Yoxuwa 1 - Emakhuwa Bible

Muluku onuuluma ni Yoxuwa

¹ Vahoolo wa okhwa wa Moisesi, murumeiyi a Yave, Yave aamweerela Yoxuwa, mwaana a Nuni, namakhaviheraawe Moisesi:

² “Murumeiyaaka Moisesi, ohookhwa. Vano, nyuwo ni muloko wootheene ola mwiirehererase weera mulapuwe mooloko Yordanu ni mwavolowe mweelaponi kineeraaka kaavahe aYixrayeli.

³ Mmapuroni moothemwene muneeraanyu mvire kinimoovahani ntoko kaamuroromelinghaaka Moisesi.

⁴ Elapo yootheene eyo eniikhale yawinyu: Okhuma onikareni mpaka oLibanu, ni okhuma mooloko mutokotoko Efratesi mpaka ephareiya etokotoko mpatta wa ninkela nsuwa vamoha ni elapo yootheene ya aHiti.

⁵ Khaawo eniiwere woowinani mmahukuni ootheene a okumaanyu. Kinookhala ni nyuwo ntoko kaaraaka ni Moisesi. Nkirwa koohiyaani meekhiinyu.

⁶ Mukhaleke ookhomaala ni oolipa murima, niwoko munoohoolela muloko ola weera mphwanye elapo kaaroromelinghaaka ni nlipelo makholowaanyu ovaha.

⁷ Mukhaleke ookhomaala ni oolipaxa murima! Nnene woowiiwelela malamulo ootheene murumeiyaaka Moisesi oovanghaaweni, muhihapuwelaka moono mulopana naari muthiyana weera siweetteleni nnene weiwo muneeraanyu mvireke.

⁸ Masu a Elivuru ela ya Nlamulo ekhaleke mmwaanomwanyu. Mutthokelele othana ni ohiyu weera mukwanihere oororomeleyeene sootheene silempwalemo. Hiiho munooreereliwa mphironimwanyu siweettelakani nnenesene.

⁹ Kohoolamulelani: Mukhaleke ookhomaala ni oolipa murima. Muhoove hata muhiporore, niwoko Yave Mulukwaanyu onookhala ni nyuwo weiwo muneeraanyu mvire.”

Oreherera mavoleelo

¹⁰ Vano Yoxuwa aahaalamulela asitokweene a muloko:

¹¹ “Muviravirase mukonelingwe ni mwalamulelase muloko weera oreherere itthu. Eviraleene mahuku mararu nyuwosa munoomulapuwa Yordanu vaava weera mwavolowe ni mwakuxe elapo yeeyo Yave Mulukwaanyu onoovahaaweni.’”

¹² Vaheera aaweerela aRubeni, aGadi ni eriyari ya epuumba ya Manaxe:

¹³ “Muupuwelele nlamulo Moisesi murumeiyi a Yave oovahansaaweni: ‘Yave Mulukwaanyu onimoovahani wiitthuuwa ni onimoovahasani elapo ela.’

¹⁴ Axaarinyu, anamwaniinyu ni mihuwosanyu sihaleke mweelaponi Moisesi oovanghaaweni mpatta ninkhuma nsuwa wa oYordanu, vaheera asilopwanaanyu ootheene angwera owana elapuweke ni ikaphwitthi ohoolo wa axunninyu. Nyuwosa mwaakhavihereke axunninyu aYixrayeli

¹⁵ mpaka Yave aneeraawe aavahe nipuro noowiitthuuwa ntoko oovanghaaweni ni mpakatho awo eneeraaya ekuxe elapo Yave Mulukwaanyu onoovahaaweni. Vahoolowaya nyuwosa muhokoleeleke weera mwaakamele elapwaanyu, mwa yeeyo Moisesi murumeiyi a Yave oovanghaaweni, mpatta ninkhuma nsuwa wa Yordanu.”

¹⁶ Vano awosa yaamwaakhula Yoxuwa: “Nnoopaka sootheene nyuwo munilamulenlaanyu ni nnoorowa weiwo muneeraanyu munirumihelewo.

¹⁷ Hiiho ntoko naamwiiwelenlaahu nnenesene Moisesi, nnoowiiwelelani nyuwotho. Yave Mulukwaanyu akhaleke ni nyuwo ntoko aaraawe ni Moisesi.

¹⁸ Yoowo anaarambure mahusihowaanyu ahiiwelelaka yoohimaanyu apakeye yeeyo muneeraanyu mulamulele, iiviwe. Mukhaleke paahi ookhomaala ni oolipa murima.”