Yoxuwa 18 - Emakhuwa Bible

Ilapo sa ipuumba sihanle

¹ Muthukumano wootheene wa aYixrayeli waathukumana oXilo ni vaavaale yaakungiwa Eheema ya Muthukumano*. Vano elapo yaalamuliwa ni yaawosa,

² vaheera ipuumba ithannapiili khasaakhenle soohiyeriwasaya.

³ Yoxuwa aaweerela aYixrayeli: “Mpaka yaakhani muramusaka okuxa elapo Yave, Muluku a makholowaanyu, oovanghaaweni?

⁴ Vano, khula epuumba yaathanleke asilopwana araru. Miyo kinimwaarumihela weera yawehawehe elapo yoonaka okhala yeenraaya ettharihaka yoohiyeriwa ya khula epuumba. Vahoolowaya ehokoleeleke wa miyo.

⁵ Mukawanyihe elapo mipatta mithannamiili. aYuda ekhaleke mweelaponimwaya ya ohitto ni epuumba ya Yoseefe mweelaponimwaya ya ottuttuwani.

⁶ Yoona okhala seenraaya mipatta sa elapo, mukiruuheleke ni miyo kinimoopakelani mwaathanle vamaithoni wa Yave Mulukwaahu.

⁷ Wa soothesene, aLeevi khayaakhela etthu variyariwaanyu, niwoko osaserdoti* wa Yave ti yoohiyeriwaaya. Vanonto, Gadi, Rubeni ni eriyari ya epuumba ya Manaxe yaahaakhela yoohiyeriwaaya mpatta wa ninkhuma nsuwa wa oYordanu. Moisesi, murumeiyi a Yave, aahaavaha elapo ele.

⁸ Asilopwana yaattimulasaya weera yawehawehe elapo, Yoxuwa aaweerela: “Murowe mwasomele elapo ni mwalepe okhala yeenraaya. Vahoolowaya muhokoleele wa miyo ni kinimoopakelani mwaathanle wenno oXilo vamaithoni wa Yave.

⁹ Vano awosa yaattimula, enaviravira mulaponi. Yaalepa mpapheloni okhala yeenraaya – esidade ti esidade, ekawaka elapo mipatta mipatta mithannamiili, enahokoleela wa Yoxuwa waakonelingwe oXilo.

¹⁰ Vahoolowaya Yoxuwa aahaapakela mwaathanle oXilo vamaithoni wa Yave ni weiwo aahaakawela aYixrayeli elapo ntoko yaaphwanelaaya – epuumba ti epuumba.

Elapo ya Benyamini

¹¹ Yaareereliwe aBenyamini, nihimo ti nihimo. Elapo yaareereliwe yaari eriyari ya yeeyo ya ipuumba sa Yuda ni Yoseefe.

¹² Mpatta wa ottuttuwani mwiinanowaaya waapacenre muYordanu, oviraka vareyareyani wa ottuttuwani wa oYeriko, onapwaherera okelaka mpatta ninkela nsuwa wa elapo ya mmanyaakoni, okotaka munikareni na oBet – Aveni.

¹³ Okhuma vaavaale waarowa mpatta wa ohitto wa nyaako sa oLuzi (eyo tiiyo oBeteli), okhuruwelaka wAterot-Adari vamwaako ori ohitto wa vathi vathi wa oBeti-Horoni.

¹⁴ Vano okhumela mwaako waari omwiinanoni wa oBeti-Horoni, ohitto, waakottoombela ohitto, ottharihaka mpatta ninkela nsuwa wa mwaako onakotela oKiriyati-Bahali (eyo tiiyo oKiriyati-Yeharimi), esidade emoha ya epuumba ya Yuda. Owo waari mwiinano wa mpatta ninkela nsuwa wa elapwaaya.

¹⁵ Mwiinano wa ohitto waapacenre mpatta ninkela nsuwa mukerekhere wa oKiriyati -Yeharimi, onaphiya onaattuuttuni a Maahi a oNefetowa.

¹⁶ Mwiinano waarowa mpaka mukerekhere mwaako ori ohoolo wa nreyareya na oBen-Hinomi, ottuttuwani wa nreyareya na oRefayimi. Vahoolowaya waapwaherera okhuruwelaka oreyareyani wa oHimoni, ottharihaka mpatta wa ohitto wa esidade ya aYebusi, onaphiya mpaka wEni-Rogeli.

¹⁷ Vano, waakottoombela ottuttuwani orowaka wEni-Xemexi ni oGeliloti ori ohoolo wa okhatoni ya wAdumimi, onakhuruwela nluku na Bohani, mwaana mulopwana a Rubeni.

¹⁸ Waapwaherera mpaka ottuttuwani wa mwaako, ohururaka oBet-Araba, okhuruwelaka wAraba.

¹⁹ Vahoolowaya waahurura ottuttuwani wa oBeti-Hogela, onakotela omuxeloni ota wa Ephareiya ya Maakha, omahelano wa Yordanu ohitto. Owo waari mwiinano wa ohitto.

²⁰ Mooloko Yordanu aahelanne mwiinano wa mpatta ninkhuma nsuwa. Iyo saari nyiinano saahelana mipatta sootheene sa yoohiyeriwa ya mahimo a Benyamini.

²¹ Epuumba ya Benyamini, nihimo ti nihimo, yaahaakhela isidade iya: oYeriko, oBeti-Hogela, wEmeki-Kezizi,

²² oBet-Araba, oZamarayimi, oBeteli,

²³ wAwimi, oPara, wOfera,

²⁴ oKefari-Hamoni, wOfeni, oGeba. Saari isidade muloko ni piili ni mittetthesaya.

²⁵ oGibiyoni, oRama, oBeheroti,

²⁶ oMizepa, oKifera, oMoza,

²⁷ oRekemi, oYirepeyeli, oTarelaya

²⁸ oZela, oHayalefi, esidade ya aYebusi (eyo tiiyo oYerusaleemu), oGibeya ni oKiriyati. Saari isidade muloko niixexe ni mittetthesaya. Ela yaari yoohiyeriwa ya mahimo a Benyamini.