musuwelaka sootheene iyo, kintthuna owuupuxerani veeli weera Apwiya aavuluxa muloko mmoha wExipitu, mene vahoolowaya, yaahaaphwata yaawo yahaaroromenle.

⁶ Apwiya ahaatthuka mpiphini ni onyooro woohimala wa othorihiwa wa nihuku ntokweene andyelo yahaakosoompe mikhalelosaya sa ikuru, mene yaahiya nipuronaya.

⁷ Moota woolikana ni iya, Sodoma ni Gomora, ni isidade sa mukerekheremwaya, sohiileva wa olavilavi ni wa oraruxana asilopwanaru. Sittaruxiweene ni mooro woohimala, iyo simvarela muteko ntoko ethoonyero.

⁸ Mooteene yoowo, anamaloha awo amvaliha irutthusaya asineenaaya, ankhootta ikuru ni amveiha ikhalelo sa wiirimu.

⁹ Wa soothesene, hata ndyelo mutokweene Mikhayeli, aavaanyihanaawe ni Diyabu* ewanelaka erutthu ya Moisesi, kheerenre omoothera, amveihaka ni moota wooveiha Diyabu*, mene eenre: “Apwiya yoohiiheyoomuhiihe!”

¹⁰ Awo amveiha sootheene ahiniiwexexaaya ni anniriheya ni itthusene seiyo asuwenlaaya, ettharaka mikhalelo sa erutthu ntoko inama sihikhalanne soowuupuwela.

¹¹ Ii! Anoohaawa! Niwoko yaatthara ephiro ya Kayini; ni yaasaka nlivo, yaatthara olokottha wa Balaami; ni yaaphwatiwa moonyakulihanani wa Kore.

¹² Atthweene yaawo ari malepa mwa mfestanimwanyu, ecaaka vamoha ni nyuwo oohikhalano nttittimiho. Ari akukhuli aniiciha asineenaaya paahi. Ari mahutte oohikhalano maahi, yeettihiwaka ni epheyo, nyiri sa elimwe sihiimaka etthu, sikhwaaka veeli, sipheliwaka ni mukwankhwaari.

¹³ Ari mitekuteku sa owali sa mphareiyani, sikhumihaka nipheru na mitekosaya soowuuliha muru; ithenyeeri sithweelenle, mwa yaawo aathokororeliwa epiphi etokotokoxa yoohimala.

¹⁴ Henookhi, ekhapira yanaathannapiili okhuma wa Adamu, aathaliha mwaha wa yaawo: “Moone, Apwiya angwa ni ootteelaaya oohaalikeleya

¹⁵ weera yaathorihe ootheene, ni yaahimahime atakhali ootheene niwoko na mitekosaya soonanara sootheene apankaaya mootakhalani, ni niwoko na masu ooruwana anamattheka oonanara murima amuulumenlaaya Muluku.”

¹⁶ Awo ari anamattaandawula ni ankhala oohihakalala, ettharaka soohaawelasaya soonanara; ari oowiixoona ni aniixeera ni akina, mene niwoko na opwatthawaya asineenaaya paahi.

WiitthaneliwaWiitthaniwa wa ovilela

¹⁷ Wa soothesene, oosiveleya, muupuwelele yeeyo yuulummwale ni arummwa a Apwiyaahu Yeesu Kristu.

¹⁸ Awo yaaweerelani nyuwo: “Mahuku oomalihera, eniikhumelele anamaveiha eneera etthare soohaawelasaya sootakhala.”

¹⁹ Awo ari yaawo ankhumiha ohiiwanana variyariwanyu, ettharaka soohaawela sa eruttwaaya ni ehikhalanne Munepa.

²⁰ Wa soothesene, nyuwo, oosiveleya, mupwaherereke wunnuwa munroromelonimwanyu nootteelaxa, mvekelaka mwa Munepa Wootteela.

²¹ Mwiithokorore moosivelani mwa Muluku, muwehereraka weera ikharari sa Apwiyaahu Yeesu Kristu soorongheni mookumini woohimala.

²² Mwaamorele ikharari yaawo anghovela.

²³ Mwaavuluxe akina ngwookholaka mmooroni; wa akinatho, mwaamorele ikharari ni woova, muthanyaka mpaka ikuwo sivalihiwe ni otakhala wa erutthu.

Ottottopela woomalihera

²⁴ Wa Yoole ongwera owooceelihani wuuwa ni owooniherani vahoolo wa ovuwawawe woohikhala nlepa ni moohakalalani otokotoko,

²⁵ wa Muluku mmoharu, Mvuluxaahu okhale ovuwa, otokweene, ikuru ni olamula niwoko na Yeesu Kristu Apwiyaahu, okhuma ehinaaye ehuhu yootheene, vaanaano vaava ni wa mahuku ootheene. Ame*.