Yohaane 14 - Emakhuwa Bible

Yeesu onaapepesa oohuseraawe

¹ Mirimasanyu sihikacamiheye. Munroromele Muluku, mukiroromeletho Miyo.

² Vaate wa Atithaka aakhala mapuro mancipale. Wahaakhanle hiiho, Miyo saano kooleenleeneni. Miyo kinkela woorehererelani nipuro.

³ Ni Miyo kaarowaka ni koorehererelakani nipuro, kinoohokolowa ni nkookuxeni vamoha ni Miyo weera nyuwo mwakhale weiwo Miyo kineeraaka kakhalewo.

⁴ Nyuwo moosuwela ephiro kineeraaka kirowe.”

Yeesu ti ephiro

⁵ Tomaxi aamweerela: “Apwiya, khanisuwenle munkelaanyu, vano nnisuwele hai ephiro?”

⁶ Yeesu aamwaakhula: “Miyo ti Ephiro, Ekhaikhai ni Okumi. Khaawo ongwa wa Atiithi, ohikhanle aviraka mwa Miyo.

⁷ Nyuwo mwaakisuwenle Miyo vekhaikhai, mwaamwaasuwelatho Atithaka. Okhuma vaanaano nyuwo mohaasuwela ni moowoona.”

⁸ Filipe aamweerela: “Apwiya munoonihere Atiithi ni eyo enoonikwana.”

⁹ Yeesu aamwaakhula: “Miyo kanneetta ni nyuwo ehuhu yincipale ni orookhalaru hiiho nyuwo khamukisuwenle Miyo, Filipe? Yoowo onkoona Miyo, ongwoonatho Atithaka. Heeni nyuwo muneeraanyu: ‘Munoonihere Atiithi’?

¹⁰ Nyuwo khamunroromela weera Miyo kiri mwa Atiithi ni Atiithi mwa Miyo? Masu kinooleelaakani khaahiyono awaka. Ohiyanawaya, ti Atiithi ankhala mwa Miyo ankwanihera mutekwaaya.

¹¹ Mukiroromele Miyo kooleelakani weera Miyo kiri mwa Atiithi ni Atiithi mwa Miyo. Hoye hoye mano muroromele niwoko na mitekosene seiye.

¹² Kinooleelani ekhaikhai weera yoole onkiroromela Miyo anaapaketho miteko Miyo kimpakaaka. Anaapake miteko soopwahaxa iya, niwoko Miyo kinkela wa Atiithi.

¹³ Vano Miyo nkipake yeeyo nyuwo muneeraanyu mvekele mwa Nsinanaka weera Atiithi ekhale oovuwihiwa mwa Mwaana.

¹⁴ Yeeyo nyuwo muneeraanyu mvekele mwa Nsinanaka, Miyo nkipake.”

Yeesu onroromeliha Munepa Wootteela

¹⁵ Nyuwo mwakisivela Miyo, mmwiiwelele malamulowaaka.

¹⁶ Miyo nkaavekele Atiithi ni Awo eniyoovaheeni Namalaka mukina weera akhale ni nyuwo mahuku ootheene,

¹⁷ eyo tiiyo Munepa wa ekhaikhai. Amalapo khaangwera waakhela niwoko khaanoona, hata khaansuwela. Vaheera nyuwo moosuwela, niwoko Owo onkhala ni nyuwo ni onuukhale mwa nyuwo.

¹⁸ Miyo nkirwa koohiyaani akwaasuni; nkoohokoleeleni.

¹⁹ Vahoolo vakhaani amalapo kheerwa ekoonatho; vano nyuwo mmwikoone. Keenre Miyo kikhalaka ni okumi, nyuwotho mmwikhale ni okumi.

²⁰ Nihuku nenenenno nyuwo mmwiiwexexe weera Miyo kiri mwa Atithaka, nyuwo mwa Miyo ni Miyo mwa nyuwo.

²¹ Yoowo okhalanne malamulowaaka ni oniiwelela, ti yoowo onkisivela. Yoowo onkisivela, anaasiveliwe ni Atithaka ni Miyotho nkimusivele ni nkiixoonihere wa yoowo.”

²² Vano, Yudasi (omuhiya Iskariyoti) aamukoha: “Apwiya heeni muneeraanyu mwiixoonihere wa hiyo, ehikhanle amalapo?”

²³ Yeesu aamwaakhula: “Mukina akisivela Miyo, oniiwelela maswaaka. Atithaka eniimusivele ni hiyo nnirwe wa yoowo ni nnikhale mwa yoowo.

²⁴ Yoole ohinkisivela Miyo, khaniiwelela maswaaka. Masu ala nyuwo muniiwaanyu khaahiyono awaka; ari a Atithaka akiruminghe.

²⁵ Sootheene iyo kooleenlaakani Miyo nlelo kireene ni nyuwo.

²⁶ Namalakatho, Munepa Wootteela Atiithi eneeraaya erumihe mwa Nsinanaka, ngwooxuttiheni itthu sootheene ni onuuwuupuxereni sootheene kooleenlaakani.

²⁷ Kinoohiyerani murettele; murettelaaka kinimoovahani. Miyo nkinoovahani ntoko elapo ya vathi emvahaaya. Sihituthuwe mirimasanyu, hata muhoove.

²⁸ Nyuwo mookiiwa keeraka: ‘Kinoorowa, mene kinimoohokoleelani.’ Nyuwo mwaakisivela Miyo, mwaanghakalala niwoko kinkela wa Atiithi yeenre Atiithi ekipwahaka Miyo.

²⁹ Eyo Miyo kooleenlaakani ehinaaye weereiya, weera yeereiyaka, nyuwo muroromele.

³⁰ Miyo nkinooleelani vancipale niwoko mutokweene a elapo ya vathi aneera arwaaka. Owo khanono ikuru ni Miyo.

³¹ Wa soothesene, elapo ya vathi entthuneya osuwela weera kinaasivela Atiithi ni kimpaka nnenesene yeeyo Atithaka akilamulenlaaya. Muvenye ni nrowe.