Yobi 38 - Emakhuwa Bible

Yoowaakhula ya Yave

¹ Vano Yave aamwaakhula Yobi mutthekuni, aneera:

² “Taani yoola onghela ewukawuka mirukusaka ni masu oohikhalano esuwelo?

³ Mwiireherere ntoko mutthu, kinimookohakohani, ni nyuwo mukaakhuleke.

⁴ Mwaari woowi kaapakaka mathipelo a elapo? Mwiiwexexa, mukaakhuleke.

⁵ Taani ohenle nyiinano sa wunnuwawaya? Vekhaikhai moosuwela! Taani yookolenle mukhoyi wooringelano?

⁶ Amarimbwaaya athipeliwe vaavi? Ahenle taani nlukunaya noopacera,

⁷ ithenyeeri sa oxeexelo siipaaya, sikhuwelaka ni ohakalala ikhalelo sootheene sa wiirimu?

⁸ Taani aattuunle ephareiya mmilakoni miili, yaakhumaaya ni wuupa vanaattuuttuniwaya,

⁹ kaawaringhaaka eyo ni mahutte, kihuruwelakano ewiriphi?

¹⁰ Miyo kaahelela mwiinano, kinaakhaliha anampattikaaya ni milakosaya,

¹¹ keeraaka: ‘mukotele vaava; mweemeleke vaava ni mitekutekusanyusene soolipaxa.

¹² Mwaatoko olamulela oxeexelo hoye hoye othoonyera enguungu nipuronaya,

¹³ weera avarexexe elapo yootheene ni mapuphaaya ni waatatha atakhali ootheene?

¹⁴ Elapo enthatuwa ekhalelowaaya ntoko oloko onceendyiwaaya ni ekanyero, aani ekhalelowaawe enlikana ni ekuwo erino icaambulo.

¹⁵ Atakhali ankhoottihiwa waarawawe, ni moonowaaya wooweemexiwa oninteya.

¹⁶ Nyuwo mwaatoko ophiya mphattuwelani mwa ephareiya, hoye hoye ovira mpiphini mwa moowiixeraxa?

¹⁷ Mohooniheriwa milako sa okhwa? Nyuwo mohoona milako sa ewiriphi ya okhwa?

¹⁸ Munoowera osuwela moota wootheene wa mulaponi? Mwasuwela, mukileele.

¹⁹ Ephiro heeni enrowa vanipuroni onkhalaayawo waara? Epiphi enkhala woowi?

²⁰ Munoowera orongha vanipuroniwaya? Moosuwela ephiro enrowa enkhalaayawo?

²¹ Woohihovela moosuwela mweenre muyariwa ehinaaye ehuhuweene yeele. Mookhala wa iyaakha sincipalexa!

²² Mwaatoko ovolowa vatathani wa etthapwe? Mohoona athokororiwaayawo maralala,

²³ kithokororenlaaka ehuhu ya woopiha, aani nihuku na owana ni ekhotto?

²⁴ Ephiro heeni enrowa weiwo ommwalamwalaaya overinya, hoye hoye nri woowi nipuro ipheyo sa mpatta ninkhuma nsuwa sinkawanyihereliwaaya elapo ya vathi?

²⁵ Taani onghula mooviramo epula etokotoko ni ephiro wa epheyo yookukutteya,

²⁶ weera erupihele epula mulaponi mwa mwemmo ohinkhalaawemo mutthu, aani munikareni ohinkhaliwaru,

²⁷ weera emalihe ntthona na munikareni moowuumelela ni ophuwihamo munyepu?

²⁸ Weeraka epula yookhalano tiithaaya? Taani ori tiithi a mattonyo a nikame?

²⁹ Maahi oowoopaana angyariwa naani? Taani oyanre etthapwe emmora wiirimu,

³⁰ maahi yoopaanaka ntoko nluku, ni vasulu wa moowiixera woopaanaka?

³¹ Nyuwo munoowera otthuka Pleyade* yooreera? Munoowera opasa mikhoyi sa Oriyoni*?

³² Munoowera okhumeleliha mweehuhunimwaya mukuttula wa ithenyeeri hoye hoye okhumeleliha mukuttula oniitthaniwa Ursu* ni axaanaawe?

³³ Nyuwo moosuwela malamulo a wiirimu? Nyuwo munoowera okhaliha olamulawawe elapo ya vathi?

³⁴ Nyuwo munoowera okhuwela mpaka mmahutteni ni wiirupihela epula etokotoko?

³⁵ Ti nyuwo munrumiha overinya, ni iwo onaweerelani: ‘Nri va’?

³⁶ Taani ovanghe miruku murima ni wiiwexexa mmuupuweloni?

³⁷ Taani orino miruku weera aalikele mahutte? Taani ongwera wiittha maahi a mmanyaapuni sa wiirimu,

³⁸ ntthupi nuumelelaka ni makottomola a mulaponi yaathataanyeranaka?

³⁹ Ti nyuwo muninlupatthela mwatto muthiyana, munamaliha etala ya amwatto,

⁴⁰ awosa yiixaatalenleene munyattanimwaya hoye hoye ethurumelaka ereene mwemmo aniipithaayamo?

⁴¹ Taani onaavaha yooca anakhuku axaanaaya yaamukhuwelelaka Muluku ni yaaxoraxoraka niwoko na ohikhalano yooca?