Yoxuwa 7 - Emakhuwa Bible

Yoottheka ya Akani

¹ Wa soothesene, aYixrayeli khayaaroromeleiye ni itthu sootteeliheriwa. Akani, mwaana mulopwana a Karemi, mwaana mulopwana a Zabedi, mwaana mulopwana a Zera, a epuumba ya Yuda, aahiiya ikina sa seiye. Isara sa Yave saahaaluttuwela aYixrayeli.

² Yoxuwa aahaarumihela asilopwana akina wAi, waattamela oBet-Aveni, mpatta ninkhuma nsuwa wa oBeteli, aweerelaka: “Murowe ni mwahottelase elapo eyo.” Hiiho asilopwana yaarowasa, enahottela wAi.

³ Yaahokoleenlaaya wa Yoxuwa, yaamweerela: “Khoontthuneya orowawo anakhotto ootheene owana wAi. Mwaarumihe asilopwana macira miloko miili hoye hoye macira miloko miraru weera yaakamelewo. Muhaakhulumule anakhotto ootheene, niwoko atthu a wAi ari vakhaani.

⁴ Hiiho wookwanaka asilopwana macira miloko miraru yaawana ni wAi, mene kayaawenre waawina asilopwana a wAi, enatthawawo.

⁵ Mwa yeeyo yaawiiva asilopwana miloko miraru ni athannamosa a aYixrayeli. Yaahaattharelela aYixrayeli okhuma vamulako wa esidade mpaka oXevarimi ewiivaka akina muxepani. Niwoko na yeeyo muloko waapororaxa.

⁶ Vano Yoxuwa aahaahula ikuwosawe uuramihelaka ekhovaawe vathi ohoolo wa Arka* a Yave, iihenleene etthaya mmuru. Aakhalawo mpaka wiila. Asitokweene a aYixrayeli yaapaka mooteene yoowo.

⁷ Yoxuwa aaheera: “Ii! Yave, Yave, heeni mulapuxenreni muloko ola muYordanu? Mweerela onivaherera mmatatani mwa awAmori weera eniphwate? Eya! Fataari naakhanle okhopela Yordanu!

⁸ Ii! Yave, keereke hai, yeenre aYixrayeli ewiniwaka ni amwiittanaaya?

⁹ aKanaani ni miloko sikina sa elapo ela sinoosuwela yeela ni sinoonirica, siniphwataka mweelaponimu. Vano mmwipake eheeni weera mwaakihe Nsinananyu ntokweene?”

¹⁰ Yave aamweerela Yoxuwa: “Mweemele, muuramenle heeni vawo?

¹¹ aYixrayeli aattheka. Aarambura wiiraanawaka kaalamulenlaaka. Aakuxa sikina sa itthu sootteeliheriwa. Ahiiya, aavitha, enikaathi vamoha ni itthusaya.

¹² Ti niwoko na yeeyo aYixrayeli ahingweraaya waawina amwiittanaaya. Ammwaatthawa, niwoko ahiiruuhela ophwatiwa. Miyo nkinkhalatho ni nyuwo mwaahiphwatasa variyariwanyu yeeyo etteeliheringwe ophwatiwa.

¹³ Murowe, mwatteelihe muloko. Mwaaleele: ‘Mwiitteeliherase weera mukhaleke oolikaneene omaalo, niwoko Yave, Muluku a aYixrayeli oneera ha: Sookhala itthu sootteeliheriwa ophwatiwa variyariwanyu, aYixrayeli. Khamungwera waawina amwiittanaanyu muhithupulunle.

¹⁴ Mwiixooniherase oxeexelo: epuumba ti epuumba. Vano epuumba Yave aneeraawe athanle, eroweke ohoolo. Nihimo ti nihimo na epuumba eyo niixoonihereke. Vanonto, nihimo Yave aneeraawe athanle, niroweke ohoolo. Emusi ti emusi ya nihimo nno yiixoonihere. Mutthu ti mutthu a emusi eyo iixoonihereke.

¹⁵ Yoowo anaavaraniwe itthu sootteeliheriwa onoohisiwa mmooroni vamoha ni sootheene orinaawe. Owo oorambura Wiiraana wa Yave ni oopaka etthu yoowuuliha muru muYixrayeli.’”

¹⁶ Oxaawaya Yoxuwa aalamula weera ootheene yiixoonihere, epuumba ti epuumba. Vano epuumba ya Yuda yaathanliwa.

¹⁷ Khula nihimo na Yuda naahiixoonihera ni aZerahi yaathanliwa. Khula emusi ya nihimo na aZerahi yaahiixoonihera ni Zabedi aathanliwa.

¹⁸ Yoxuwa aalamula weera mulopwana ti mulopwana a emusi ya Zabedi iixoonihere ni Akani, mwaana mulopwana a Karemi, mwaana mulopwana a Zabedi, mwaana mulopwana a Zera, a epuumba ya Yuda, aathanliwa.

¹⁹ Vano Yoxuwa aamweerela Akani: “Mwanaka, mumvuwihe Yave, Muluku a aYixrayeli ni munttottopeleke. Mukileele yeeyo mpankaanyu. Muhikikhuwe.”

²⁰ Akani aamwaakhula: “Ettiitthu. Koomutthekela Yave, Muluku a aYixrayeli. Kipankaaka ti ela:

²¹ Kaahoona variyari wa soohuhula mukaandyo wooreeraxa wa oBabiloniya, ixekeli* macira meeli sa eparatha* ni mpatta wa eyuuma yoorikaxa, olemelawaya ixekeli* miloko mithanu. Saakivoreihela murima, kinakuxa. Sivithiwe vathi wa eheemaaka, eparatha* ereene vathiwaya.”

²² Yoxuwa aahaarumiha asilopwana akina enatthimakela oheemani wa Akani weiwo saavithiwaayawo itthu, ni eparatha* vathiwaya.

²³ Yaakhumiha muheemani, enamuroihela Yoxuwa ni aYixrayeli ootheene, eniikaathi vamaithoni wa Yave.

²⁴ Vano Yoxuwa vamoha ni aYixrayeli ootheene yaamukuxa Akani, mwaana mulopwana a Zera, eparatha*, mukaandyo, mpatta wa eyuuma yoorikaxa, anamwanaawe asilopwana ni asithiyana, imombesawe, abuurwaawe, ikhondoolosawe, eheemaawe ni sootheene aarinaawe emuronghaka oreyareyani wa Akori.

²⁵ Yoxuwa aamukoha: “Munitannyerenle heeni erisa ela? Olelo Yave onimootannyeranitho erisa!” Vano aYixrayeli ootheene yaamvonya maluku ni vahoolowaya yaahaavonya awawe, enaahisa ootheene ni sootheene mmooroni.

²⁶ Vasulu wa Akani yaahuukeliwa maluku mancipale aakhala mpaka olelo. Yave aariiriha isarasawe. Tivawo nipuro nne nniitthaniwaaya oreyareyani wa Akori mpaka olelo.