Yohaane 18 - Emakhuwa Bible

Otthukiwa wa Yeesu

¹ Amalihaka ovekela, Yeesu aavenya vamoha ni oohuseraawe ni yaalapuwa vanxepani na Kedroni. Okhopela naakhalawo nttimbe na sooliveira* aavolongwaawe ni oohuseraawe.

² Vano Yudasi, namavariha, aasuwela nnenesene nipuro nne niwoko imaara sincipale Yeesu annathukumanawo ni oohuseraawe.

³ Yudasi aarowa ottimbeni akuxaleene mukuttula wa anakhotto ni anamalipelela akina yaarumihiwe ni ahooleli a asaserdoti* ni aFarisi*, ekuxaka mithuko, onyaari ni iyuuma sa ekhotto.

⁴ Yeesu, asuwelaka sootheene seera simukhumelele, aavenya ni aahaakoha: “Taani nyuwo mummwaasaanyu?”

⁵ Awo yaamwaakhula: “Yeesu a oNasarete.” Yeesu aaweerela: “Ti Miyo.” Vano Yudasi, namavariha, aari ni yaawo.

⁶ Eerakaru Yeesu ‘ti Miyo’ awo yaaheetta nttulinttuli enamorela vathi.

⁷ Yeesu aahaakoha veeli: “Taani mummwaasaanyu?” Awo yaamweerela: “Yeesu a oNasarete.”

⁸ Yeesu aawaakhula: “Kohooleelani weera ti Yoomi. Mwakaasa Miyo, mwaahiye atthu ala eroweke.”

⁹ Iyo sikhumelenle weera ekwaniheriwe masu aahimmaawe: ‘Khakiriheiye naari mutthu mmoha a yaawo mwaakivanghaanyu.’

¹⁰ Simeyoni Pedru akuxaka ekatana, aatholola, anamuvulaliha murumeiyi a mutokweenexa a asaserdoti*, amukwasaka naaru na moonowaawe mulopwana. Nsina na murumeiyi owo naari Malko.

¹¹ Vano Yeesu aamulamulela Pedru: “Musunge ekatanaanyu! Apaale nkinrowa owura ekoomixi ela Atiithi akivanghaaya?”

Yeesu onronghiwa wa Hana

¹² Hiiho mukuttula wa anakhotto vamoha ni mutokweenaaya ni anamalipelela a aYuda yaamvara Yeesu. Yaamutthuka

¹³ ni yaamuronghela toko Hana aari atatawe Kayafasi, mutokweenexa a asaserdoti* wa eyaakha ele.

¹⁴ Aari Kayafasi aaleenle aYuda weera waari wooreera akhwiyeene mutthu mmoha wa muloko wa atthu.

Pedru onimruna Yeesu

¹⁵ Simeyoni Pedru ni oohusera mukina yaamutthara Yeesu. Asuweliweene ni mutokweenexa a asaserdoti*, oohusera mukina ole aavolowa vamoha ni Yeesu vaate wa mutokweenexa a asaserdoti*.

¹⁶ Pedrutho aahala awehereraka okhwipi wa vaate wa mulako. Oohusera mukina aasuweliwe ni mutokweenexa a asaserdoti* aahokolowa, aahuuluma ni namalipelela muthiyana a mulako, ni aamvolongha Pedru.

¹⁷ Muthiyana ole aamukoha Pedru : “Nyuwo khamuhiyono mmoha a oohusera a Mulopwana Ola?” Owo aamwaakhula: “Nkihiyono.”

¹⁸ Vano, weera oriiraka, ni arumeiyi ni anamalipelela yaari mukerekhere mooro waakukhiwe weera yoore. Pedru aaritho yeemelelo ni yaawo, ooraka.

Mutokweenexa a asaserdoti* onimukohakoha Yeesu

¹⁹ Yeereiyaka hiiho, mutokweenexa a asaserdoti* aamukohakoha Yeesu mwaha wa oohuseraawe ni mahusihowaawe.

²⁰ Yeesu aamwaakhula: “Miyo kaahuuluma nnenesene mwaatthuni. Mahuku ootheene kannaxuttiha muSinagogani* ni Mpaani mwa Muluku weiwo aYuda ootheene anthukumanaayawo. Nkuulumme naari etthu muxiirini.

²¹ Munkikohakohera heeni? Mwaakohe yaakiiwale. Vekhaikhai awo ansuwela kaahimaaka.”

²² Yeesu ahimakaru yeeyo, namalipelela mmoha aari vakhiviru aammana owiitho amukohaka: “Ommwaakhula hiiho mutokweenexa a asaserdoti*?”

²³ Yeesu aamwaakhula: “Miyo kaahimale yoonanara, mukoonihere, mene kuulumale ekhaikhai, heeni mukimannaanyu?”

²⁴ Vano, Yeesu areene nlelo ootthukiweene, Hana aamurumiha wa Kayafasi.

Pedru onimuruna Yeesu imaara piilitho

²⁵ Simeyoni Pedru ooraka, awo yaamukoha: “Nyuwo khamuhiyono mmoha a oohuseraawe?” Owo aaruna eeraka: “Nkihiyono.”

²⁶ Mmoha a arumeiyi a mutokweenexa a asaserdoti*, mmusaawe a mulopwana ole Pedru aamukwansaawe naaru aanyeserera: “Miyo nkiwoonneni ni Yoowo ottimbeni?”

²⁷ Emaara ekinatho Pedru aaruna ni ehuhuweene yeeyo muthupi waahiipa.

Yeesu ohoolo wa Pilatu

²⁸ Woottharelana, aYuda yaamukuxa Yeesu wa Kayafasi emuronghaka empa etokotoko ya guvernadori a oRooma. Vano, oxaaka ni weera esembe ovalihiwa, aYuda khayaavolowa empa etokotoko ele niwoko yaatthuna omucano mPaska*.

²⁹ Pilatu aarowa wa yaawo ni aahaakoha: “Yoowoothera heeni murinaanyu ni Mulopwana Ola?”

³⁰ Awo yaamwaakhula: “Ola ahaakhanle mutakhali, khanooruuhelani.”

³¹ Pilatu aaweerela: “Munkuxe ni munthorihe ntoko nlamulonanyu.” aYuda yaamuleela: “Hiyo khaninono ikuru soothorihela wookhwaani.”

³² Eyo yeereiye weera ekwaniheriwe masu Yeesu aahimmaawe, athoonyeraka ni mukhalelo heeni eeraawe akhwe.

³³ Pilatu aavolowatho empa etokotoko, aamwiitthana Yeesu anamukoha: “Nyuwo Mwene a aYuda?”

³⁴ Yeesu aamukoha: “Yookoha ela ti yawinyu, hoye hoye atthu akina yoorumaleni weera mukikohe?”

³⁵ Pilatu amwaakhula: “Apaale miyo muYuda? Waari muloko wa atthwaanyu ni ahooleli a asaserdoti* akivaherenre Nyuwo. Eheeni mumpankaanyu?”

³⁶ Yeesu aamweerela: “Omwenaaka khoohiyono wa elapo ya vathi ela. Waakhanle, arumeiyaaka yaangwana weera ewooceelihe aYuda okitthuka. Vanonto omwenaaka khoohiyono wa wenno.”

³⁷ Pilatu aamweerela: “Vano Nyuwo Mwene!” Yeesu aamwaakhula: “Muneera weera kiri Mwene. Vanonto, ti niwoko na yeeyo kiyariwaaka ni kirweenlaaka mweelaponimu: weera kikhalele onamoona ekhaikhai. Ootheene ari a ekhaikhai, anookiiwa.”

³⁸ Pilatu aamukoha: “Ti heeni ekhaikhai?” Uulumaka yeeyo, aavenya veeli arowaka yaaraayawo aYuda ni aaweerela: “Nkinoona nthowa mwa Yoowo.

³⁹ Wa soothesene, ntoko eraaya ekhovelelowaanyu, ontthuneya miyo wootaphulelani namatthukiwa mmoha wa ehuhu ya mPaska*. Muntthuna weera miyo kimutaphule Mwene a aYuda?”

⁴⁰ Awo yaamwaakhula ekhuwelaka: “Hoye! Owo hoye! Nnimutthuna Baraba!” Vano, Baraba aari nasusuki.