Yobi 8 - Emakhuwa Bible

Bildade onghima weera Yobi ontthuneya orukunxa murimaawe

¹ Vano, Bildade muXuhi, aahaakhula:

² “Mpaka yaakhani nyuwo muneeraanyu muulume mooteene yoowo? Maswaanyu ti epheyo etokotoko!

³ Weeraka Muluku onoopiritula ekhaikhai? Weeraka Muluku a ikuru sootheene onookhoromanyiha yeeyo eri yoowookoleleya?

⁴ Anamwaniinyu yaamutthekenlaaya, Owo aahaattaruxela yoonanara yaapankaaya.

⁵ Vaheera nyuwo mwaamwaasa Muluku, munadyoonttelela wa Muluku a ikuru sootheene,

⁶ nyuwo mwakhala ootteela ni ookwanela, Owo onoovenya vaanaano va aaweerelakani nyuwo ni onimootekihani vanipuroni nookwanela.

⁷ Ompacereroniwanyu onuukhale wookhweyakhweya, ohiyanawaya ommaleloniwaya onuukhale wooweetteleya nnene.

⁸ Mukohe ikhapira sa khalayi ni moone yeeyo asitithinyu yaaxuttenraaya,

⁹ niwoko hiyo niyariwe vaanaano ni khanisuwenle etthu. Mahukwaahu a mulaponi anlikana ntoko munttuusi.

¹⁰ Awosa animooxuttihani ni animooleelani. Awosa animuuluma masu anrweela mwa ngwiiwexexanimwaya.

¹¹ Ettiili enunnuwa mmoolokoni. Ettheere enunnuwa mmaahini.

¹² Iyo nlelo sunnuwaka ni sipaceraka ophuwa, sinuuma sihinaaye okhomaala, aani sinuuma woowaakuveya opwaha yakhalaru erooro.

¹³ Iwo ommaleloni wa ootheene animuttiwala Muluku; hiiho onlakaseya oweherera wa atakhali.

¹⁴ Yeeyo onroromelaawe ti yoophweeya, yeeyo oniikhaviheraaweno ti ifiiyu sa ttandaasi.

¹⁵ Onimphiteera ttandaasaawe, mene owo khanlipa; onoomvarexexa, mene owo onoopaseya.

¹⁶ Owo ori ntoko mwiri woohelelaxiwa ohinnyaala nsuwa, okuttukutteelaka muttimbeni;

¹⁷ mikwankhwaarisaya sintthavelana vamwaako a maluku ni sinaasaasa moowaaleleya eriyari ya nyala.

¹⁸ Vaheera waapheliwaka vanipuroniwaya, nipuro nno ninkhootta neeraka: ‘Nkinoone.’

¹⁹ Iwo ti ommaleloni wa okumaaya, ni vatthayani simmela nyiri sikina.

²⁰ Vano, ettiitthu ti weera Muluku khanimukhootta mutthu ookwanela ni khanlipihera matata a yaale ampaka yoonanara.

²¹ Vaheera wa nyuwo, Owo onoosarihatho mmwaanomwanyu otheya ni okhuwela wa ohakalala.

²² Amwiittanaanyu animuulihiheya muru, ni iheema sa atakhali khasikhalatho.”