Yohaane 4 - Emakhuwa Bible

Yeesu ni muthiyana muSamariya

¹ aFarisi* yaahiiwa yeeriwaka weera Yeesu eera aapakaka ni aapatisaka oohusera ompwaha Yohaane,

² aari mweeraru ahikhanle Yeesu aapatisa, mene oohuseraawe.

³ Vano, Apwiya yaasuwenlaaya yeeyo, yaavenya oYudeiya ni yaahokoleelatho oGalileiya.

⁴ Waatthuneya weera avire oSamariya.

⁵ Hiiho aaphiya esidade emoha ya oSamariya yiitthaniwa Sikari, vakhiviru wa elapo Yakobe aamvanghaawe mwanawe Yoseefe.

⁶ Yaakhala weiwo ehime ya Yakobe. Yeesu akhulumungweene ni mukwahaawe, aakilaathi mukerekhere wa ehime. Yeeyo yeereiye nsuwa vamuru.

⁷ Vano aahoowa muthiyana muSamariya orika maahi. Yeesu aamweerela: “Mukivahe maahi vakhaani.”

⁸ Oohuseraawe yeera erongweene musidadeni othuma yooca.

⁹ Muthiyana muSamariya aamukoha: “Heeni Nyuwo mureene muYuda munkivekelaanyu miyo, kireene muSamariya, maahi weera muwure?” Vano, aYuda khaaniiraana ni aSamariya.

¹⁰ Yeesu aamwaakhula: “Nyuwo mwaasuwenle yamahala ya Muluku ni taani onoovekelani maahi, mwaamumvekela maahi ni Owo aamoovahani maahi a okumi.”

¹¹ Muthiyana aaweerela: “Apwiya khamunono yoorikela maahi ni ehime eri yoowiixera. Mmwiphwanye woowi maahi a okumi awo?

¹² Weeraka Nyuwo mutokweene waapwaha atithihu Yakobe yaanivanghe ehime mwa yeeyo awo aneenaaya aawura nitho anamwanaaya ni muhuwaaya?”

¹³ Yeesu aamwaakhula: “Yoole ongwura maahi ala onoovoliwatho ntthona.

¹⁴ Vaheera yoole ongwura maahi Miyo kinimvahaaka, kharwaru avoliwa ntthona. Ohiyanawaya, maahi kineeraaka kimvahe, eniithatuwe naattuuttu akhumiheraka maahi a okumi woohimala.”

¹⁵ Muthiyana aamweerela: “Apwiya mukivahe maaheene yaawo weera miyo kihivoliwetho ntthona, hata kihihokoleele va orika maahi.”

¹⁶ Owo aamweerela: “Murowe, mwawiitthane aiyinyu ni ngweke wenno.”

¹⁷ Owo aamwaakhula: “Nkinono aiyaka.” Yeesu aamweerela: “Nyuwo moohima ekhaikhai mweeraka weera khamunono aiyinyu.

¹⁸ Vekhakhai, mwaakhalano athanu ni mulopwana murinaanyu vaanaano, khahiyono aiyinyu. Yeeyo muhimmaanyu ti ya ekhaikhai.”

¹⁹ Muthiyana aaweerela: “Apwiya kinoona weera muri Mprofeeti.”

²⁰ Makholowaahu yaalapela vamwaakoni ola, mene nyuwo aYuda muneera weera oYerusaleemu ti nipuro nintthuneya olapa.”

²¹ Yeesu aahima: “Muroromele yeeyo kinooleelaakani muthiyana. Ehuhu yookhuveela nyuwo muneeraanyu muhaalapele Atiithi, hata vamwaakoni ola, hata oYerusaleemu.

²² Nyuwo aSamariya munlapela yeeyo muhisuwenlaanyu, hiyo noosuwela yeeyo ninlapelaahu niwoko ovuluxiwa ongweela wa aYuda.

²³ Vanonto, eneera ephiyaka ehuhu, aani vekhaikhai yoophiya, eneeraaya anamalapela a ekhaikhai yaalapele Atiithi ni mMunepani Wootteela ni mweekhaikhaiyini. Ti anamalapa ntoko awo Atiithi angwaasaaya.

²⁴ Muluku ti Munepa ni ontthuneya weera anamalapelaawe emulapele mMunepani Wootteela ni mweekhaikhaiyini.”

²⁵ Muthiyana aamweerela: “Koosuwela weera Mesiya, iitthaniwa Kristu, aneera awaaka. Owo aawaaka, anaanithalihere hiyo sootheene.”

²⁶ Vano Yeesu aahima: “Miyo kinuuluma ni nyuwo ti Mesiya.”

Oohusera anghokolowa osidade

²⁷ Ehuhuweene yeele oohuseraawe yaahokolowa ni yaatikhina emphwanyaka Yeesu uulumaka ni muthiyana. Khaawotho aamukonghe: “Muntthuna osuwela eheeni?,” hoye hoye “Heeni onuulumaawe ni yoola?”

²⁸ Vano, ahiyaka mwaapwaawe, muthiyana aahokoleela osidade ni aaheerela muloko wa atthu:

²⁹ “Ngwe mmoone Mulopwana okileenle sootheene kipankaaka. Weeraka apaale ti Kristu?”

³⁰ Yaavenya musidadeni ni yaarowa wa Yoowo.

³¹ Yeereiyaka hiiho, oohusera a Yeesu yannamunyeserera Yoowo yeeraka: “Muhusiha, muce etthu.”

³² Mene Owo aaweerela: “Kookhalano yooca ekina nyuwo muhisuwenlaanyu.”

³³ Vano oohuseraawe yaaheerelana: “Weeraka ookhala mukina ongwiihenre yooca?”

³⁴ Yeesu aaweerela: “Yoocaaka ti opaka otthuna wa Yoowo okiruminghe ni omaliha mutekwaawe.

³⁵ Nyuwo khamuneera: ‘Soohala nyeeri mixexe mpaka ophiyera ehuhu ya ohepha?’ Miyo kinooleelani: muhule maitho ni moone imatta. Iyo siri soolikanaxa weera sihephiwe.

³⁶ Yoowo onghepha onaakhela ntthuvelonawe ni onghephela soowiima okumi woohimala moota wooweera yoole aanle nitho yoole onghepha anootteeliwa murima.

³⁷ Hiiho ti ekhaikhai miruku singhimaaya: ‘Mukina onaala ni mukina onghepha.’

³⁸ Miyo koorumihaleni weera muhephe yeeyo muhilimmaanyu. Akina yannavaraxa muteko ni nyuwo munghepha soowiima sa mitekosaya.”

ASamariya ancipale animuroromela Yeesu

³⁹ ASamariya ancipale a esidade ele yaamuroromela Yoowo niwoko na onamoona onttharelana wa muthiyana: “Owo ookileela sootheene kipankaaka.”

⁴⁰ Hiiho emwaattamelaka Yeesu, aSamariya yaamunyesereriha weera akhale ni yaawo ni Owo aakhala mahuku meeli.

⁴¹ Niwoko na maswaawe, akina ancipale yaamuroromela.

⁴² Yaamweerela muthiyana: “Vano hiyo khaninroromela niwoko na maswaanyu paahi, mene niwoko noomwiiwa asineenaahu ni noosuwela weera Owo ti Mvuluxa a ekhaikhai a elapo ya vathi.”

Yeesu onimulamiha mwaana a namuteko mutokweene a mwene

⁴³ Woovira mahuku meeli ale, Yeesu aavenya arowaka oGalileiya.

⁴⁴ Yeesu muneenaawe aahaaleelaxa weera khawoworu mprofeeti ori oottittimihiwa mweelaponimwawe.

⁴⁵ Aphiyaka oGalileiya, aGalileiya yaamwaakhelela nnene. Awo yaahoona sootheene Owo aapankaawe oYerusaleemu wa ehuhu ya mPaska* niwoko yaaritho weiwo.

⁴⁶ Emaara ekinatho Owo aaxekura oKana oGalileiya, weiwo aatatunxaawe maahi eviinyu. Vano aakhala weiwo namuteko mutokweene mmoha a mwene, mwanawe aavoreiwa oKafarnawu.

⁴⁷ Iiwalaawe yeeriwaka weera Yeesu aari oGalileiya, awaaka oYudeiya, aamwaasa anamdyoonttelela weera arowe amulamihe mwanawe aahanle vakhaani okhwa.

⁴⁸ Yeesu aamweerela: “Nyuwo mwaahoona ineneero ni sootikhiniha, khamunroromela!”

⁴⁹ Namuteko mutokweene a mwene aaweerela: “Apwiya, ngwe, mwanaka ahinaaye okhwa.”

⁵⁰ Yeesu aamwaakhula: “Muroweke, mwaninyu onookhala ni okumi.” Mulopwana aaroromela masu a Yeesu ni aavenya.

⁵¹ Areene nlelo mphironi, arumeiyaawe yaamukumanano ni ihaali weera mwanawe aari ni okumi.

⁵² Aakohaka ewoora heeni mwanawe olammaawe, awo yaamwaakhula: “Eretta yaamvoreiya yaamuhiya osilo ewoora yanaathannapiili.”

⁵³ Vano atiithi yaasuwela weera yeeyo yaari ewoora emoharu aamuleenlaawe Yeesu: “Mwaninyu onookhala ni okumi.” Hiiho aamuroromela, nitho ootheene a vaatewawe.

⁵⁴ Eyo yaari eneneero yanaaveeli yootikhiniha Yeesu aapankaawe arwaaka oYudeiya arowaka oGalileiya.