Yoxuwa 2 - Emakhuwa Bible

Anamahottela anrumiheliwa oYeriko

¹ Vano Yoxuwa, mwaana mulopwana a Nuni, aahaarumihela muxiirini anamahottela eeli oXitimi. Aaweerela: “Murowe, mweettelele elapo eyo wootepaxa oYeriko.” Awosa yaarowa, enavolowa empa ya puuta iitthaniwa Rakhabi, enavirihasa ohiyu.

² Wa soothesene, mwene a oYeriko aaleeliwa: “Akina a aYixrayeli ari muumu ohiyuweene yoola weera ehottele elapo.”

³ Mwene a oYeriko aamurumihela Rakhabi mutthenga ola: “Ngwoomole asilopwana yoophiyerenleni, niwoko arweenle ohottela elapo yootheene.”

⁴ Wa soothesene, muthiyana owo aavinthe asilopwana eeli aahaakhula: “Ettiitthu, asilopwana eeli yaakiphiyerela, mene miyo nkaasuwenle yaakhumelelasaayawo.

⁵ Wiilaka, ehuhu engwaliwa mulako wa esidade awosa yaattimula ni nkisuwenle akenlaayawo. Mwaatthimakelase, apaale munimwaaphwanya.”

⁶ Wa soothesene, owo aahaarongha vasulu etarato, anaavitha vathi wa irece sa malaxi siikaathiwewo.

⁷ Anamatthimakela yaahaattharatthara asilopwana eeli ale mmuseweni onkela mmirorani sa Yordanu. Evenyakaru, mulako wa esidade waakokotteliwa.

⁸ Vano, anamahottela ehinaaye okona, Rakhabi aawela vataratoni,

⁹ anaweerela: “Koosuwela weera Yave ohoovahasani elapo ela ni nyuwo moonitannyera woova otokotoko. Amaki ootheene a elapo ela ari oottenguweene niwoko na nyuwosa.

¹⁰ Nohiiwa moota Yave aamwalamwanxaawe maahi a Ephareiya Yooxeera ohoolowanyu, nyuwosa mukhumakaru wExipitu. Noohiiwatho sa yeeyo mwaapakenlaanyu mamwene meeli awAmori, Sihoni ni Ogi, mwa yaawo mwaaphwatansaanyu.

¹¹ Nisuwelakaru yeeyo, muloko waathananelaxa ni ootheene naatteenguwasa niwoko na nyuwo woonaka weera Yave Mulukwaanyu ti Muluku oosulu wa erimu ni vathi.

¹² Vano, dyoontte, munlipele Yave weera mummoonihera murima wooreera wa emusaaka ntoko kiwoonihenraakani oreerawaka murima. Mukivahe eneneero yookiroromeliha weera

¹³ khamurwa ngwiiva atithaka, amayaka, axunnaka ni asirokoraka ni ootheene ari awaya ni weera munoonitapuxa mookhwaani.”

¹⁴ Vano asilopwana yaamwaakhula: “Nnoororomelihani ni okumaahu. Mwaahimuleelaru mutthu yeeyo nimpakaahu, nnimoopakani nnene Yave aaninnyereraka elapo ela.”

¹⁵ Rakhabi aahaakhaviherasa okhuruwela vaxanelani ni mukhoyi, niwoko empa aakhalaawe yaari mpatta wa exiri ya esidade.

¹⁶ Vanonto owo aaweerela: “Murowase mwaako ole weera anamattharatthara ehoophwanyaseni. Mwiipithewo mahuku marararu mpaka awosa ohokolowa ni vahoolowaya mpwahereraseke ni mukwaahaanyu.”

¹⁷ Asilopwana yaamweerelasa: “Mwatthuna weera nikwanihere yoororomeliha noopakenlaahuni,

¹⁸ vano hiyo naavolowaka mulaponi, mutthukelele mukhoyi ola wooxeera vaxanelani, mwa yoola munikhavihenraanyu okhuruwano ni mwaaruuhe atithinyu, amayinyu ni emusaanyu yootheene mpaanimwanyu.

¹⁹ Akhala onkhumela vaate akhwa ti yawawe. Hiyo khanikhalano nthowa. Vaheera akhwa mukina areene mpaanimwanyu, vano nthowa nnikhale nawihu.

²⁰ Wa soothesene, mwathaliha yeeyo nimpakaahu, nri ootapuxeyeene ni nlipelo munipakenlaanyu.

²¹ Owo aawaakhula: “Kohaakhulela. Yeereyeke ntoko muhimmaanyu.” Owo aahaaraxelasa, enattimula. Vanonto Rakhabi aatthukelela mukhoyi wooxeera vaxanelani.

²² Awosa ettimulasakaru, yaarowa omwaako, enakhalawo mahuku mararu mpaka yaahokolowaaya anamattharatthara. Awosa yaawaasaasa mmuseweni wootheene, mene khayaaphwayanse.

²³ Vahoolowaya asilopwana eeli ale yaahokolowasa. Yaakhuruwa vamwaako, enalapuwa mooloko, enaphiya wa Yoxuwa, mwaana mulopwana a Nuni, enamuthalihera sootheene saakhumelenle.

²⁴ Awosa yaamweerela Yoxuwa: “Woohihovela, Yave ooninnyerera elapo yootheene. Atthu ootheene a weiwo aasareya woova niwoko na hiyo.”