Yobi 32 - Emakhuwa Bible

Elihu onaawiiha asinthamwene araru a Yobi

¹ “Vano asilopwana araru ale yaahiyerera omwaakhula Yobi, niwoko owo iihelano okhala oororomeleya.

² Vaheera, mwaana mulopwana a Barakeli, mBuzi, a emusi ya Rami, aamunyoonyeraxiwa Yobi, niwoko owo iixaakiha ohoolo wa Muluku.

³ Aahaanyoonyerasiwatho asinthamwene araru, niwoko khayaaphwannye moota woomviriyela Yobi yaaroomootheraru.

⁴ Vanonto Elihu aamaala awehereraka wuuluma ni Yobi, niwoko awosa yaari asitokweene ompwaha yoowo.

⁵ Vaheera oonaka weera araru ale khayaarino yoohima, aanyoonyiwa.

⁶ Vano Elihu, mwaana mulopwana a Barakeli, mBuzi, aahuuluma: “Miyo mmiravo, nyuwosa mohunnuwasa. Tivawo, kaahovelaaka kihooleelakani yeeyo kisuwenlaaka.

⁷ Miyo kuupuwela: ‘Asitokweene antthuneya wuuluma; yaawo arino iyaakha sincipale ti antthuneya ovaha miruku.’

⁸ Vaheera ti munepa onkhala mpuwa mwa mutthu onimvaha wiiwexexa – ngwiya wa Muluku a ikuru sootheene.

⁹ Esuwelo khaarino asitokweeneru, khaahiyono oowunnuwaxa paahi ansuwela yeeyo eri ya ekhaikhai.

¹⁰ Tivawo kineeraaka: Mukiwiriyane; kinoohimatho yeeyo kisuwenlaaka.

¹¹ Nyuwosa nlelo muulumaka, kaaweherera; kaahiiwa ovaanyihanawanyu; nyuwosa mwaasaasaka moota woowuuluma,

¹² kaahoowiriyanani nnenesene. Vaheera khawoworu a nyuwosa oonihenre weera Yobi ootapanya. Khawoworu a nyuwosa aakhunle maswaawe.

¹³ Muheerase: ‘Noophwanya miruku; Muluku ti onaakhula ahikhanle mutthu.’

¹⁴ Owo khuulumme ni miyo ni miyo nkimmwaakhula ntoko nyuwosa mpankaanyu.

¹⁵ Awosa aapondya, khaanono yoowaakhula, khaangweraru wuuluma.

¹⁶ Kaaweherereke awosa nlelo ehuulumaka, ekhalaka emaalelo woohaakhula?

¹⁷ Vano, ti emaaraaka yoowuuluma; kintthuna wuuluma moonelowaaka.

¹⁸ Aakhala masu ankikaphula mpuwamwaka ni nkingwera omaalano.

¹⁹ Kihanle vakhaani ophuleya ntoko eviinyu enyowani exaxaka eheliweene mmapoottoroni manyowani.

²⁰ Ontthuneya wuuluma weera kiphwanye okhurunuwa. Ontthuneya ohula iyanosaka kaakhulaka.

²¹ Khaawo kineeraaka kimukhalele nthalu naari mmoha a nyuwo, hata nkaasaasera omusiveliha mukina.

²² Vano miyo nkingwera weepesa, niwoko kaapanke hiiho, Muluku aamukittaruxa.”