Yobi 39 - Emakhuwa Bible

¹ Nyuwo moosuwela ehuhu heeni singyaraaya ikhomaci? Moosuwela ehuhu naahe ongyaraawe?

² Weeraka nyuwo mohaalikela nyeeri simmalihaaya sireeneno eyaasi? Moosuwela nihuku singyaraaya?

³ Iyo sinkokhora sinaayara axaanaaya ni ovoreyawaya onamaala.

⁴ Axaanaaya anunnuwela mutuphini, enakhomaala; anttimula woohihokolowatho.

⁵ Taani amutapunxe buuru a mutuphini? Taani apanse mikhoyisawe?

⁶ Miyo koomvaha nikare ntoko nivaatenawe, ni inyandya soowuuma sa maakha ntoko woomakawawe.

⁷ Owo ontheya onyakuliwa wa musidade ni khampwatthela wiiwa okhuwela wa namweettiha.

⁸ Omviravira mmanyaakoni aasaasaka yooca, aani onaasa munyepu mipatta sootheene.

⁹ Munuupuwela weera enari enimwaakhulela olamuliwa ni nyuwo hoye hoye okhala munikhoolanimwanyu ohiyu?

¹⁰ Munoowera otthukelela eyo ihipa soolimano, hoye hoye eyo enoottipura mattumuxa ottuliwanyu?

¹¹ Nyuwo munoororomela yeeyo niwoko na olipaxawaya? Munoohiyera mutekwaanyu woovihaxa wa yeeyo?

¹² Munoororomela weera eyo eroihe etrigwaanyu vaatewanyu, ethukumanyaka muneepetthelaanyuwo?

¹³ Nikhakandore ninkuphula mapupha ni wiixoona, mene khoongwereya olikanxera ni mapupha ni mapururu a ntiki.

¹⁴ Ninrela moocaaya veehaavani, nnahiya epurameleyaka ni ehaava,

¹⁵ nihuupuwelaka weera anoophweeya, ni weera wookhala woonyikalaka akhalaru mwaamunama.

¹⁶ Nnaahasula axaanaaya ntoko khaahiyono awaya, ni khannuupuwela weera mutekwaaya khoomvareleya etthu.

¹⁷ Eneereela hiiho, niwoko Muluku khavanghe miruku nikhakandore hata wakhalaru moota wa muupuwelo wooreera.

¹⁸ Wa soothesene, nakunga mapururu weera nitthimake, nno nintheya ekavalu* ni namweettihaaya.

¹⁹ Weeraka moovaha ikuru ekavalu*, hoye hoye moowarihela muxikomwaya nceecera?

²⁰ Ti nyuwo mpakihale weera ekavalu* etuphe ntoko musoope, etannyeraka woova ni otturumaxawaya?

²¹ Eyo emvalatha enyoonyiweene, enghakalala mukurunimwaya, enatthimakela mukhottoni.

²² Ennyoosa woova ehoovaka etthu, kheenghuluwaru ekatana.

²³ Murupa wa nyuupasaya oniinaina mukhwipimwaya nivaka naaraka ni mphutulo.

²⁴ Ethukumelaka ni owali, eniihelelaxa otthimaka; nipalapatta naarumaka, kheentthuna weemela.

²⁵ Imaara sootheene ninrumaaya nipalapatta, eyo eneera: Nrowe! Enoona wunkha wa ekhotto ottai ottai, okhuwela wa asitokweene ni munyakunyaku wa ekhotto.

²⁶ Ti niwoko na mirukusanyu murumaasi omvavaawe, ni akungelaka mapuphaawe mpatta wa ohitto?

²⁷ Ti niwoko na nlamulonanyu xaaka omvavaawe osuluxa, anatekawo epuuruwaawe?

²⁸ Mookhalamwawe ti mwala mutokotoko, ni omviriha weiwo ohiyu wootheene; woolipawawe ti nikhuku na mwala na osuluxa.

²⁹ Omvenyera weiwo arowaka waasa yooca; ottai ottai, maithwaawe anoona yooca eyo.

³⁰ Axaanaawe angwura ephome, ni owo onkhala weiwo araayawo anamakhwa.”