Yoxuwa 9 - Emakhuwa Bible

aYixrayeli anlokotthiwa ni aGibiyoni

¹ Mamwene ootheene a mpatta ninkela nsuwa wa Yordanu – yaawo a vanyaakoni, yaawo a vathi wa nyaako ni yaawosa a mukerekhere wa ephareiya etokotoko mpaka oLibanu, eyo tiiyo mamwene a aHiti, awAmori, aKanaani, aPerizi, aHivi ni aYebusi, yaahiiwa sa itthu iye.

² Vano yaathukumana weera engwaneno Yoxuwa ni aYixrayeli.

³ Wa soothesene, aGibiyoni yiiwaka yeeyo Yoxuwa aapakenlaawe oYeriko ni wAi,

⁴ yaavaanela waalokottha aYixrayeli. Yaarowa wa aYixrayeli yoothererihaka weera ankhuma ottai, aburwaaya ekuxaleene isaakho sa khalayi ni mirupa sa eviinyu sa khalayi, soothaala ni soopareiwa.

⁵ Awosa yaawara ikwakwaatta soothaala ni soopareiwa, ewanreenetho mataparattha. Sooca sootheene sa munkhwahani saari soowuuma ni sa ekhuttela.

⁶ Vano yaarowa wa Yoxuwa aari waakoneliwe oGiligali, enamweerela yoowo ni aYixrayeli: “Ninkhumelela elapo ya ottaiwene. Vano nintthuna weera niiraaneke.”

⁷ aYixrayeli yaaweerela aHivi: “Apaale munkhala vakhiviruwahu. Mwa yeeyo, khoonghwereya hiyo wiiraana ni nyuwo.”

⁸ Awosa yaamweerela Yoxuwa: “Hiyo arumeiyaanyu.” Yoxuwa aahaakoha: “Nyuwosa taani ni mungweela woowi?”

⁹ Awosa yaamwaakhula: “Arumeiyaanyu angweela elapo ya ottai niwoko na epili ya Yave Mulukwaanyu. Naahiiwa ihaali sa sootheene aapankaawe wExipitu

¹⁰ ni sa sootheene aapakenlaawe mamwene meeli a awAmori, mpatta ninkhuma nsuwa wa Yordanu, Sihoni, mwene a Hexeboni ni Ogi, mwene a oBaxani aalamula wAxetaroti.

¹¹ Vano asitokweenaahu ni ootheene a elapwaahu yaaneerela: ‘Munkuxe pooso, murowe, mwaakumaneno yaawo, ngweerelaka: “Hiyo arumeiyaanyu, mwiiraane ni hiyo.”’

¹² Sooca iya saari sooviha hiyo naahelaahu owaani nihuku nivennyaahu nirwaaka nno. Vanonto, moone moota suumalaaya ni sisanraaya ekhuttela.

¹³ Ni mirupa iya sa eviinyu saari sinyowani, mene vano moone – sohaahuwa. Ikwakwattasahu ni soowarasahu soothaala niwoko na mukwaha woorakamaxa.”

¹⁴ aYixrayeli yaangwehaweha pooso a aHivi, mene khayaavenke miruku sa Yave.

¹⁵ Vano Yoxuwa aakhaliha wiiraana wa murettele ni yaawosa aroromelihaka wuurela okumaaya. Asitokweene a muthukumano yaahaakhulela ni nlipelo.

¹⁶ Eviraleene mahuku mararu vahoolo wa wiiraana, aYixrayeli yaasuwela weera aGibiyoni ale yaari amwaattamanaaya.

¹⁷ Tivawo aYixrayeli yaattimunlaaya ni mukwaha erowaka wa isidadesaya ni eviraleene mahuku mararu yaaphiya oGibiyoni, oKefira, oBeheroti ni oKiriyati-Yeharimi.

¹⁸ Wa soothesene, aYixrayeli khayaawananne, niwoko asitokweene a muthukumano yaahaaroromeliha ni nlipelo vamaithoni wa Yave, Muluku a aYixrayeli. Muthukumano wootheene waahaattaandawula asitokoweenaaya,

¹⁹ mene asitokweeneene yaale yaahaakhula: “Hiyo naahaaroromeliha vamaithoni wa Yave, Muluku a aYixrayeli, tivawo nihingweraahu etthu.

²⁰ Vanonto, nnaapakele moota ola: Nnaahiya ni okumi weera nihithorihiwe ni Muluku niwoko na onanariha nlipelo naapakenlaahu.”

²¹ Awosa yaapwaherera yeeraka: “Mwaahiyeke ekhaleke ni okumi, mene ekhaleke anakhuuni ni anamattuutta a maahi wa muloko wootheene.” Hiiho asitokweene yaattittimiha nlipelonaya.

²² Vano Yoxuwa aahaalattula aGibiyoni, anaweerela: “Munilokontthenleni mweeraka weera munkhala ottaiwene vekhaikhai mukhalaka vakhiviru?

²³ Nyuwosa moolaphiwa! Munookhala ipottha mahuku ootheene mwaasaka ikhuuni ni muttuuttelaka maahi Empa ya Mulukwaaka.”

²⁴ Awosa yaamwaakhula Yoxuwa: “Arumeiyaanyu yaaleeliwa nnenesene moota Yave Mulukwaanyu aamulamulenlaawe murumeiyaawe Moisesi weera aamoovahani elapo yootheene ela ni weera aangwiiva amaki ootheene a elapo yeela. Naamoova weera eniinikhumelele eheeni niwoko na nyuwosa, tivawo nuupuwenlaahu hiiho.

²⁵ Hiyo nri mmatatanimwanyu. Munipakele yeeyo munoonaanyu weera yooreera ni ya ekhaikhai.”

²⁶ Yoxuwa aawoopola ni khaatthunihenre wiivasiwa.

²⁷ Nihuku nne aahaapakiha aGibiyoni anakhuuni ni anamattuutta a maahi wa muloko ni wa altaari* a Yave vanipuroni Yave eeraawe athanle. Ni mpaka olelo awosa ari anakhuuni ni anamattuutta a maahi.