Yohaane 15 - Emakhuwa Bible

Evideira* ni mirai

¹ Miyo kiri Evideira* ya ekhaikhai ni Atithaka ti Namalima.

² Murai wootheene oreene mwa Miyo ohiimaka, Atiithi anoothikila ni wootheene oniima, Awo anooreherera weera wiimaxeke.

³ Nyuwo mootteelihiwa niwoko na masu kooleelaakani.

⁴ Mukhale mwa Miyo ni nkikhale mwa nyuwo. Khoowowo murai ongwera wiima mwaneenaayaru, ohikhanle muvideirani*. Nyuwotho khamungwera wiima, muhikhanle mwa Miyo.

⁵ Miyo ti Evideira*; nyuwo muri mirai. Akhala mukina onkhala mwa Miyo ni Miyo mwa yoowo, owo onimwiimaxa, niwoko kihikhanle Miyo, nyuwo khamungwera opaka naari etthu.

⁶ Akhala mukina ohinkhala mwa Miyo, anaakhale ntoko murai omvonyeriwa okerekhere ni onuuma. Miraisene seiyo sinoottottiwa, sivonyeriweke mmooroni ni sinoohisiwa.

⁷ Nyuwo mwakhala mwa Miyo ni maswaaka mwa nyuwo, mmwivekele yeeyo muntthunaanyu ni mmwivahiwe.

⁸ Atithaka amvuwihiwa nyuwo mwiimaxa, mooniheraka hiiho weera ti oohuseraaka.

⁹ Ntoko Atiithi akisivenlaaya, Miyotho kohoosivelani. Mukhale moosivelanimwaka.

¹⁰ Nyuwo mwiiwelela malamulowaaka, munookhala moosivelanimwaka ntoko Miyo kiniiwelelaaka malamulo a Atithaka ni kinkhala moosivelanimwaya.

¹¹ Miyo kooleenleni yeeyo weera ohakalalawaka okhale mwa nyuwo ni weera ohakalalawanyu okhale wookwanela.

¹² Nlamulonaka ti nna: musivelane ntoko koosivenlaakani.

¹³ Khaawo orino osivelaxa ompwaha yoowo onaavaherera okumaawe asinthamwenaawe.

¹⁴ Nyuwo mmwikhale asinthamwenaaka mwapaka yeeyo Miyo kinoolamulelaakani.

¹⁵ Nkingwiitthanani arumeiyi niwoko murumeiyi khansuwela yeeyo Apwiyaawe ampakaaya. Ohiyanawaya, Miyo kingwiitthanani asinthamwenaaka, niwoko sootheene kiiwalaaka wa Atithaka, Miyo kohoosuwelihani.

¹⁶ Nyuwo khamukithanlale Miyo, mene Miyo kohoothanlani nyuwo weera murowe ni mwiime soowiima soohimala weera Atiithi yoovaheeni yeeyo muneeraanyu muvekele mwa Nsinanaka.

¹⁷ Nlamulonaka ti nna: musivelane mukina ni mukhwaawe.

Amalapo anaathanya oohusera

¹⁸ Amalapo yoothanyani, muupuwelele weera ehinaaye woothanyani, akipacenre toko Miyo.

¹⁹ Mwaari a amalapo, awo saano yoosivenleeneni ntoko awaya. Wa soothesene, khamuhiyono a amalapo, mene Miyo kohoothanlani koovenxakani wa amalapo. Tivawo amalapo anoothanyaayani.

²⁰ Muupuwelele masu kooleenlaakani: kheewowo epottha yoowaapwaha apwiyaaya. Awo yaakittharatthanre Miyo, animoottharattharanitho. Yiiwelenle maswaaka, eniyiiweleletho maswaanyu.

²¹ Eniyoopakeleni hiiho niwoko na Nsinanaka yeenre ehaasuwelaka Yaawo akiruminghe.

²² Miyo kahaawiiye kuulumaka ni yaawo, awo saano ehikhanle ni milattu. Vanonto, awo aakhalano milattu sa sootthekasaya.

²³ Yoole onkithanya, onaathanyatho Atithaka.

²⁴ Miyo kahaapaka variyariwaya miteko mukina ohitonkwaawe owera, awo saano ehikhanle ni milattu. Vanonto, awo yaahoona miteko iye ni yaakithanya Miyo nitho Atithaka.

²⁵ Eyo yeereenle weera ekwaniheriwe yeeyo elempwale munlamulonimwaya: ‘Yaakithanya kihikhalanne nthowa.’

²⁶ Namalaka awa, mwa Yoowo kineeraaka koorumiheleni wa Atiithi, Munepa wa ekhaikhai onrweela wa Atiithi, Owo onuukikhalele onamoona Miyo.

²⁷ Ni nyuwotho mmwikhalele onamoona niwoko okhuma ompacereroni mpaka vano muri ni Miyo.