Yobi 40 - Emakhuwa Bible

¹ Yave aamweerelatho Yobi:

² “Weeraka yoole aamvaanya Muluku a ikuru sootheene onoomookolela? Yoole ommoothera Muluku a ikuru sootheene amwaakhule!”

Yoomwaakhula Yave ya Yobi

³ Vano Yobi aamwaakhula Yave:

⁴ “Nkiphwanenle; moota heeni kineeraaka kaakhule? Kimphuta iyanosaka.

⁵ Kohuuluma emaara emoha, mene nkinonotho yoowaakhula; aani imaara piili, mene nkihimatho etthu.”

Yoohima yanaaveeli ya Muluku

⁶ Vahoolowaya Yave aamuulumano Yobi mutthekuni:

⁷ “Mwiireherere ntoko mutthu; Miyo kinimookohakohani, ni nyuwo mukaakhuleke.

⁸ Nyuwo munoohovela ororomeleyawaka? Munookithoriha weera mwiixaakihe?

⁹ Weeraka moonowaanyu onlikana ni wa Muluku, ni nsunanyu nnoowera okukutteya ntoko nawawe?

¹⁰ Vano, mwiiphwanelihe waara ni ovuwa, ni ngwarele otokweene ni nttittimiho.

¹¹ Muyeehe onyoonyiwa wa isarasanyu, mungwehe khula namwiixoona ni mungyevihe,

¹² mwaawehe anamwiixoona ootheene ni mwaayevihe, mwaattikitthe atakhali weiwo araayawo.

¹³ Mwaavithe ootheenaawo vantthupini; nkuttelele ikhovesaya mmahiyeni.

¹⁴ Hiiho, kinimwaakhulela weera ntatananyu noolopwana niwere woovuluxani.

¹⁵ Mungwehe Bahemoti* kimpattunxaaka ntoko koopattuxaakani nyuwo – owo onca malaxi ntoko emombe.

¹⁶ Ookhalano ikuru sitokotoko mmettonimwawe! Moota okhomaanlaaya waamirimawawe!

¹⁷ Mwiilaawe oniinaina ntoko mwiri wa esedari*; misemba sa itakhwisawe siri soolipasene.

¹⁸ Makhuvaawe ti mipheve sa ebronze*, mipatta sa erutthwaawe ti ikopo sa eyuuma.

¹⁹ Owo ti ethoonyero yooreeraxa ya miteko sa Muluku. Wa soothesene Mpattuxaawe paahi ongwera omwaattamela yoowo ni ekatanaawe.

²⁰ Nyaako sinoomvaha sootheene sinruweraaya, ni axinama ootheene a ntuphini antheela mukhivirumwawe.

²¹ Oniixaatalela vathi wa niphuwa nniitthaniwa Elotu*, iipithiheiyeene eriyari ya itiili.

²² Ilotu* iyo sinimukhuneela mmunttuusinimwaya, isalgeru* sinimurukureera mukerekhere mmoolokoni.

²³ Mooloko waasareyaka, owo khantuthuwa; naari Yordanu aammanihaka mitekutekusawe mmwaanomwawe, owo onkhala emaalelo.

²⁴ Ookhala anaawere omvara mmaithoni, hoye hoye omphariha mutaphani ni ongweyiha iphula?