Yoxuwa 6 - Emakhuwa Bible

Yeriko oowiniwa ni oophwatiwa

¹ Vano Milako sa oYeriko saari soowaliweene niwoko na aYixrayeli. Khaawo aakhuma naari aavolowa.

² Vanonto Yave aamweerela Yoxuwa: “Moone, kohoovahani Yeriko mmatatanimwanyu, vamoha ni mwenaaya ni anakhottwaawe.”

³ Mweette murukureeraka esidade emaara emoha khula nihuku vamoha ni anakhotto ootheene. Mpake yeeyo wa mahuku mathannamosa.

⁴ Asaserdoti* athanneeli ekuxeke mapalapatta a manyaka a maankhoro ohoolo wa Arka*. Vanihukuni nanaathannameeli mweette ootheene imaara ithannapiili murukureeraka esidade, asaserdoti* yiipaka mapalapatta.

⁵ Mwiiwaka oruma wa mapalapatta wiipiwa woopwaherera, muloko wootheene okhuwelaxeke ni vano exiri ya esidade enoomora ni muloko onoowana, khula mutthu vanipuroni aneeraawe akhale.

⁶ Yoxuwa, mwaana mulopwana a Nuni, aawiitthana asaserdoti*, anaweerela: “Mwaateexe Arka* a Wiiraana a Yave ni asaserdoti* athanneeli a nyuwo ekuxeke mapalapatta ohoolowaya.”

⁷ Aalamulelatho muloko, eeraka: “Muroweke! Mweette murukureeraka esidade ni anakhotto eroweke ohoolo wa Arka* a Yave.”

⁸ Yoxuwa amalihakaru wuuluma ni muloko, asaserdoti* athanneeli yaakhuxale mapalapattaaya vamaithoni wa Yave yaarowa ohoolo yiipaka mapalapatta ni Arka* a Wiiraana a Yave yaatthara ottuliwaya.

⁹ Anakhotto yaari ohoolo wa asaserdoti* yiipa mapalapatta ni anakhotto akinaawo yaatthara Arka*. Ehuhu yootheeneeyo yiipiwa mapalapatta.

¹⁰ Yoxuwa aalamulela muloko: “Muhikhuwele hata muhinyakule naari muhuulume mpaka nihuku kineeraaka koolamuleleni weera mukhuwele. Vano nihuku nno muneeraanyu mukhuweleke!”

¹¹ Hiiho aYixrayeli yaarukureera mukhwipi wa esidade ni Arka* a Yave emaara emoha. Vahoolowaya yaahokoleela waakonelingwe, enavirihawo ohiyu.

¹² Waaxiiye Yoxuwa aavenya ni asaserdoti* yaahaateexa Arka* a Yave.

¹³ asaserdoti* athanneeli yaakhuxale mapalapatta yaarowa ohoolo wa Arka* a Yave, yiipaka mapalapattaaya. Anakhotto yaakhala ohoolowaya ni anakhotto akinaawo yaatthara Arka* a Yave, mapalapatta epwahereraka wiipiwa.

¹⁴ Nihuku nanaaveeli yaarukureeratho esidade emaara emoha, enahokoleela waakonelingwe. Yaapaka yeeyo wa mahuku mathannamosa.

¹⁵ Vanihukuni nanaathannameeli yaavenyasa oyaaka ni oxa, eneettasa mooteene yoowo imaara ithannapiili, erukureeraka esidade; naari nihuku nenno paahi yaarukureenraaya esidade imaara ithannapiili.

¹⁶ Emaara yanaathannapiili, asaserdoti* yiipaaya mapalapatta, vano Yoxuwa aalamulela muloko: “Mukhuweleke, niwoko Yave ohoovahererani esidade!

¹⁷ Esidade ni sootheene siri mwemmo sitteeliheriweke Yave. Paahi puuta Rakhabi ni ootheene ari mpaanimwawe eneera yuureliwe, niwoko aawiipithiha anamahottela naarumihalaahu.

¹⁸ Muhikuxeru itthu sootteeliheriwa hata emoha ya seiyo. Mwakuxasa iyo, munoophwatiwa mwaaruuhelaka ophwatiwa ni irisa aYixrayeli.

¹⁹ Eparatha* ni eyuuma yoorikaxa yootheene ni ikaruma sa ebronze* ni iyuuma sikina sitteeliheriweke Yave ni siroihiweke omuhakhuniwawe.”

²⁰ Erumakaru mapalapatta, muloko waakhuwela. Exiri yaamora niwoko na oruma wa mapalapatta ni okhuwelaxiwa. Hiiho aYixrayeli yaavolowa, khula mutthu nipuro aaraawe, enakuxa esidade.

²¹ Yaamutteelihera Yave esidade yaaphwataka ni ekatana ootheene ni sootheene saarino okumi – alopwana ni athiyana; amiravo ni asitokweene; imombe, ikhondoolo ni abuuru.

²² Yoxuwa aaweerela asilopwana eeli yaarongwe ohottela elapo ele: “Mvolowe mpaani mwa puuta ni mwamukhumihemo vamoha ni amusaawe ootheene, ntoko mwaamuroromelinghaanyu.”

²³ Vano asilopwana yaarongwe ohottela elapo yaavolowasa, enamukhumiha Rakhabi, atithawe, amayawe, axirokoriye ni amusaawe ootheene. Yaahaakhumihamo ootheene a emusaawe, enawiikaathi okhwipi yaakonelaaya aYixrayeli.

²⁴ Vahoolowaya yaahisa esidade yootheene ni sootheene saarimo. Vaheera yaavaherera eparatha* ni eyuuma yoorikaxa, ikaruma sa ebronze* ni eyuuma ekina omuhakhuni wa Empa ya Yave.

²⁵ Vano Yoxuwa aamuurela puuta Rakhabi, vamoha ni emusaawe ni anatithawe, niwoko aawiipithiha anamahottela Yoxuwa aarumihenlaawe oYeriko. Owo onkhala ni aYixrayeli mpaka olelo.

²⁶ Ehuhuweene yeele Yoxuwa aalipelaxa: “Oolaphiwa akhale yoowo aneera eerere orasela esidade ya oYeriko! Owo ahela mathipelowaaya, ntthaaranawe nnimookhwa, ni arasela maselaaya, etthaakwaawe enimookhwatho.”

²⁷ Vano Yave aari ni Yoxuwa ni epilaawe yaamwareela mweelaponi.