Yobi 36 - Emakhuwa Bible

¹ Elihu aaheeratho:

² “Kinoovekelani weera mukivileletho, ni kinoowooniherani soohima sikinatho sa ekhaikhai soowiixaakiherano wa Muluku.

³ Enrweela ottaiwene esuwelowaaka; kinookhalela onamoona sa ekhaikhai ya Mpattuxaaka.

⁴ Muhihovele, maswaaka khaahiyono oowootha; vano yoowo ori ni nyuwo ookhalano esuwelo etokotoko.

⁵ Muluku ti ooweraxa, mene khanaanyoosa atthu; aani ti ooweraxa ni oolipeene mwa yeeyo ontthunaawe opaka.

⁶ Khanuurela okumi wa atakhali, mene onlipihera soophwanela sa oohooxiwa.

⁷ Oningwehexexa oororomeleya; Owo onaakilaathiha vahiceni sa emwene vamoha ni mamwene, awunnuwihaka mahuku ootheene.

⁸ Vaheera atthu yatthukiwa ni onyooro, enawaleliwa oolipeene mahuku ootheene ni mikhoyi soohooxa,

⁹ Owo onimwaaleela yeeyo apankaaya, weera aattheka moota woowiixoona.

¹⁰ Owo onoopakiha weera elakiwe ni onimwaalamula orukunxa murima wa yoonanara apankaaya.

¹¹ Vano, yamwiiwelela, enamurumeela Yoowo, sinooweettela nnenesene mpaka ommaleloni wa mahukwaaya ni anoohakalala muyaakhani saahaleenle.

¹² Vaheera yaahiiwelela, animwiiviwa ni ekatana ni animookhwa woohikhalano esuwelo.

¹³ Yaawo arino murima wootakhala aasareya isara; naari Owo aatthukaka, awosa khaamvekela ekhavihero.

¹⁴ Awosa ankhwa nlelo ereene amiravo eriyari ya yaale anraruwa mmapuroni a ediini.

¹⁵ Vaheera Yaawo anghaawa Owo onaatapuxa moohaawaxanimwaya; Muluku onuuluma ni yaawo moothanananimwaya.

¹⁶ Owo onoovenxani mmakacamihoni, ookhalihakani vanipuroni noothanuwa, nootaphuwa, ni vameesaniwanyu esareiyeene yooca yincipale.

¹⁷ Vaheera vano, yoolemelaanyu ti nthorihelo avaheriwe atakhali; nthorihelo ni ekhaikhai yohoovaraxani.

¹⁸ Nnene! Ahikhale anootannyeni ni mihakhu; muhiihiyerere muhapuxeyaka ni makhwankwa matokotoko.

¹⁹ Weeraka mihakhusanyu hoye hoye wiilipiherawanyu waamookhaviherani ni waamookurunuxani mmakacamihoni?

²⁰ Muhihaawele moohiyuni muloko waavenxiwaka mmatthokonimwaya.

²¹ Nnene! Muhihokoleele mootakhalani; kinoona ntoko munkupaleela otakhala ohiya ohaawa.

²² Muluku onunnuwihiwa mooweranimwawe. Taani ori muhusiha ntoko Yoowo?

²³ Taani omulakelenle iphirosawe, hoye hoye amweerenle: ‘Khampanke nnene’?

²⁴ Muupuwelele wunnuwiha mitekosawe, mwa seiyo atthu aniipelaaya ni icipo soovuwiha.

²⁵ Omutthu wootheene onnoona; ottaiwene atthu annoonatho.

²⁶ Moota unnungwaawe Muluku! Oopwaha mwiiwexexowaahu! Khasinaalikeleya iyaakha sa okhalawawe.

²⁷ Owo onttukhulela osulu mattonyo a maahi, antothowa ntoko epula, enamwaareela.

²⁸ Epula enrupa mmahutteni, aniitthela maahi awo mwaatthuni.

²⁹ Khaawo onsuwela nnenesene moota onkungaawe mahutte, ni moota itari sinoopaaya wiirimu.

³⁰ Moone moota Muluku onaarihaawe overinya mmahutteni, omwaleelaka mpaka mphareiyani moowiixera.

³¹ Ti hiiho Owo onlamulaawe miloko, aruwerihaka yooca yincipale.

³² Owo omphuta overinya mmatatanimwawe, anaphimela wookotelawo.

³³ Etaraawe enghima waattamelawaya ettheku; mpaka mihuwo sinsuweliha okhuveelawaya.”